Leemiso 2 - ጌሻ ማፃፋ

ጭንጫተ ጎአ

¹ ታ ናአዉ፥ ታ ትምርትያ ነ ኤክኮ፤ ታ ኪታ ነ ዎዛናን ዎኮ፤

² ነ ሀይ ጭንጫተኮ ዛርኮ፤ ነ ዎዛና አኬካኮ ዛርኮ፤

³ ኤራተ ፄግኮ፤ አኬካ ቁ ኦዳ ፄግኮ፤

⁴ ብራ ዎይኮ ጌምዳ ሚሸ ኮየይሳዳ፥ ኔኒ ኤራተ ኮይኮ፥

⁵ ሄ ዎደ ኔኒ ጎዳስ ያሽ ጉስ አይበኮ ኤራና፤ ፆሳ ሎይዳ ኤራና።

⁶ ጎዳይ ጭንጫተ እሜስ፤ እያፐ ኤራተነ አኬክ በንቴስ።

⁷ እ ሱረታስ ማድያ ዞረ ምንጄስ፤ ቦረይ ባይናይሳታስ ጎንዳለ ግዴስ።

⁸ ሱረ ፕርዳ ኦግያ ናጌስ፤ እያዉ አማነተይሳታ ኦግያ ምንስ።

⁹ ሄ ዎደ ኔኒ ፅሎተ፥ ሱረ ፕርዳ፥ ሱረ ኦገነ ሎኦ ኦሶይ አይበኮ አኬካና።

¹⁰ ጭንጫተ ነ ዎዛና ግዶ ገላና፤ ኤራተ ነዉ ኡፋይስ ግዳና።

¹¹ ሻክድ ኤሮይ ነና ናጋና፤ አኬክ ነና ካማና።

¹² ጭንጫተ ነና ኢታ አሳታ ኦግያፐ ናጋና፤ ጌላ ኦዳፐ ነና አሻና።

¹³ ኤንቲ ናጋራ ማን ዳናዉ፥ ፅሎተ ኦግያ አግዶሶና።

¹⁴ ኢታ ኦሶን ኡፋይቶሶና፤ ጌላተን ሀሹ ጎሶና።

¹⁵ ኤንታ ኦሶይ ምርቀ፤ ኤንታ ደኦይ ጌላ።

¹⁶ ጭንጫተ ላይማ ማጫሳፐ፥ ቃላን ጭምያ ላገፈ ነና አሻና።

¹⁷ እያ ባ ናአተ አዝና አጋጋሱ፤ ፆሳ ስንን ጫቅዳ ጫቁዋ ዶጋሱ።

¹⁸ እ ሶ ኦገይ ሀይቆኮ ጋስ፤ ኢኮ ቡስ ሞይትለታኮ ጋስ።

¹⁹ ኢኮ ብያ ኦንካ ጉየ ስመና፤ ደኦ ኦገ ደመና።

²⁰ ሄሳ አጋዳ፥ ሎኦ አሳታ ሌምሱዋ ካላ፤ ፅሎ አሳታ ሄመ ናጋ።

²¹ ሱረ አሳትነ ቦረይ ባይናይሳት፥ ቢታን አዱሳ ላይ ዳና።

²² ሽን ኢታት ቢታፈ ሾደታና፤ አማነቶናይሳት ያና።