Kessa 22 - ጌሻ ማፃፋ

ሻሎ ናጎ ዎጋ

¹ “እስ አስ ቦር ዎይኮ ዶርሰ ካይስድ ሹክኮ፥ ዎይኮ ባይዝኮ፥ ቦራ ግሾ እቻሹ ቦራታ፥ ዶርሳ ግሾ ኦይዱ ዶርሳታ ጭጎ።

² “ካይሶይ ኬ ቦክሸ ኦይከትድ ሾጨትድ ሀይቅኮ፥ ሾጭ ዎዳይስ ኦይሸተና።

³ ሽን ሄስ ሀንዳይ ጋላስ ግድኮ፥ እ ሄ ጉስዳ ሱ አጩዋን ኦይሸቴስ። ካይሶይ ባ ካይስዳይሳ ዛሮ፥ ሽን እያዉ ዛራናባይ ይኮ ባ ሁጰን አይለተስ ባይዘቶ።

⁴ እ ካይስዳ መሄይ ፓፃ ደእሸ እያ ኩሸን በንትኮ፥ ቦር ዎይኮ ሀረ ዎይኮ ዶርሰ ግድኮ፥ እ ካይስዳይሳስ ናምኡ ኩሸ ጭጎ።

⁵ “እስ አስ ባ መህያ ደንባን ዎይኮ ዎይነ ጋደን ሄምሽን፥ መሄይ ሀራ አሳ ካ ሚኮ፥ እ ባ ካፈ ዎይኮ ባ ዎይንያፐ ሎኡዋ አጫ ቃንፆ።

⁶ “እስ አስ ባ ጋደን ታማ ፁግሽን ታማይ ቡርያ ካንድ ሀራ አሳ ጋደን ድጭያ ካነ ዶርያ ሚኮ፥ ታማ ኦይዳ ኡራይ አጮ ቃንፆ።

⁷ “እስ አስ ብራ ዎይኮ ሀራ አልኦ ሚሸ ባ ሾሩዋስ ሀዳራ እምን፥ ሄ ሾሩዋ ሶፐ ካይሶይ ሄ ሚሽያ ኤክኮነ ሄ ካይሶይ ኦይከትኮ፥ ሄ ካይሶይ ሚሽያ ናምኡ ኩሸ ጭጎ።

⁸ ሽን ካይሶይ በንቶና እፅኮ፥ ኡራይ ፆሳ ስን ሺቅድ፥ ባ ሾሩዋ ሚሽያ፥ እ ኤኮናይሳ ኤርሳናዉ ጫቆ።

⁹ “ናምኡ አሳት ቦራ ጋሶን ዎይኮ ሀረ ጋሶን ዎይኮ ዶርሳ ጋሶን ዎይኮ ማኦ ጋሶን ዎይኮ ሀራ ይዳባ ጋሶን ሞተትድ፥ ፆሳ ስን ሺቅኮ፥ ፆሳይ እያ ቦላ ፕርድዳይስ ናምኡ ኩሸ ጭጎ።

¹⁰ “እስ አስ ሀረ ዎይኮ ቦር ዎይኮ ዶርሰ ዎይኮ ሀራ መሄ ሀዳራ እምዳሱዋን ሀይቅኮ ዎይኮ መእኮ ዎይኮ ኦንካ በኦና ካይሶተትኮ፥

¹¹ ሀዳራ ኤክዳይስ ባ ላግያ መህያ ካይሶቶናይሳ ጎዳ ስንን ጫቆ። ሄ መህያ ጎዳይ ጫቁዋ ኤኮ፤ መሄይ እያፐ ይዳ ኡራይ ጭጋናዉ ኮሸና።

