Leemiso 15 - ጌሻ ማፃፋ

¹ ሊቆ እንፃርስ ሀንቆ ዛርብሴስ፤ ሽን ዶምኤያ ቃል ሀንቆ ደንስ።

² ጭንጫታ እንፃርሳይ ኤራ ፑላዬስ፤ ሽን ኤያታ ዶናይ ኤያተ ፑልትሴስ።

³ ጎዳ አይፈት ኡባ በሲ ፄሎሶና፤ ኢታታነ ሎኦታ ሻክድ በኦሶና።

⁴ ሎኦ ኦድ ደኦ ም መላ፤ ሽን ጌላ ኦድ አያና መንስ።

⁵ ኤይ ባ አዋ ሴራ ካስ፤ ሽን ባ አዋ ሴራ ኤክያ አስ ጭንጫ።

⁶ ፅሎ ኡራ ኬን ዳሮ ሚሸይ ደኤስ፤ ሽን ኢታታ ሶ ገልያ ሚሸይ መቶ ኤሄስ።

⁷ ጭንጫታ ዶናይ ኤራ ዘሬስ፤ ሽን ኤያታ ዎዛናይ ሄሳ መላ ግደና።

⁸ ጎዳይ ኢታታ ያርሹዋ እፄስ፤ ሽን ሱረታ ዎሳን እ ኡፋይቴስ።

⁹ ጎዳይ ኢታ አሳታ ኦግያ እፄስ፤ ሽን ፅሎተ ካለይሳታ እ ዶሴስ።

¹⁰ ልከ ኦግያ አግዳ አስ ፕርድ ናጌስ፤ ሴራ እፅያ አስ ሀይቄስ።

¹¹ ዱፎይነ ዮይ ጎዳ ስንን ቆንጨ፤ ያትን፥ አሳ ዎዛና ቆፋይ ዋን እያፐ ጌማኔ?

¹² ቀልቅስያ አስ ሴራ ዶሰና፤ ጭንጫታፐ ዞረ ኦይቸና።

¹³ ዎዛን ኡፋይትን፥ ሶምኦይ ፖኤስ፤ ሽን ዎዛን አዛንኮ፥ አያን መቄስ።

¹⁴ አኬካ ዎዛን ደእያ አስ ኤራተ ኮዬስ፤ ሽን ኤያት ባንታ ኤያተን ኡፋይቶሶና።

¹⁵ ማንቆታ ደኦይ ኡባ ዎደ ባፀ፤ ሽን ኡፋይትያ አስ ኡባ ዎደ አለስ።

¹⁶ ኦሻራ ደእያ ግታ አቆፐ ጎዳ ያሻራ ደእያ ጉባይ ኬሀ።

¹⁷ ኦሽ ደእያ በሳን ሞ አሾ ማናፐ ሲቆይ ደእያ በሳን ሳን ኬሀ።

¹⁸ ሀንቆይ ኦሽ ከሴስ፤ ሽን ዳንዳእ ኦሽ እርፅሴስ።

¹⁹ አዛላ አሳ ኦገይ አጉንን ድረትስ፤ ሽን ሱረ አሳ ኦገይ ጊጋ።

²⁰ ጭንጫ ናእ ባ አዋ ኡፋይሴስ፤ ሽን ኤያ ናእ ባ አይዉ ካስ።

²¹ ዎዛን ባይና አስ ባ ኤያተን ኡፋይቴስ፤ ሽን ዎዛናማ አስ በሲያ ባ ኦስ።

²² ዞረይ ይኮ፥ ቆፕዳባይ ሀድሬስ፤ ዳሮ ዞረይ ደእያ በሳን ቆፕዳባይ ፖለቴስ።

²³ ኦይሻስ በሲያ ዛሮ እሞይ ሄ ኡራ ኡፋይሴስ፤ ባ ዎደን ኦደትያ ኦድ አይ መላ ኡፋይስ!

²⁴ ጋርሳን ደእያ ስኦለፐ አታና መላ ደኦ ኦገይ አኬካ ኡራ ፑደ ካለስ።

²⁵ ጎዳይ ኦቶራንቾታ ኬ ላላና፤ ሽን አምኤ ዛዋ ናጌስ።

²⁶ ጎዳይ ኢታታ ቆፋ እፄስ፤ ሽን ጌሻ ቃላን እ ኡፋይቴስ።

²⁷ ዎርዶን ዎ ደማናዉ አልያ አስ ባ ሶ አሳ ቦላ መቶ ኤሄስ፤ ሽን ዎፈ እፅያ አስ ደኦን ዳና።

²⁸ ፅሎ አስ ኦደታናፔ ስንትድ ቆፔስ፤ ሽን ኢታታ እንፃርሳፐ ኢታባይ ፑልቴስ።

²⁹ ጎዳይ ኢታታፐ ሃኬስ፤ ሽን ፅሎታ ዎሳ ስኤስ።

³⁰ ሶምኦይ ፓሽክን ዎዛን ኡፋይቴስ፤ ምሽራቾይ መቀ ምንስ።

³¹ ደኦ እምያ ዞረ ስእያ አስ ጭንጫተራ እስፈ ዳና።

³² ሴራ እፅያ አስ ባና ቆሄስ፤ ሽን ሴራ ኤክያ አስ አኬካ ደሜስ።

³³ ጎዳስ ያሽ ጭንጫተ ታማርሴስ፤ አሽከተ ቦንቾፈ ስንቴስ።