Kessa 14 - ጌሻ ማፃፋ

ዞኦ አባ ፕነ

¹ ሄሳፈ ጉየ፥ ጎዳይ ሙሰኮ፥

² “ኤንቲ ጉየ ስሚድ ምግዶላፐነ ዞኦ አባፈ ግዶን፥ ፕሀህሮታ ስንን፥ ባኣል-ዛፎና ማታን ኡታና መላ ኦዳ።

³ ካዎይ፥ ‘እስራኤለት መላ ቢታ ከያናዉ ኦገ ይድ ጮ ቶይላቶሶና’ ያግድ ቆፓና።

⁴ ታኒ ካዉዋ ዎዛና ሙምሳና፤ እ ኤንታ ጎዳና። ታኒ ካዋነ እያ ኦላንቾታ ኡባ ፆናዳ ቦንቸታና። ሄ ዎደ ግብፀት ታኒ ጎዳ ግደይሳ ኤራና” ያግስ። ሄሳ ግሾ እስራኤለት እ ኦድዳይሳዳ ኦዶሶና።

⁵ አሳይ ከስ ኤክዳይሳ ግብፀ ካዎይ ስእድ፥ እያራነ እያ ሞርናታራ ባንታ ቆፋ ላምድ፥ “ኑኒ አይስ ሄሳ ኦዶ? ኑኒ እስራኤለታ የድድ፥ ኑና ሀጋዝያ አስ አይስ ያነ” ያግዶሶና።

⁶ ሄሳ ግሾ እ ባ ፓራ ጋርያ ኮርድ፥ ባ ኦላንቾታ ኤክድ ደንድስ።

⁷ እ ኡሱፑን ፄቱ ዶረትዳ ፓራ ጋረታነ ግብፀ ቢታን ደእያ ሀራ ጋረታ ኡባ ኤንታ ሀላቃታራ ኤክድ ብስ።

⁸ ጎዳይ ግብፀ ቢታ ካዉዋ ዎዛና ሙምስዳ ግሾ ያሽ ባይና ከሳ ቦላ ደእያ እስራኤለ አሳ የደስ።

⁹ ግብፀ ካዉዋ ፓራት፥ ፓራ ጋረትነ ኦላንቾት እስራኤለታ ካልድ ብድ፥ አባ ዶናን ባኣል-ዛፎናነ ፕሀህሮታ ማታን ኤንቲ ኡትዳሽን ደምዶሶና።

¹⁰ ካዎይ ባ ኦላንቾታራ ይሽን እስራኤለት ደምድ ያይዶሶና፤ ባንታና ማዳና መላ ጎዳኮ ዋስዶሶና።

¹¹ ኤንቲ ሙሰኮ፥ “ግብፀ ቢታን ኑስ ዱፎይ ይዴ? ኑኒ መላ ቢታ ሀይቃና መላ ኑና ከስዳይ ሄሳሴ? ኑና ግብፀፈ አይስ ኤሀዲ?

¹² ግብፀን ደእሸ ሀይስ ሀናናይሳ ኤርድ፥ ‘ኑና አጋ ኑኒ ግብፀታስ ሃረታና’ ያግድ ነዉ ኦድቦኮ? መላ ቢታን ሀይቃናፐ ኤንታዉ ሃረተይስ ኑስ ሎኦሽን” ያግዶሶና።

¹³ ሽን ሙሰይ ዛሪድ፥ “ያዮፍተ፤ ምንድ ኤቅተ። ጎዳይ ሀች ህንተና አሽያ አሹዋ ህንተ በአና። ሀች ህንተ በእያ ግብፀታ ዛር በኤከታ።

¹⁴ ህንተ ስእ ጊተ፤ ጎዳይ ህንተ ግሾ ኦለታና” ያግስ።

¹⁵ ጎዳይ ሙሰኮ፥ “ኔኒ አይስ ታኮ ዋሳይ? እስራኤለት ስን ሄመታና መላ ኦዳ።

¹⁶ ነ ፃምአ አባ ቦላ ደን፤ ሃይ ሻከታና። እስራኤለት መላ ቢታራ አባ ፕንድ ባና።

¹⁷ ታኒ ግብፀታ ዎዛና ሙምሳና፤ ኤንቲ ህንተ ጌዶ ካልድ አባን ገላና። ታኒ ካዉዋ፥ እያ ኦላንቾታ፥ እያ ፓራ ጋርያነ እያ ፓራ ጋርያ ላገይሳታ ፆናዳ ቦንቸታና።