¹² ሽን መሄይ ካይሶተትዳባ ግድኮ፥ መህያ ጎዳስ ጭጎ።

¹³ ሄ መህያ ዶእ ምዳባ ግድኮ፥ ማርካ ግዳናዳ ጋዉፃ ኤሆ፤ ዶእ ምዳባ ግድኮ እያዉ ጭጎፎ።

¹⁴ “አስ ባ ሾሩዋፐ መሄ ዎስ ኤክኮ እያ ጎዳይ ባይና በሳን ሄ መሄይ ደሸትኮ ዎይኮ ሀይቅኮ፥ ሄ መህያስ ጭጋ እሞ።

¹⁵ ሽን እያ ጎዳይ እያራ ደእሽን ሄስ ሀንዳባ ግድኮ አጫ ቃንፆፎ። ሀሸ ኤክዳባ ግድኮ፥ ሄ ሀሸ ሚሸይ አጮ ጋተ ግዶ።

ዱሳ ዎጋታ

¹⁶ “እስ አስ እስ ጌላእዉ ጭምድ፥ ኢራ ዝንኤትያባ ግድኮ፥ እዉ አጫ እምድ፥ ባዉ ማቾ ኦ።

¹⁷ እ አዋይ እዮ እያዉ እማናዉ ኮዮና እፅኮ፥ ጌላኦ ኤክያ ኡራይ አጫ እምያ ሚሸ መላ እ አዋስ እምድ አጮ።

¹⁸ “ብታ ብትያ ማጫስ ሀይቆ።

¹⁹ “መሄራ ቱንያ ኦንካ ሀይቆ።

²⁰ “ፆሳፈ ሀራ ጎዳታስ ያርሽያ ኦንካ ሀይቆ።

²¹ ህንተ ግብፀ ቢታን በተ አስ ግድድ፥ ደእዳ ግሾ፥ በተ አስ ቆሆፕተ ዎይኮ ኡንኤፍተ።

²² አምኤታነ ይኦታ ኡንኤፍተ።

²³ ህንተ ኤንታ ኡንኤኮ፥ ኤንቲ ታኮ ዋሳና፤

²⁴ ታኒ ኤንታ ዋሱዋ ስአና። ሄ ዎደ ታ ህንተ ቦላ ሀንቀታዳ ህንተና ኦላን ዉርሳና። ህንተ ማቸት አምኦ፥ ህንተ ናይትካ አዉ ባይናይሳታ ግዳና።

²⁵ “ህንተ ግዶን ደእያ ማንቆ ግድዳ ታ አሳፐ ኦደስካ ሚሸ ታልእኮ፥ የሎን ታልእያ አሳዳ የሎ ኦይቾፍተ።

²⁶ ኔኒ እስባ ግሾ፥ እያ ማኡዋ ኦይክዳ አስ ደእኮ፥ አው ዉሎና ደእሽን እያ ማኡዋ ዛራ።

²⁷ እ ማእድ አቀይ እ ፃላላ። እ ሀራ አይ ማእድ አቃናዉ ዳንዳኢ? ታኒ ቃትያ ፆሲ ግድያ ግሾ፥ እ ታኮ ዋስያ ዎደ ስአና።

²⁸ “ፆሳ ቦላ ጫሻ ቃላ ሃሳዮፓ፥ ዎይኮ ነ ደርያ አይሰይሳ ባዶፋ።

²⁹ ነ ካፈ፥ ነ ዎይነ ኡሻፈነ ነ ሻማሆ ዛይትያፐ ታዉ ያርሾ ያርሻ። “ባይራ ግድድ የለትዳ አደ ናኣ ታዉ እማ።

³⁰ ነ ሚዛፐነ ነ ዶርሳፈ ባይራ የለትዳይሳ ታዉ እማ። ኤንቲ ላፑን ጋላስ ጋካናዉ፥ ባንታ አየታራ ጋምኦ፤ ሆስፑን ጋላሳን ኤንታ ታዉ እማ።

³¹ “ህንተ ታዉ ጌሻ አስ ግዳናዉ ኮሼስ። ሄሳ ግሾ፥ ዶእ መንድ ዎዳ መሄ አሾ ሞፕተ፤ ሄሳ ካናስ የግተ።”