Leemiso 19 - ጌሻ ማፃፋ

¹ ባ ዶናን ዎርዶትያ ኤያ አሳፐ ባ ደኡዋን ቦረይ ባይና ማንቆይ ሎኦ።

² ኤር ባይና ዳፈተ ሎኦ ግደና፤ ኤሶ ዳሮይ ኦገ ባለስ።

³ አስ ባ ኤያተን ባ ደኡዋ ኢሴስ፤ ያትድ ጎዳ ቦላ ይሎቴስ።

⁴ ዱረተ ዳሮ ላገ ሺሼስ፤ ሽን ማንቆተ ደእያ ላገታ ዱስ።

⁵ ዎርዶ ማርክ ሴረቶና አተና፤ ዎርዶ ኦደተይ ከስ ኤከና።

⁶ ዳሮ አሳይ ሹማ ሶምኦ ኮዮሶና፤ እሞታ እምያ አሳራ አስ ኡባይ ዳቦቴስ።

⁷ ማንቆ አስ ሀር አቶሽን እያ እሻት እፆሶና፤ እያ ላገት እያፐ ሃኮሶና፤ እ ኤንታ አዳሽንካ ኤንቲ እያ ኮዮኮና።

⁸ ጭንጫተ ደምያ አስ ባ ሸምፑዋ ዶሴስ፤ ኤራተ ምንድ ኦይክያ ኡራስ እንጀቴስ።

⁹ ዎርዶ ማርክ ሴረቶና አተና፤ ዎርዶ ኦደተይ ያና።

¹⁰ ኤያ አሳስ እንጀ ደኦይ በሰና፤ አይለይ ሀላቃታ ሃሮይ ዳሮ ኢታ።

¹¹ ጭንጫተ አሰ ዳንዳአ ታማርሴስ፤ ቆሆ ካድ አ ቦንችሴስ።

¹² ካዋ ሀንቆይ ጋሞ ጉደ መላ፤ ሽን እያ ናሾይ ማታ አጭስያ አካ መላ።

¹³ ኤያ ናእ ባ አዋ ይሴስ፤ ዶናማ ማቻ ፆክያ ኬ መላ።

¹⁴ አስ ኬነ ሻሎ አዉፐ ላቴስ፤ ሽን አኬካ ማቾ ጎዳይ እሜስ።

¹⁵ አዛላተ ስኮ ኤሄስ፤ ኦሶ ኦና አስ ኮሻቴስ።

¹⁶ ኪታ ናግያ አስ ባ ሸምፑዋ ናጌስ፤ ሽን ቀል ግያ አስ ሀይቄስ።

¹⁷ ማንቆስ ኬህያ አስ ጎዳስ ታልኤስ፤ ጎዳይ ሄ ሎኦ ኦሱዋ ግሾ ዎይቴስ።

¹⁸ ስሞ ኡፋይስ ደእሽን ነ ናይታ ሴራ፤ ሴሮና እፅኮ፥ ነ ኤንታ ይሳሳ።

¹⁹ ኤለ ሸነትያ አስ ባ ጋትያ ኤካናዉ በሴስ፤ ኔኒ እያ እስ ቶሆ አሽያባ ግድኮ፥ ሀራ ዎደካ ነ እያ ሄሳዳ አሻናይስ አተና።

²⁰ ዞረ ስአ፤ ታማራናዉ ኮያ፤ ኔኒ ዉርሰ ጋካናዉ ጭንጫ ግዳና።

²¹ አስ ዳሮባ ሀልቼስ፤ ሽን ጎዳይ ግዳባይ ፖለቴስ።

²² አሳፐ ኮየተይ አማነተ፤ ዎርዶ ግዳናፐ ማንቆ ግደይስ ሎኦ።

²³ ጎዳስ ያሽ ደኦኮ ካለስ፤ እያ ያይያ አስ ካልድ ደኤስ፤ ኢት እያ ቦቸና።

²⁴ እስ እስ አስ ዳሮ አዛላ፤ ሀር አቶሽን ዎፀን ቱሽክዳ ኡይ ፑደ ባራናዉ ዋየቴስ።

²⁵ ኔኒ ቀልቅስያ አስ ሾጭኮ፥ አኬክ ፓጭዳይስ ጭንጫተ ታማራና፤ አኬካ አስ ነ ሀንቀትኮ፥ እ ኤራተ ደማና።

²⁶ ባ አዋ ቦንቅያ ናአይ፥ ባ አይዉ የደያ ናአይ፥ ዬላነ ካዉሻተ ኤህያ ናአ።

²⁷ ታ ናአዉ፥ ነ ዞረ ስኦና እፅኮ፥ ኤራ ኦግያፐ ሃካሳ።

²⁸ ዎርዶ ማርክ ሱረ ፕርዳ ቦላ ቀልቅሴስ፤ ኢታ አሳ ዶን ኢታተ ምቴስ።

²⁹ ቀልቅስያ አሳስ ፕርዳ ኤያታስ ዋ ኮሼስ።