Leemiso 13 - ጌሻ ማፃፋ

¹ ኤራንቾ ናአይ ባ አዋ ሴራ ስኤስ፤ ሽን ቀልቅሰይስ ሴራ ኤከና።

² አስ ባ ዶናፐ ከይያ ቃላን ሎኦባ ኤኬስ፤ ሽን አማነቶናይሳት ማካላባ አሞቶሶና።

³ ባ ዶና ናግያ ኡራይ ባ ሸምፑዋ ናጌስ፤ ሽን ኤሶን ሃሳያ ኡራይ ባና ይሴስ።

⁴ አዛላይ አሞቴስ፤ አሞትኮነ አይባካ ደመና፤ ሽን ምንድ ኦይሳት ካላና።

⁵ ፅሎ አሳት ዎርዶ ኦዳ እፆሶና። ሽን ኢታ አሳታ ኦድ ዬላዬስነ ካዉሼስ።

⁶ ሱረ ደኡዋ ደእያ ኡራ እያ ፅሎተይ ናጌስ፤ ሽን ናጋራንቾ እያ ናጋራይ ኦንጌስ።

⁷ ባና ዱረ ዳንስያ አስ ደኤስ፤ ሽን እያዉ አይብነ ባዋ፤ ቃስ ባና ማንቆ ዳንስያ አስ ደኤስ፤ ሽን እያዉ ዳሮ አቆይ ደኤስ።

⁸ አስ ባ ሚሸን ባ ሸምፖ ዎዛናዉ ዳንዳኤስ፤ ሽን ማንቁዋ ያሽስያባይ ባዋ።

⁹ ፅሎታ ፖኦይ ጶሌስ፤ ሽን ኢታታ ፆምፐይ ቶአና።

¹⁰ ኦቶሮይ ኦሽ የሌስ፤ ሽን ዞረ ኤከይሳት ጭንጫታ።

¹¹ ዳቡር ባይና ደምዳ ሚሸይ ኤሶን ዬስ፤ ሽን ምን ኦድ ደምዳ አቆይ፥ ዳር ዳርድ ቤስ።

¹² ኮይያባይ ፖለቶና ጋምኤይስ አዛንስ፤ ሽን አሞትዳባይ ፖለተይስ ኡፋይሴስ።

¹³ ዞረ ካያ ኡራይ መቶን ገሌስ፤ ሽን ኪታ ቦንችያ ኡራይ ሳሮ ደአና።

¹⁴ ጭንጫተ እምያ ትምርተይ ደኦ ፑልቶ፤ ህገይ አሰ ሀይቆ ፅሄፐ ከስ ኤካናዉ ማዴስ።

¹⁵ አኬክ ደእያ ኡራይ ቦንቸቴስ፤ ሽን አማነቶና እፆይ ቆሆስ ጋስ።

¹⁶ ጭንጫ አስ ኡባይ ኤራን ኦስ፤ ሽን ኤይ ባ ኤያተ ቆንጭሴስ።

¹⁷ ኢታ አሳት ኪተትድ፥ መቶን ገሎሶና፤ ሽን አማንያ አሳት ኪተትድ፥ ሳሮተ ኤሆሶና።

¹⁸ ሴራ እፅያ አስ ማንቄስነ ዬላቴስ፤ ሽን ሴራ ኤክያ ኡራይ ቦንቸቴስ።

¹⁹ አሞትዳባይ ፖለተይስ ዳሮ ኡፋይሴስ፤ ሽን ኢታት ኢታባፐ ሃካናዉ ኮዮኮና።

²⁰ ጭንጫ አሳራ ሄመትያ አስ ጭንጫ ግዴስ፤ ሽን ኤያ አሳራ ሄመትያ አስ መቶን ገሌስ።

²¹ ናጋራንቾታ ኢታ ቃዳይ ካሌስ፤ ሽን ዱረተ ፅሎታ ዎይቶ።

²² ሎኦ አስ ባ ናይታ ናይታ ላትሴስ፤ ሽን ናጋራንቹዋ አቆይ ፅሉዋስ ዳጋየቴስ።

²³ ማንቁዋ ጎሻይ ዳሮ ካ አይፈናዉ ዳንዳኤስ፤ ሽን ሱረ ፕርዳ ፓጫን ዬስ።

²⁴ ፕርጮን ሴራናዉ ዶሶና አስ ባ ናኣ እፄስ፤ ሽን ባ ናኣ ሲቅያ ኡራይ ምንድ ሴሬስ።

²⁵ ፅሎይ፥ ኡሎይ ካላና ጋካናዉ ሜስ፤ ሽን ናጋራንቾይ ኡባ ዎደ ኮሻታና።