Leemiso 1 - ጌሻ ማፃፋ

ሌምሶ ጎአ

¹ ሀይሳቲ እስራኤለ ካዋ ዳዊታ ናኣ ሶሎሞነ ሌምሶታ።

² ሌምሶት አሳይ ጭንጫተ፥ ሴራነ ኤራ ሃሳያ አኬካናዉ ማዶሶና።

³ ኤንቲ ጭንጫተ፥ ፅሎተ፥ ሱረ ፕርድነ ሱረ ዎዛን ዳና መላ ታማርሶሶና።

⁴ ኤያታስ አኬካ እሜስ፤ ናአተታስ ኤራተነ ካሃማተ እሜስ።

⁵ ጭንጫት ሀ ሌምሶታ ስእድ፥ ኤራ ጉጆሶና፤ አኬካንቾት ሎኦ ዞረ ኤኮሶና።

⁶ ሄሳን ሌምሶታነ ኤንታ ብርሸ፥ ጭንጫተ ኦዳነ ኤንታ ቃንእሸታ አኬካናዉ ዳንዳኤቴስ።

⁷ ጎዳስ ያሽ ጭንጫተስ ዶመ፤ ሽን ኤያት ጭንጫተነ ሴራ ካኦሶና።

ጭንጫተ ነዉ ሚሸ ኦ

⁸ ታ ናአዉ፥ ነ አዋ ዞርያ ስአ፤ ነ አየ ትምርትያ ካፓ።

⁹ ሄስ ነ ሁጵያስ ቦንቾ ካላቻ፤ ነ ቆያስ ጎዝዳ ግዳና።

¹⁰ ታ ናአዉ፥ ነና ናጋራንቾት ጭምኮ ኤሮ ጎፓ።

¹¹ ኤንቲ፥ “ኑራ የ፤ አሰ ዎናዉ ሆክድ ናጎስ፤ ፅሎታ ዎናዉ ቆሰቶስ።

¹² ስኦለይ ምተይሳዳ ኑካ ኤንታ ፓፃ ምቶስ፤ ኑ ኤንታ ኦላን የገትያ አሳዳ ኦና።

¹³ ኑኒ አልኦ ሚሸ ኡባ ደማና፤ ኑ ኬ ቦንቀ ሚሸን ኩንና።

¹⁴ ኑራ ላገታ፤ ኑ ደምዳባ እስፈ ሻከታና” ያጋና።

¹⁵ ታ ናአዉ፥ ኤንታራ ሄመቶፋ፤ ኤንታ ኦግያራ ባናዉ ነ ቶሁዋ ደንፋ።

¹⁶ ኤንቲ ኢታባ ኦናዉ ዎፆሶና፤ አሳ ሱ ጉሳናዉ ያ ሃ ጎሶና።

¹⁷ ካፎይ ፄልሽን፥ እያ ኦይካናዉ ግተ የገ ማደና።

¹⁸ ሽን ኤንቲ ባንታ ሱ ጉሳናዉ ሆኮሶና፤ ባንታ ሸምፑዋ ዎናዉ ቆሰቶሶና።

¹⁹ ገነን ጎአ ደምያ አሳ ዉርሰ ሄሳ መላ፤ ኤንቲ ሺሽዳ ሻሎይ ኤንታ ሸምፑዋ ኤኬስ።

ጭንጫተ ፄጌስ

²⁰ ጭንጫተ ዳጋላ ቦላ ኤቃዳ ፄጋዉሱ፤ ዳባባን ባ ቃላ ቁ ኦዳ ስሳዉሱ።

²¹ ጭንጫተ አስ ሺቅያ በሳን ኤቃዳ ፄጋዉሱ፤ ካታማ ገልያ ፐንገን ኤቃዳ ሀይሳዳ ያጋዉሱ።

²² “ህንተኖ፥ አኬክ ፓጭዳይሳቶ፥ ህንተ አዉደ ጋካናዉ ኤያ ግድድ ዳኔ? ቀልቅሰይሳቶ፥ አዉደ ጋካናዉ ኡፋይታኔ? ኤያቶ፥ አዉደ ጋካናዉ ኤራተ እፃኔ?

²³ ታ ሴራ ህንተ ስእዳባ ግድያኮ፥ ታኒ ታ ኤራ ህንተ ቦላ ጉሳና፤ ታ ቃላካ ህንተና ታማርሳና።

²⁴ ሽን ታ ፄግዳ ዎደ ህንተ ኮዮና እፅዳ ግሾ፤ ታኒ ኩሸ ምጭን ኦንካ አኬክቦና ግሾ፤

²⁵ ታ ዞርያ ህንተ ካዳ ግሾ፤ ታ ሴራካ ኤክቦና ግሾ፤

²⁶ ህንተና መቶይ ጋክያ ዎደ ታ ሚጫና፤ ህንተ ዳጋማን ኮኮርያ ዎደ ታ ቀልቅሳና።

²⁷ ጋዶይ ኡሾዳ ህንተ ቦላ ያ ዎደ፥ መቶይ ጎተዳ ህንተ ቦላ ኤቅያ ዎደ፥ ኡንእነ ዋየይ ህንተ ቦላ ጋክያ ዎደ፥ ታኒ ህንተና ቀልቅሳና።

²⁸ “ሄ ዎደ ኤንቲ ታና ፄጋና፤ ሽን ታ ኮይከ፤ ኤንቲ ታና ምንድ ኮያና፤ ሽን ደሞኮና።

²⁹ ኤንቲ ኤራተ እፅዳ ግሾ፤ ጎዳ ያሽ ዶርቦና ግሾ፥

³⁰ ታ ዞርያ ኤክቦና ግሾ፤ ታ ሴራ ካዳ ግሾ፤

³¹ ኤንቲ ባንታ ኦሱዋ አይፍያ ማና፤ ባንታ ቆፋ አይፍያ ካላና።

³² አኬክ ፓጭዳይሳታ ጭንጫተፈ ሃከይስ ዎስ፤ ኤያታ ቀል ጉስ ይሴስ።

³³ ሽን ታ ኦድያባ ስእያ ኡባይ ሳሮ ዳና፤ መቶ ህርጋፈካ ሸምፓና።”