Leemiso 20 - ጌሻ ማፃፋ

¹ ማያ ኡሽ ኤያነ ኦሻንቾ ኦስ፤ ኡሻን ባለትያ አስ ጭንጫ ግዳናዉ ዳንዳኤና።

² ካዎ ሀንቆይ ጋሞ ጉደ መላ፤ እያ ይሎይያ አስ ባ ሸምፑዋ ቦላ ፕርዴስ።

³ ፓላማፐ ሃከይስ ቦንቾ፤ ሽን ኤያ አስ ኦየታናዉ ኤለሴስ።

⁴ አዛላ ጎሻንቾይ ዎደ ናግድ ጎየና፤ ካ ጫክያ ዎደ እ ዎሳናዉ ኮዬስ፤ ሽን አይባካ ደመና።

⁵ አሳ ዎዛና ሀልቾይ ጪሞ ሃ መላ፤ ሽን ዎዛናማ አስ ዱቅድ ከሴስ።

⁶ ዳሮ አሳት ባንታ ሎኦተ ኦዶሶና፤ ሽን ቱማ አማነትያ አስ ደማናይ ኦኔ?

⁷ ፅሎ አስ ቦረይ ባይና ደኦ ደኤስ፤ እያ ካልያ እያ ናይት አንጀትዳይሳታ።

⁸ ካዎይ ፕርዳናዉ ባ አራታን ኡትያ ዎደ፥ ኢታ ኡባ ባ አይፈን ሀርቅድ ከሴስ።

⁹ “ታ ዎዛናይ ጌሽ፤ ታናን ናጋር ባዋ” ጋናዉ ዳንዳእያ አስ ዳነሻ?

¹⁰ ጎዳይ ዎርዶ ምዛነነ ግና ግዶና ማካ ሚሸን ጎኤተይሳታ እፄስ።

¹¹ ናእ ጌሽነ ሱረ ግደይስ እ ኦያ ኦሶን ኤረቴስ።

¹² ስእያ ሀይነ ፄልያ አይፈ፥ ጎዳይ መስ።

¹³ ስኮን ነ ዎደ ዉርስኮ ነ ማንቃና፤ ምናዳ ኦኮ ነ ካ ካላና።

¹⁴ ሻምያ አስ፥ “ቆሄስ! ቆሄስ!” ያጌስ፤ ሽን ብዳፐ ጉየ፥ “ገላን ሻማስ” ያግድ ጬቀቴስ።

¹⁵ ዎርቀይ ኩምስ፤ አልኦ ሹችካ በንቴስ፤ ሽን ኤር ኩምዳ እንፃርስ ኡባፈ አዳ አሌቆ።

¹⁶ ኤሮና አሳስ ዋሰ ገልያ ኡራ ማኡዋ ቃር ኤክተ፤ እማ አሳስ ዋሰ ገልያ ኡራ ማኦ ኦይክተ።

¹⁷ ዎርዶን ደምዳ ካ ማልኤስ፤ ሽን አቅድ ፔእሸ ዶናን አጨዳ ሀኔስ።

¹⁸ ዞረ ኤካዳ ነ ቆፋ ቃቻ፤ ዞረ ኤኮና ደአሸ ኦላ ቦፓ።

¹⁹ ዝግርያ አስ ፁራ ገንና፤ ሄሳ ግሾ ጮ ሃሳያ አሳፐ ሃካ።

²⁰ ባ አዋ ዎይኮ ባ አይዉ ባድያ አሳ፥ ደኦ ፆምፐይ ሳካና ማን ቶአና።

²¹ ኮይሮራ ኤሶን ሺቅዳ ሻሎይ ዉርሰን አንጀተና።

²² ነና ቆህዳ ኡራ ቆሀዳ ዛራና ጎፓ፤ ጎዳን አማነታ፤ እ ነና አሻና።

²³ ጎዳይ ናምኡ ቆሞ ምዛነ እፄስ፤ ዎርዶ ምዛነይ እያ ኡፋይሰና።

²⁴ አሳይ ባና ኦግያ ጎዳይ ካለስ፤ ያትን፥ አስ ባ ደኦን ባና ኦግያ ዋትድ አኬካናዉ ዳንዳኢ?

²⁵ ኤሶን፥ “ሀይሳ ታኒ ፆሳስ እማስ” ጉስነ ጉየፐ ቂሮተ አሳስ ፅሄ።

²⁶ ጭንጫ ካዎይ ጌላታ ሻክድ ኤሬስ፤ እ ኤንታ ቃቶና ሴሬስ።

²⁷ አሳ አያን ጎዳስ ፆምፐ፤ እያ ጋ አሳተ ኡባ ፕልግድ ፄሌስ።

²⁸ ሲቆይነ አማነተ ካዋ ናጎሶና፤ እያ አራታይ ቱማ ፕርዳን ምኔስ።

²⁹ ያላጋታ ቦንቾይ ኤንታ ዎልቃ፤ ጭማታ ቦንቾይ ኤንታ ፑሉን።

³⁰ ምኖ ሴር ኢታተ ሾዴስ፤ ዋይ ኢታ ዎዛና ላሜስ።