Leemiso 25 - ጌሻ ማፃፋ

ሀራ ሶሎሞነ ሌምሶታ

¹ ሀይሳቲ ይሁዳ ካዋ ህዝቅያሳ አሳት ዱቅድ ፃፍዳ ሶሎሞነ ሌምሶታ።

² ፁራ ገንይ ፆሳስ ቦንቾ፤ ፁራ ፕልግድ ከሶይ ካዎታስ ቦንቾ።

³ ሳሎይ ቁ ግዳይሳዳነ ሳእ ዝቃ ግድዳይሳዳ ካዎታ ቆፋ አስ ኤራናዉ ዳንዳኤና።

⁴ ብራፐ ቅታ ድጋ፤ ሄሳፈ ጉየ፥ ሂላንቾይ ሎይና።

⁵ ካዎ ስንፈ ኢታ አሳታ ድጋ፤ እያ አራታይ ፅሎተን ምንድ ኤቃና።

⁶ ካዎ ስንን ኤቅያ ዎደ ጬቀቶፋ፤ ግታ አሳታ ግዶን ነዉ በሰ ኮዮፓ።

⁷ ኔፐ ግታትያ አሳስ በሰ እማናዉ ሀላቃይ ነና ደንን፥ ካዉየይሳፈ፥ እ ነና፥ “ሀ ቃ በሳን ኡታ” ገይስ ሎኦ።

⁸ ነ አይፈን በእዳባ ማርካታናዉ ዳይና ስን ባናዉ ኤለሶፓ። ነ ማርካታ ስምን ሀራ አስ ነ ማርካተይ ባላ ግደይሳ ቆንጭስኮ፥ ነ ዬላታና።

⁹ ነ ግዶንነ ነ ሾሩዋ ግዶን ፓላም መትኮ፥ እያራ ኦደታዳ ነ ፓላማ ዉርሳ፤ ሀራ አሳ ፁራ ቆንጭሶፓ።

¹⁰ ሄስ ሀኖና እፅኮ ነ ኦደይሳ ስእዳ አስ ነና ካዉሻና፤ ነ ሱንይ ዛሪድ ስሞናዳ ኢታና።

¹¹ በሲያ ዎደ ኦደትዳ ልከ ቃል፥ ብራ ሚሸ ቦላ ትገትዳ ዎርቃ አሌቆ መላ።

¹² ኤራ አስ ዞርያ ዞረ ስእያ ሀይስ፥ ሄስ ዎርቃፈ ዎይኮ ጌሻ ዎርቃፈ ኦሰትዳ አሌቆ መላ።

¹³ ካ ጫክያ ዎደ እርፃ ሃ ኡይን አለይሳዳ፥ አማንያ ኪታንቾይ ባና ኪቶይሳ ኡፋይሴስ።

¹⁴ እሞናባ እማና ግድ ጬቀትያ አስ እር ባይና ሻራነ ጫርኮ መላ።

¹⁵ ዳንዳአ አስ ሀላቃ ኦድድ ማይዜስ፤ ሊቆ ቃል መቀ ካን ገሌስ።

¹⁶ ኤስ ደምኮ ካላና ጋካናዉ ማ፤ ሽን ዳርስኮ ነና ጮሻና።

¹⁷ ነና ኡፍሸ እፆናዳ፥ ነ ሾሩዋ ሶ ኡባ ዎደ ቦፓ።

¹⁸ ባ ሾሩዋ ቦላ ዎርዶን ማርካትያ አስ፥ ፃምእ፥ ማሽነ ቶር ቆሄይሳዳ ቆሄስ።

¹⁹ መቶ ዎደ አማነቶና አሳን ዘምፖይ፥ ቃፅያ አቻን ጮምያነ ስልዳ ቶሆን ሄመተይሳ መላ።

²⁰ አዛንዳ አሳስ የ የፅያ አስ፥ ሜጎ ዎደ ማኦ ቃርያነ ማዱን ቦላ ጫላባ ትግያ አሳ መላ።

²¹ ነ ሞርከይ ኮሻትኮ ሙዛ፤ ሳሞትኮ ኡሻ።

²² ነ ሄሳ ኦኮ እያ ሁጰን ታማ ቦንቆ ካሽድ ቆለይሳ መላ፤ ጎዳይ ነና ዎይታና።

²³ ዶሎሀ ባጋ ጫርኮይ እራ ኤሄይሳዳ፥ ዝግርስ ሀንቆ ኤሄስ።

²⁴ ዶናትያ ማችራ እስ ኬን ዳናፐ ካረ ባራንዳን ዱስ ሎኦ።

²⁵ ዳቡርዳ አስ እርፃ ሃ ኡይድ አለይሳዳ፥ ሃሆ ቢታፈ ያ ሎኦ ኦድ ኡፋይሴስ።

²⁶ ኢታ አሳ ስንን ጉልባትያ ፅሎ አስ፥ ቡሎትዳ ፑልቶነ ኢትዳ ኦላ ሃ መላ።

²⁷ ዳሮ ኤስ ሙስ ሎኦ ግደና፤ ሄሳዳካ፥ ባ ቦንቾ ኮሽ ቦንችሰና።

²⁸ ባና ሃሮና አስ ድርስ ላለትዳ ካታማ መላ።