Leemiso 26 - ጌሻ ማፃፋ

¹ ቦነ ሻች፥ ካ ጫክያ ዎደ እር ኮሾናይሳዳ፥ ኤያስ ቦንቾ ኮሸና።

² ካፎት ያነ ሃነ ፕራሸ አሰ ቆሆናይሳዳ፥ ጋሶይ ባይና ባድያ ባደ አሰ ጋከና።

³ ፓራስ ልሶ፥ ሀረስ ብፃላ ኮሸይሳዳ ኤያ አሳ ዞኮስ ፃምአ ኮሼስ።

⁴ ኤያ አሳስ እያ ኤያተዳ ዛሮፓ፤ ዛርኮ ነ እያ መላ ግዳና።

⁵ ኤያ አሳስ እያ ኤያተ ቆንጭሳዳ ዛራ፤ ሄስ ሀኖና እፅኮ እ ባና ጭንጫ ግድ ቆፓና።

⁶ ኤያ አሳ ቦላ ኪታ የዶይ፥ ባ ቶሆ ቃንፅ የገይሳ መላ ዎይኮ ዎያባ ኡየይሳ መላ።

⁷ ኤያ አሳ ሌምሶይ፥ ስልዳ ቶሆ መላ ማደና።

⁸ ኤያ አሳስ ቦንቾ እሞይ፥ ሹቹ ያምባርሻን ቃች ዎድ ያምባራናዉ ፓጭያ አሳ መላ።

⁹ ኤያ አሳ ሌምሶይ ማትዳ አስ ባ ኩሸ ጫድዳ አጉን ከሳናዉ ባፀተይሳ መላ።

¹⁰ ኤያ አሳ ዎይኮ ባ ኦገ ብያ አስ ኡነ ኦስሳናዉ ቃፃርያ አስ ባ ቶራ ሻራን ፆንግያ አሳ መላ።

¹¹ ካን ባ ጮሻኮ ጉየ ስሚድ ላጨይሳዳ፥ ኤያ አስ ባ ኤያተ ዛር ዛር ቆንጭሴስ።

¹² ባና ጭንጫ ኦድ ፄልያ አሳፐ ኤያ አሳስ ሎኦ ቃድ ደኤስ።

¹³ “አዛላ አስ ኦገን ጋሞይ ደኤስ፤ ያሽያ ጋሞይ ኦገን ዩዬስ” ያጌስ።

¹⁴ ሳንቅ ማፃፈ ቦላ ያነ ሃነ ቃፀይሳዳ፥ አዛላ አስ ባ ሂፃን ያነ ሃነ ሽረቴስ።

¹⁵ እስ እስ አዛላ አስ ሀር አቶሽን፥ ዎፀን ቱሽድ ባራናዉ ዋየቴስ።

¹⁶ አዛላ አስ ማርካራ ኦድያ ላፑን ጭንጫታፐ ባና አዳ ጭንጫ ግድ ቆፔስ።

¹⁷ ባና ጋያባይ ባይናባን ፓላምያ አስ ኦገራ ብያ ካና ሀይ ኦይክያ አሳ መላ።

^18-19 ባ ሾሩዋ፥ “ታኒ ካሰ ጋይስ” ያግድ ጭምያ አስ፥ ጎይድ ቦንቆ ታማ ሆልያ፥ ዎይኮ ዎያ ዶንገ ቶራ ዱክያ አሳ መላ።

²⁰ ም ዉርኮ ታም ቶኤስ፤ ዝግርስ ይኮ ኦሽ አቴስ።

²¹ ፂፍ ቦንቆ ዳርሰይሳዳነ ም ታማ ዳርሰይሳዳ ፓላማ ዳርስያ አስ ኦሹ ዳርሴስ።

²² ዝግርሳ ቃል ማልኦ ካ መላ ኡፋይስሸ ዱገ ጋንጀ ቤስ።

²³ ዎዛናን ኢታባይ ደእሽን፥ ባ እንፃርሳን ጭሞ ቃላ ሃሳያ አስ ብራን ላንፀትዳ ኡርቃ ሚሸ መላ።

²⁴ ገነ አስ ባ ዎዛናን ደእያ ኢታተ ባ እንፃርሳን ገንስ።

²⁵ እያ ዎዛናን ላፑን ቱናት ኩምዳ ግሾ፥ እ ሎኦ ቃላ ሃሳይኮካ እያ አማኖፓ።

²⁶ ባ ሞርከተ እ ገንኮካ፥ እ ኦያ ኢታይ ዳባባን ቆንጫና።

²⁷ ሀራታስ ኦላ ቦክያ አስ ሄ ኦላን ባዉ ኩንዳና፤ ሀራታ ቦላ ሹቹ ጎንዶርስያ አሳ ቦላ ሄ ሹቻይ ስሚድ ጎንዶረታና።

²⁸ ዎርዶትያ እንፃርስ ባ ቆህዳ አሳታ እፄስ፤ ጭሞ ኦድ ኩንደ ካለስ።