Leemiso 22 - ጌሻ ማፃፋ

¹ ሎኦ ሱን ዳሮ ዱረተፈ አስ፤ ቦንቾይ ብራፐነ ዎርቃፈ አስ።

² ዱረነ ማንቆ ጎዳይ መስ፤ ሄሳን ኤንቲ ናምአይ እስኖ።

³ ጭንጫ አስ ኢታ በእድ ቆሰትድ አቴስ፤ ሽን አኬክ ባይና አስ መቶን ገልድ ቆሄቴስ።

⁴ አሽከተነ ጎዳ ያሽ፥ ዱረተ፥ ቦንቾነ ደኦ እሜስ።

⁵ ኢታታ ኦገን አጉንነ ፅሄይ ደኤስ፤ ሽን ባና ናግያ አስ ኤንታፈ ሃኬስ።

⁶ ናእ ዋንድ ዳናዉ በሲያኮ ታማርሳ፤ እ ጭምያ ዎደካ እያፐ ሃከና።

⁷ ዱረይ ማንቁዋ ሃሬስ፤ ታልኤ ኤክዳይ ታልኤ እምዳይሳስ አይለ ግዴስ።

⁸ ናጋራ ዘርያ ኡራይ ዋየ ጫኬስ፤ እያ ሀንቆ ፃምአይ መቃና።

⁹ ባ ካ ማንቆታስ ሻክያ ግሾ ኬሀ አስ አንጀታና።

¹⁰ ቀልቅስያ አስ ድግኮ፥ ፓላም፥ ኦሽነ ጫሽ አታና።

¹¹ ዎዛን ጌሽ ግድዳ አስነ ሎኦ ኦዳ ዶስያ አስ ካዎራ ዳቦቴስ።

¹² ጎዳ አይፈይ ኤራተ ናጌስ፤ ሽን ዎርዳንቾታ ቃላ ሽር የጌስ።

¹³ አዛላ አስ፥ “ካረን ጋሞይ ደኤስ፤ ታና ኦገን ማና” ያጌስ።

¹⁴ ላይማ ማጫሳ ዶን ዎልቃማ ኦላ መላ፤ ጎዳይ ሀንቀትዳይሳት እያን ኩንዶሶና።

¹⁵ ኤያተ ናአ ዎዛናን ደኤስ፤ ሽን ፕርጮይ እያፐ ሃሴስ።

¹⁶ ሻሎ ሺሻናዉ ማንቁዋ ናቀይነ ዱረ አሳስ እሞታ እምያ ናምአይ ማንቃና።

ሀስታሙ ጭንጫ ዞረታ

¹⁷ ነ ሀይ ዛራዳ ጭንጫታ ቃላ ስአ፤ ነ ዎዛና ታ ትምርትያኮ ዛራ።

¹⁸ ኤንታ ነ ዎዛናን ዎኮነ ነ ዶናን ኤንታ ሃሳይኮ፥ ነ ኡፋይታና።

¹⁹ ነ አማኖይ ጎዳን ግዳና መላ፥ ታኒ ነና ሀች ታማርሳይስ።

²⁰ ታኒ ነዉ ዞረነ ኤራተ ኩምዳ ሀስታሙ ሌምሶታ ፃፋስ።

²¹ ነና ኪትዳይሳስ ልከ ዛሮ ዛራና መላ፥ ታኒ ነና ቱማተ ታማርሳስ።

1

²² ማንቆታስ አይብካ ባይና ግሾ፥ ኤንታ ቦንቆፋ፤ ፕርዳን ኤንታ ማታ ይሶፋ።

²³ ጎዳይ ኤንታ ግሾ ሞተታና፤ ኤንታ ቦንቅዳይሳታ እ ቦንቃና።

2

²⁴ ይሎትያ ኡራራ ላገቶፓ፤ ኤለ ሸነትያ ኡራራ ሄመቶፋ።

²⁵ ኔኒ እያ ይሉዋራ ሜዘትኮ፥ ጉየፐ አጋናዉ ዳንዳአካ።

3

²⁶ አሳ አጮ ታ ቃንፃና ጋዳ ዋሰ ግዶፓ።

²⁷ ነ ቃንፅያባ ይኮ፥ ነ ዝንእያ ሂፃይ አቶና፥ ነዉ ደእያባ ኡባይ ኤከታና።

4

²⁸ ነ ማይዛት ቶክዳ በን ዛዋ ሾዶፋ።

5

²⁹ ባ ኦሱዋን ሎህዳ አስ በአዲ? እ ጮ አሳታስ ግዶናሽን ካዎታስ ኦስ።