Leemiso 11 - ጌሻ ማፃፋ

¹ ጎዳይ ዎርዶ ምዛነ እፄስ፤ ሽን ልከ ምዛነን ኡፋይቴስ።

² ኦቶሮይ ያ ዎደ ካዉሻተ ዬስ፤ ሽን አሽከተን ጭንጫተ ዬስ።

³ ፅሎታ ኤንታ ሱረተይ ካለስ፤ ሽን ኢታ አሳታ ኤንታ ጌላተይ ይስስ።

⁴ ሀንቆ ጋላስ ዱረተ ጎኤና፤ ሽን ፅሎተ ሀይቆፐ አሼስ።

⁵ ቦረይ ባይና ኡራ ኦግያ ፅሎተይ ሱርሴስ፤ ሽን ኢታ ኡራይ ባ ኢታተን ኩንዴስ።

⁶ ሱረታ ኤንታ ፅሎተይ አሼስ፤ ሽን አማነቶናይሳታ ኤንታ አሞይ ፅሄ ግድድ ኦይካና።

⁷ ኢታ አስ ሀይቅያ ዎደ፥ እ ናግያ ኡፋይሳይ እያራ እስፈ ሀይቄስ፤ እ ባ ዎልቃን ጬቀትያባይ ኡባይካ ዬስ።

⁸ ፅሎይ መቶፐ አቴስ፤ እያ ግሾ ኢታ ቦላ መቶይ ዬስ።

⁹ ፆሳ ካድዳ አስ ባ ዶናን አሳ ይስስ፤ ሽን ፅሎት ኤራን ከስ ኤኮሶና።

¹⁰ ፅሎት ቦንቸትያ ዎደ፥ ካታማይ ኡፋይቴስ፤ ቃስ ኢታት ሀይቅያ ዎደ፥ ሀሹ ጌስ።

¹¹ ፅሎታ አንጁዋ ጋሶን ካታማይ ድጬስ፤ ሽን ኢታ ኡራ ኦድ ካታማ ይስስ።

¹² ባ ሾሩዋ ካያ ኡራስ ዎዛን ባዋ፤ ሽን አኬካንቾ ኡራይ ስእ ጌስ።

¹³ ዝግርያ አስ ፁራ ላሌስ፤ ሽን አማነትያ አስ ፁራ ገንስ።

¹⁴ ካለያባይ ይኮ፥ ካዎተይ ኩንዴስ፤ ሽን ዳሮ ዞረይሳት ደእኮ፥ ሳሮይ ደኤስ።

¹⁵ ኤረና ኡራስ ዋሰ ግድያ አስ ቱማፐ መቶታና፤ ሄሳፈ ዋሰ ግዶና እፀይስ ሎኦ።

¹⁶ ኡሎ ኬሀ ማጫስ ቦንቸታዉሱ፤ ሽን ኢታ አስ ዱረተ ፃላላ ዱረቴስ።

¹⁷ ኬሀ አስ ባዉ ሎኦባ ኦስ፤ ሽን ዎዛና ምኖ አስ ባና ቆሄስ።

¹⁸ ኢታ አስ ደምያ ሚሸይ ጭሞ፤ ሽን ፅሎተ ዘርያ ኡራይ ቱማ ዎይቶ ጫካና።

¹⁹ ፅሎተን ምንድ ደእያ ኡራይ ፓፃ ደአና፤ ሽን ኢታተ ካልያ ኡራይ ሀይቃና።

²⁰ ጎዳይ ኢታ ቆፋይ ደእያ አሳታ እፄስ፤ ሽን ሱረ ሄመተይሳታን ኡፋይቴስ።

²¹ ኢታ አስ ሴረቶና አተና፤ ሽን ፅሎታ ኮቻይ አታና።

²² ቆፍ ባይና ማላ ሎኦ ማጫ ፑላተይ ጉዱን ስን አዳ ዎርቃ መላ።

²³ ፅሎታ አሙዋስ ፖሎይ ሎኦ ፃላላ፤ ሽን ኢታታ አሙዋስ ፖሎይ ሀንቆ ፃላላ።

²⁴ እስ እስ አሳት ባንታ ሚሸ አሳስ ጮ ኬሆሶና፤ ሽን ኤንታ አቆይ ሃ ዳሬስ። ሀራ አሳት ቃስ ባንታ ሚሻስ ፓላ ኡዘቶሶና፤ ሽን ኤንታ አቆይ ያ ፓጬስ።

²⁵ ኬሀ አስ ዱረታና፤ ሀራታ ማድያ አስ ማደታና።

²⁶ ካ አልእን ባይዛናዉ ምንጅያ ኡራ አሳይ ባዴስ። ሽን ባ ካ አሳይ ኮይያ ዎደ ባይዝያ ኡራ አንጄስ።

²⁷ ሎኦባ ምንድ ኮይያ ኡራይ ኡፋይሳ ደሜስ፤ ሽን ኢታባ ኮይያ ኡራ ኢታባይ ደሜስ።

²⁸ ባ ዱረተ አማነትያ አስ ኩንዳና፤ ሽን ፅሎት ባልጎ ምዳ።

²⁹ ባ ሶ አሳ ቦላ ቡቀ ደንያ ኡራይ ጎኤትያባይ አይብካ ባዋ። ኤያትካ ጭንጫታስ አይለ ግዳና።

³⁰ ፅሎ አስ ደኦ አይፈ አይፍያ ም መላ፤ ሸምፖ አሸይሳት ጭንጫታ።

³¹ ፅሎት ሳአን ባንታ ኦሶ ጋተ ኤክያባ ግድኮ፥ ኢታትነ ናጋራንቻት ባንታ ኦሱዋስ ኤካና ጋተይ ዋንድ ዳራንዴሻ!