¹⁸ ታ ኤንታ ፆንዳ ዎደ፥ ታኒ ጎዳ ግደይሳ ግብፀት ኤራና” ያግስ።

¹⁹ ፆሳ ኪታንቾይ፥ እስራኤለ ኦላንቾታፐ ስንራ ሄመተይስ ኤንታፈ ጉየ አድ ሄመትስ። ሻራ ቱሳይ ኤንታ ስንፈ ጉየ ባጋ አድ፥

²⁰ ግብፀታስነ እስራኤለታስ ግዶን ኤቅስ። ሄ ሻራይ ግብፀታስ ምስድ፥ እስራኤለታስ ፖእስስ። ያትን ቃማ ኩመ ግብፀት እስራኤለታኮ ሺቅቦኮና።

²¹ ሙሰይ አባ ቦላ ባ ኩሽያ ምጭስ። ጎዳይ ሄ ቃማ ዎልቃማ ዶሎሀ ጫርኮ የድድ መላ ቢት በንታና ጋሶ አባ ሾጭስ። ሃይ ሻከትስ።

²² ሃይ ሻከትድ ናምኡ ባጋን ጎዳዳ ኤቅን፥ እስራኤለት መላ ቢታራ ሄመትድ ፕንዶሶና።

²³ ግብፀ ካዉዋ ፓራት፥ እያ ፓራ ጋረትነ እያ ፓራ ጋርያ ላገይሳት ኤንታና ካልድ፥ አባን ገልዶሶና።

²⁴ ሳእ ዎንታና ሀንሽን ጎዳይ ታማነ ሻራ ቱሳን ግድድ ግብፀ ኦላንቾታ ዱገ ፄልድ፥ ኤንታዉ ሀናናባ ይስስ።

²⁵ ፓራ ጋረታ ገርቶይ ገንደረቶና መላ ጎዳይ ኤንታ ፓራ ጋረታ ገርቱዋ ሳአራ ኦይስ። ግብፀት፥ “ጎዳይ እስራኤለታ ማድድ ኑና ኦልያ ግሾ፥ ኑኒ ኤንታ አግድ ባቃቶስ” ያግዶሶና።

²⁶ ጎዳይ ሙሰኮ፥ “ሃይ ግብፀታ ቦላ፥ ኤንታ ፓራ ጋረታ ቦላነ ኤንታ ፓራ ጋርያ ላገይሳታ ቦላ ጉየ ስማና መላ ነ ኩሽያ አባ ቦላ ምጫ” ያግስ።

²⁷ ሙሰይ ባ ኩሽያ አባ ቦላ ምጭን፥ ሳእ ዎንትያ ዎደ አባይ ባ ካሰ በሳ ጉየ ስምስ። ግብፀት ባቃታናዉ ኮይዶሶና፥ ሽን ጎዳይ ኤንታ አባን የግስ።

²⁸ ሃይ ጉየ ስሚድ፥ እስራኤለታ ካልድ አባን ገልዳ ፓራ ጋረታ፥ ፓራ ጋረታ ላገይሳታነ ግብፀ ኦላንቾታ ምትስ። ኤንታፈ እሶይካ አትቤና።

²⁹ ሽን እስራኤለት አባ ግዶራ መላ ቢታራ ሄመትድ፥ ሃይ ሻከትድ ጎዳዳ ኤቅዳሽን ፕንዶሶና።

³⁰ ጎዳይ ሄ ጋላስ እስራኤለ አሳ ግብፀታ ኩሸፐ አሽስ። እስራኤለት ሀይቅድ ዝንእዳ ግብፀታ አባ ዶናን በእዶሶና።

³¹ እስራኤለት ጎዳይ ግብፀታ ቦላ በስዳ ግታ ዎልቃ በእዳ ዎደ ጎዳ ያይዶሶና። ጎዳነ እያ አይልያ ሙሰ አማንዶሶና።