Leemiso 16 - ጌሻ ማፃፋ

¹ አስ ባ ዎዛናን ሀልቼስ፤ ሽን ልከ ዛሮይ ጎዳፐ በንቴስ።

² አስ ኦያ ኦሶ ኡባይ እያዉ ልከ ዳኔስ፤ ሽን ጎዳይ ደንዶ ቆፋ በኤስ።

³ ነ ኦሶ ኡባ ጎዳስ ሀዳራ እማ፤ ኔኒ ቆፕዳባይ ፖለታና።

⁴ ጎዳይ ኡባባይ ቆፕዳይሳ ባና መላ ኦስ፤ ሀንኮካ፥ ማካላንቾታ ዉርሰይ ዮ።

⁵ ጎዳይ ኦቶራንቾታ እፄስ፤ ኤንቲ ሴረቶና አቶኮና።

⁶ ሲቆንነ አማነተን ናጋር አቶ ጌተቴስ፤ ጎዳስ ያይድ አስ ኢታባፐ አቴስ።

⁷ አሳ ሄመ ጎዳ ኡፋይስያባ ግድኮ፥ እ ባ ሞርከታራ ሳሮ ዳናዳ ኦስ።

⁸ ፅሎተን በንትያ ጉባይ፥ ዎርዶን ደምያ ዳሮ ዎፐ ሎኦ።

⁹ አስ ዎዛናን ባ ኦናባ ሀልቼስ፤ ሽን ሀልቾይ ጎዳ ማደን ፖለቴስ።

¹⁰ ካዎይ ፆሳፈ ኤክዳ ማታን ፕርዴስ፤ እያ እንፃርሳይ ሱረ ፕርዴስ።

¹¹ ግና ምዛነትነ ማካ ሚሸት ጎዳባ፤ ባይዝያባ ኡባን ገነይ ዶና መላ ጎዳይ ኮዬስ።

¹² ካዎት ኢታ ኦሶ እፆሶና፤ ኤንታ አራታይ ፅሎተን ኤቄስ።

¹³ ካዎት ፅሎ እንፃርሳን ኡፋይቶሶና፤ ቱማ ሃሳያ ኡራ ዶሶሶና።

¹⁴ ካዋ ሀንቆይ ሀይቆ ኪታንቾ መላ፤ ሽን ጭንጫ አስ ሀንቁዋ እርፅሴስ።

¹⁵ ካዋ ሶምኦይ ፖእኮ ደኦይ ደኤስ፤ እያ ሎኦተይ እራ ኤህያ ሻራ መላ።

¹⁶ ጭንጫተ ደሞይ ዎርቃ ደሞፐ አስ፤ አኬካ ደሞይ ብራ ደሞፐ ሎኦ።

¹⁷ ሱረታ ኦገይ ኢታፐ ሃኮ፤ ባ ሄመ ናግያ ኡራይ ባ ሸምፑዋ ናጌስ።

¹⁸ ኦቶሮይ ዮ ካለስ፤ ጬቀተ ኩንደ ኤሄስ።

¹⁹ ኦቶራንቾታራ ድኦ ሻከታናፐ፥ አሽከ ግድድ ማንቅድ ደኤይስ ሎኦ።

²⁰ ዞረ ስእያ ኡራስ እ ኦያባ ኡባይ እንጀታና፤ ጎዳን አማነትያ ኡራይ አንጀታና።

²¹ ባ ቆፋን ጭንጫ ግድዳ አስ አኬካንቾ ጌተቴስ፤ ሎኦ ቃል ኤራተ ጉጄስ።

²² ጭንጫ አሳስ ኤራተ ደኦ ፑልቶ መላ፤ ሽን ኤያታ ሴሮይ ጮ ዎደ ዉርሴስ።

²³ ጭንጫ አስ ኦደታናፐ ስን ቆፔስ፤ እያ መተርሻይ ኤራተ ጉጄስ።

²⁴ ሎኦ ቃል ኤሳ እልሎዳ ማልኤስ፤ ሸምፖስ ማልኦ፤ መቀስ ፓፆ ግዴስ።

²⁵ አሳስ ሱረ ዳንያ ኦገይ ደኤስ፤ ሽን ዉርሰን ሀይቆኮ ጋስ።

²⁶ አስ ምንድ ኦና መላ ኦይ ካ አሞ፤ ኮሽ ምንድ ኦና መላ ደንስ።

²⁷ ካዉሻ አስ ኢታባ ሀልቼስ፤ እያ ኦዳይ ታማዳ ፁጌስ።

²⁸ ዎበ አስ ኦሽ ደንስ፤ ዝግርስ አማነትያ ላገታ ሻኬስ።

²⁹ ገነ አስ ባ ሾሩዋ ጭሜስ፤ ሎኦ ግዶና ኦገ ካለስ።

³⁰ ባ አይፈን ቃምኦትያ አስ ጌላባ ቆፔስ፤ ባ መተርሻ ሳፅድ ማንድያ አስ ኢታባ ኦስ።

³¹ ፑሉምዳ ሁጰይ ቦንቾ ካላቻ፤ ሄስካ በንተይ ፅሎ ደኦ ደእና።

³² ዎልቃማ አስ ግዳናፐ ዳንዳአ አስ ግዶይ ሎኦ፥ ዳሮ ካታማታ ኦልድ ኦይካናፐ ባና ሃሮይ አስ።

³³ አስ ሳማ የጌስ፤ ሽን ዉርሰ ዛሮይ ጎዳፐ በንቴስ።