Kessa 37 - ጌሻ ማፃፋ

ታቦተ

¹ ባስልኤል ታቦትያ ሶቃላ ምፈ ጊግስስ። ታቦትያ አዱሳተይ ናምኡ ዋነ ባጋ፥ ጎምፓይነ ጌሳይ እስ ዋነ ባጋ።

² ታቦትያ ጊግስድ፥ ጋነ ካርያ ዋላህ ባይና ዎርቃን ላንፅስ። እያ ዩሹዋ ቦላካ ዎርቃን ላንፅስ።

³ ኦይዱ ዎርቃ ሳጋዮታ ታቦትያስ ኦይዱ ገዳታ ቦላ፥ እስ ባጋራ ናምኡ ሳጋዮታ፥ ቃስ ሀንኮ ባጋራ ናምኡ ሳጋዮታ አስ።

⁴ ያትድ ሶቃላ ምፈ ኦሰትዳ ካሶታ ከስድ ኤንታ ዎርቃን ላንፅስ።

⁵ ታቦትያ ቶካናዉ፥ ታቦትያስ ምይያን ደእያ ሳጋዮታን ካሶታ አስ።

⁶ ዋላህ ባይና ዎርቃፈ፥ አዱሳተይ ናምኡ ዋነ ባጋ፥ ጎምፓይ እስ ዋነ ባጋ ግድዳ ናጋራ አቶተ ካማ ኦስ።

⁷ ቀፈይ ደእያ ናምኡ ክሩበታ ቆፀትዳ ዎርቃፈ ኦድ፥

⁸ እስ ክሩብያ እስ ባጋን፥ ሀንኮ ክሩብያ ሀንኮ ባጋን ዎድ፥ አቶተ ካሙዋራ እስኖ ኦድ መስ።

⁹ ክሩበት ባንታ ቀፍያ ምጭድ፥ አቶተ ካሙዋ ካምድ፥ እሶይ እሱዋ ፄሎሶና።

ዳቦ ፃርጴዛ

¹⁰ አዱሳተይ ናምኡ ዋ፥ ጎምፓይ እስ ዋ፥ ጌሳይ እስ ዋነ ባጋ ግድዳ ፃርጴዛ ሶቃላ ምፈ መስ።

¹¹ ዋላህ ባይና ዎርቃን እያ ላንፅድ፥ ዩሹዋካ ዎርቃን ላንፅስ።

¹² ሄሳዳካ፥ ጎምፓይ ታካ ግድያ ጎሰ ኦድ፥ እያ ዎርቃን ዩሽ አድ ላንፅስ።

¹³ ታቦትያ ቶካናዉ ማድያ ኦይዱ ዎርቃ ሳጋዮታ መድ፥ ኦይዱ ገዳታ ኦይዱ ማዛነታ ቦላ ዎስ።

¹⁴ ፃርጴዛ ቶካናዉ ካሶታ አያ ሳጋዮት ፃርጴዛ ጎሳ ማታን ኦሰትዶሶና።

¹⁵ ፃርጴዛ ቶክያ ካሶ ምታ ሶቃላ ምፈ ከስድ፥ ዎርቃን ላንፅስ።

¹⁶ ሄሳዳካ፥ ፃርጴዛ ቦላ ዎያ ዱማ ዱማ ሚሸታ ዋላህ ባይና ዎርቃፈ መስ። ሄሳትካ ሳነታ፥ ጭልፓታ፥ ከረታ፥ ዎይነ ያርሾ ትግያ ፁአታ።

ፆምፐ ዎያ ኮጫ

¹⁷ ሄሳፈ ጉየ፥ ባስልኤል ፆምፐ ዎያ ኮጫ ዋላህ ባይና ዎርቃፈ ኦስ። ኮጫ ኤስያ ቶሁዋነ ቶማ ቆፀትዳ ዎርቃፈ ጊግስስ። አሌቆስ ኦሰትያ፥ እያ ጋምቡታ፥ እያ ዋላፃታነ እያ ጪሻታ ኡባ እያራ እስፈ ኦይድ መስ።

¹⁸ እስ ባጋራ ሄ ታሸት፥ ቃስ ሀንኮ ባጋራ ሄ ታሸት ደእያ ኡሱፑን ታሸታ እያ ምይያን መስ።

¹⁹ ኡሱፑን ታሸታስ ፄራን ፄራን ሄ ሄ አሌቆ ጋምቡትነ ጪሻት ደእያ ላዉዘ ም ጪሸ ዳንያባ መስ።

²⁰ ፆምፐ ዎያ ኮጫ ግዶን ደእያ ቶማ ፄራን ኦይዱ አሌቆ ጋምቡትነ ጪሻት ደእያ ላዉዘ ም ጪሸ ዳንያባ መስ።

²¹ ዋን ደእያ ሄ ሄ ታሸታፐ ጋርሳን እስ እስ ጋምቡ ኦሰትስ።

²² ጋምቡት፥ ታሸትነ ፆምፐ ዎያ ኮጫይ እስኖ ግድድ፥ ዋላህ ባይና ዎርቃፈ ቆፀትድ ኦሰትዶሶና።

²³ ፆምፐ ዎያ ኮጫስ ላፑን ፆምፐታ፥ ፆምፐ ቶይስያ ቃጰታነ ኤንታ ዎያባታ ዋላህ ባይና ዎርቃፈ ኦስ።

²⁴ ፆምፐ ዎያ ኮጫነ እያዉ ጎኤትያ ሚሸ ኡባ ኦናዉ ሀስታማነ እቻሹ ክሎ ግራመ ግድያ፥ ዋላህ ባይና ዎርቃ ኦንግስ።

እፃነ ፃርጴዛ

²⁵ ባስልኤል እፃነ ጩይስያ ፃርጴዛ ሶቃላ ምፈ ጊግስስ። እያዉ ኦይዱ ማዛነይ ደኤስ። ሄ ፃርጴዛስ አዱሳተይነ ጎምፓይ እስ ዋ፤ ቃስ ጌሳይ ናምኡ ዋ። ኦይዱ ማዛንያን ደእያ ካጨት እያራ እስኖ ግድ ኦይከትድ ኦሰትዶሶና።

²⁶ እያዉ ቦላ ባጋ፥ ኦይዱ ምያነ ካጨታ ዋላህ ባይና ዎርቃን ላንፅስ፥ እያ ዩሹዋካ ዎርቃን ላንፅድ ዩሽ አስ።

²⁷ እያዉ ጋፃ ቦላ ቶካናዉ ማድያ ናምኡ ዎርቃ ሳጋዮታ መድ፥ ናምኡ ባጋ ምይያን ዎስ። ኤንቲ እፃነ ፃርጴዛ ቶክያ ዎደ ካሶ ምታ አናዉ ማደይሳታ።

²⁸ ካሶ ምታ ሶቃላ ምፈ ከስድ፥ ዎርቃን ላንፅስ።

²⁹ ጌሻ ሹማተ ዛይትያነ ሳውያ ሎኦ እፃነ ሽቶዳ ዋላክድ ኦስ።