Kessa 11 - ጌሻ ማፃፋ

ባይራ ቦላ ይዳ ጋዶ

¹ ጎዳይ ሙሰኮ፥ “ታኒ ግብፀ ካዉዋ ቦላነ እያ አሳ ቦላ እስ ሀራ ጋዶ የዳና። ሄሳፈ ጉየ፥ እ ህንተና ከስ የዳና። እ ህንተና ኡባ ጎድድ ከሳና።

² እስራኤለ አሳይ፥ አደይነ ማጫስ ባንታ ሾሮታፐ ብራነ ዎርቃ አሌቆ ኦይቻና መላ ኤንታዉ ኦዳ” ያግስ።

³ ጎዳይ እስራኤለ አሳስ ግብፀታ ስንን ቴሞ እሚስ። ግብፀ ካዉዋ ሞርናትነ አሳይ ሙሰ ዳሮ ቦንቸትዳ አሳዳ ፄልዶሶና።

⁴ ሙሰይ ካዋኮ፥ “ጎዳይ ሀይሳዳ ያጌስ፤ ‘ቃማ ብላሄ ታኒ ግብፀ ቢታ ግዶራ ካንና።

⁵ ግብፀ ቢታን ደእያ ባይራ አደ ናእ ኡባይ፥ ካዋ አራታ ላታናዉ ደእያ ባይራ ናኣፐ ዶምድ፥ ዎፃን ጋጭያ ማጫ አይለ ባይራ ናአ ጋካናዉ፥ ባይራ የለትዳ መሄ ኡባይ ሀይቃና።

⁶ ግብፀ ቢታ ኡባን ሄሳፈ ካሰካ ስንፈካ ሀኖና ግታ ዬሆይ ዬኬታና።

⁷ ሽን እስራኤለ አሳ ቦላ ዎይኮ ኤንታ መህያ ቦላ ካንካ ቦጨና።’ ሄ ዎደ ታኒ ጎዳይ ግብፀታ ግዶንነ እስራኤለ ግዶን ዱማተ መይሳ ኔኒ ኤራና።

⁸ ነ ሞርናት ኡባይ ይድ ታ ስንን ጉፋናና። ታ አሳ ኤካዳ ሀ ቢታፈ ከያና መላ ኤንቲ ታና ዎሳና። ሄሳፈ ጉየ፥ ታኒ ባና” ያግስ። ሙሰይ ሸነን ፁገትድ ካዋ ስንፈ ከይድ ብስ።

⁹ ጎዳይ ሙሰስ ካሰ፥ “ግብፀ ቢታን ታኒ ማላልስያባ ዳርሳዳ ኦና ጋሶ ካዎይ ህንተና ስኤና” ያግድ ኦድ ዎስ።

¹⁰ ሙሰይነ አሮን ማላልስያባ ኡባ ካዋ ስንን ኦዶሶና። ሽን ጎዳይ ካዉዋ ዎዛና ሙምስዳ ግሾ፥ እስራኤለታ ባ ቢታፈ የዶና እፅስ።