Leemiso 17 - ጌሻ ማፃፋ

¹ ኦሽ ደእያ በሳን ደእያ ግታ ግብራፐ ሳሮይነ ዎፕ ደእያ በሳን ኡይ ፖቆይ ሎኦ።

² ጭንጫ አይለይ ፓና ባ ጎዳ ናኣ ሃሬስ፤ እያ እሻታራ እስፈ ላታ ሻከቴስ።

³ ዎርቅነ ብር ታማን ፓጨተይሳዳ፤ ጎዳይ አሳ ዎዛና ፓጬስ።

⁴ ኢታ አስ ኢታ ሃሳያ ስኤስ፤ ዎርዳንቾይ ዎርዶ ሃሳያ ሀይዜስ።

⁵ ማንቆታ ቦላ ቀልቅስያ አስ ኤንታ መዳ ፆሳ ጫዬስ፤ ሀራ አስ ጋክያ መቶን ኡፋይትያ አስ ሴረቶና አተና።

⁶ ናአ ናእ ጭማ አሳስ ካላቻ፤ አዋት ባንታ ናይታስ ቦንቾ።

⁷ ሎኦ ኦድ ኤያ አሳስ ጊገና፤ ሄሳዳካ ዎርዶ ኦድ አይሰይሳስ ጊገና።

⁸ ዎፈ እመይሳስ ዎፈይ ብታ መላ፤ እ ብያ በሳ ኡባይ እያዉ እንጀቴስ።

⁹ ቆሆ ገንያ ኡራይ ሲቆ ኮዬስ፤ ሽን ኦዳ ዛሪድ ዛሪድ ዎጭያ ኡራይ፥ አማነትያ ላገታ ሻኬስ።

¹⁰ ኤያይ ፄቱ ቶሆ ልሶን ሾጭን ኤረይሳፈ፤ አኬክ ደእያ አሳስ ጮ ሀንቆይ ኤራ እሜስ።

¹¹ ኢታ አስ ኡባ ዎደ ጌላ፤ ቃይ ባይና አስ እያ ቦላ ኪተታና።

¹² ኤያራ እያ ኤያተን ጋሄታናፐ ማራት ኤከትዳ ማሄራ ጋሄተ ሎኦ።

¹³ ሎኦ ኦዳይሳስ ኢታ ኩሸ ዛርያ ኡራ ሶፐ ኢታባይ ክቸና።

¹⁴ ኦሽ ዶምሸ ሃ ዋ መንይሳ መላ፤ ሄሳ ግሾ ኦሽ ዶማናፐ ኮይሮታዳ ፓላማ አጋ።

¹⁵ ናጋራንቹዋ ፅልሶይነ ፅሉዋ ቦላ ፕርዶይ፥ ናምአይካ ጎዳይ እፅያ ኦሶ።

¹⁶ ጭንጫተ ደማናዉ አሞይ ባይና ደእሽን፥ ኤያ ኩሸን ደእያ ሚሸይ አይ እያ ማዲ?

¹⁷ ላገይ ኡባ ዎደካ ላገ፤ እሽ መቶ ዎደ ማዳናዉ የለቴስ።

¹⁸ አኬክ ባይና አስ ኤሮና ኡራ አጩዋ ቃንፃናዉ ዋሰ ግዴስ።

¹⁹ ኦሹ ዶስያ አስ ናጋራ ዶሴስ፤ ኡባ ዎደ ጬቀትያ አስ ባ ቦላ ዮ ፄጌስ።

²⁰ ዎበ ቆፍ ደእያ አስ ሎኦባ ደመና፤ ባ እንፃርሳን ጭምያ አስ መቶን ገሌስ።

²¹ ኤያ ናአ የልዳ አው አዛኔስ፤ ኤያ ናአ አዋስ ኡፋይስ ዴና።

²² ኡፋይትያ ዎዛን አሳስ ሎኦ ለ፤ ሽን መቅዳ ዎዛን አሳስ ዎልቃ ይሴስ።

²³ ኢታ አስ ፕርዳ ጌላያናዉ ጌማን ዎፈ ኤኬስ።

²⁴ አኬካ አስ ጭንጫተ ባ ስንፈ ሃሰና፤ ሽን ኤያ አሳ አይፈይ ሳአ ጋፃ ዩዬስ።

²⁵ ኤያ ናእ ባ አዋ አዛንስ፤ ባ አይዉካ ጫምሴስ።

²⁶ ፅሎ አስ ሴሮይ በሰና፤ ሱረ አስ ሾጮይ ሎኦ ግደና።

²⁷ ጉ ቃላ ሃሳያ አስ ኤራንቾ፤ ዎፓ አያን ደእያ አስ አኬካንቾ።

²⁸ ኤያ አስ ስእ ጊኮ ጭንጫ ዳኔስ፤ ባ ዶና ዶዮና እፅኮ ኤራንቾ ዳኔስ።