Leemiso 12 - ጌሻ ማፃፋ

¹ ሴራ ዶስያ ኡራይ ኤራተ ዶሴስ፤ ሽን ሴራ እፅያ ኡራይ ኤያ።

² ሎኦ አስ ጎዳፐ ሳባ ደሜስ፤ ሽን ጎዳይ ገናንቾታ ፕርዴስ።

³ አስ ኢታተን ምንድ ኤቀና፤ ሽን ፅሎታ ፃጶይ ቃፀና።

⁴ ዎዛናማ ማችያ ባ አዝናስ ካላቻ መላ፤ ሽን ባ አዝና ካዉሽያ ማችያ መቀ ምያ አጃጀ መላ።

⁵ ፅሉዋ ቆፋይ ሱረ፤ ሽን ኢታታ ዞረይ ጭሞ።

⁶ ኢታታ ዞረታይ አሳ ቆሀናሳ፤ ሽን ፅሎታ ዞረታይ ኤንታ አሻናሳ።

⁷ ኢታ አሳት ኩንዳና፤ ኤንታዉ ዘረካ አተና፤ ሽን ፅሎታ ኮቻይ ምንድ ደአና።

⁸ አስ ባ ጭንጫተ መላ ጋላተቴስ፤ ሽን ጌላ ቆፋይ ደእያ አስ ካቴስ።

⁹ ዱረ አስ ዳንድ፥ መቶን ደእያ አሳፐ ጮ አሳ ዳንድ፥ ኦድ ባ ደኦ ሱግያ አስ ኬሀ።

¹⁰ ፅሎ አስ ባ መሄስ ቃቴስ፥ ሽን ዎዛና ምኖ አሳስ ቃይ ባዋ።

¹¹ ባ ቢታ ምን ኦያ ኡራይ ካ ካሌስ፤ ሽን ፓናባ የደያ ኡራይ አኬክ ፓጭዳይሳ።

¹² ኢታት ናጋራንቾ አሳታ ድአናዉ አሞቶሶና፤ ሽን ፅሎታ ፃጶይ ዳይድ ደአና።

¹³ ኢታ አሳ እያ ዶናፐ ከይዳ ኦድ ፅሄ ግድድ ኦይኬስ፤ ሽን ፅሎይ መቶፐ ከስ ኤኬስ።

¹⁴ አስ ባ ዶናፐ ከይያ ቃላን ሎኦባ ካሌስ፤ ባ ኦዳ ኦሶ ጋትያ ኤኬስ።

¹⁵ ኤያ አስ ብያ ቡሳይ አዉ እያ ሁጰን ልከ ዳኔስ፤ ሽን ጭንጫ አስ ዞረ ስኤስ።

¹⁶ ኤያ ኡራ ሀንቆይ ኤለስድ ኤረቴስ፤ ሽን ጭንጫ አስ ጫሸ ዉዳ ጌና።

¹⁷ ቱማ ሃሳይያ አስ ሱረባ ኦዴስ፤ ሽን ዎርዶ ማርካይ ዎርዶ ኦዴስ።

¹⁸ አኬኮና ኦደትያ ኦድ ማሻዳ ጫዴስ፤ ሽን ጭንጫ እንፃርሳይ ፓስ።

¹⁹ ዎርዶ ኦድ ጉ ዎደሳ፤ ሽን ቱማ ኦድ መርናዉ ደአና።

²⁰ ኢታ ቆፕያ አሳ ዎዛናን ጭሞይ ደኤስ፤ ሽን ሳሮባ ዞረተይሳታ ዎዛናን ኡፋይሳይ ኩሜስ።

²¹ ፅሎታ መቶይ ጋከና፤ ሽን ኢታታስ መቶይ ዳራና።

²² ጎዳይ ዎርዳንቾታ እፄስ፤ ሽን ቱማንቾ አሳታን እ ኡፋይቴስ።

²³ ጭንጫ አስ ባ ኤራ ቆቴስ፤ ሽን ኤያት ባንታ ኤያተ ኦዶሶና።

²⁴ ምንድ ኦያ ኡራይ ደረ ሃሬስ፤ ሽን አዛላ አስ ሃረቴስ።

²⁵ ኡንአን ኩምዳ ዎዛን አዛኖ ኤሄስ፤ ሽን ኬሀ ኦድ እያ ኡፋይሴስ።

²⁶ ፅሎ አስ ባ ሾሩዋ ዞርድ፥ ሱረ ኦገ ካለስ፤ ሽን ኢታት ኦገ ቱማፐ ሃሴስ።

²⁷ አዛላ አስ ሻንካትድ ኤህዳ አሾ ካና፤ ሽን ምንድ ኦያ ኡራይ ባ ሚሽያስ ምሸቴስ።

²⁸ ፅሎተ ኦገን ደኦይ ደኤስ፤ ሄ ኦገን ሀይቆይ ባዋ።