አይሰይሳታ 9 - ጌሻ ማፃፋ

አብመለከ

¹ ገድዮና ናአይ፥ አብመለከይ ሴከማን ደእያ ባ አየ ዳቦታኮ ብድ፥ ኤንታነ ባ አየ ኮቻታ ሀይሳዳ ያግስ፤

² “ሴከማን ደእያ አሳ፥ ‘ገድዮና ላፑን ታሙ ናይት ኡባይ ህንተና ሃርኮ ሎኦዬ? ዎይኮ እስ አስ ሃርኮ ሎኦ?’ ያግድ ኦይችተ። ታኒ ህንተ አሾነ ህንተ መቀ ግደይሳ ዶጎፕተ” ያግስ።

³ እያ አየ ዳቦት ሀ ቃላ ኡባ እያ ግሾ ሴከማ አሳስ ኦድን፥ አብመለከይ ኤንታዉ ዳቦ ግድዳ ግሾ ሴከማ አሳይ እያ ካላናዉ ዶስዶሶና።

⁴ ኤንቲ ባኣል-ብሪታ ኤቃ ኬፈ ላፑን ታሙ ብራ ሳንትመ ኤክድ እያዉ እምዶሶና። አብመለከይ ሄ ብራን ኢታ አሳታነ ቦንቀይሳታ ሻምድ ባና ካላናዳ ኦስ።

⁵ ኦፍራን ደእያ ባ አዋ ሶ ብድ፥ ላፑን ታሙ ባ እሻታ ገድዮና ናይታ፥ እስ ሹቻ ቦላ ጎይርስ። ሽን ገድዮና ናአይ፥ ተሾይ፥ እዮአታም ቆሰትድ ሀይቆና አትስ።

⁶ ሄሳፈ ጉየ፥ ሴከማ አሳይነ ቤት-ምሎ አሳይ እስፈ ሺቅድ፥ ሴከማን ኤቃ ቱሳ ማታን ደእያ ጎይኖ ዎላኮ ብድ ያን አብመለከ ካዎዶሶና።

⁷ እዮአታም ሄሳ ስእዳ ዎደ ጋርዛና ደርያ ቦላ ከይድ ባ ቃላ ቁ ኦድ፥ “ህንተኖ ሴከማ አሳዉ፥ ፆሳይ ህንተና ስአና መላ ታ ኦደይሳ ስእተ።

⁸ እስ ጋላስ ምት ኡባይ ሺቅድ፥ ባንታ ቦላ ካዎ ካዎናዉ ብድ ሻማሆ፥ ‘ሃያ፥ ኑ ቦላ ካዎታ’ ያግዶሶና።

⁹ ሽን ሻማሆይ፥ ‘ፆሳታነ አሳታ ቦንችስያ ዛይተ እመይሳ አጋዳ ምታ ቦላ ካዎቶ?’ ያግድ ዛርስ።

¹⁰ “ያትን፥ ምት ባላሰ ም፥ ‘ሃያ፥ ኑ ቦላ ካዎታ’ ያግዶሶና።

¹¹ ሽን ባላሰይ፥ ‘ማልኦነ ሎኦ ግድዳ አይፈ እመይሳ አጋዳ ምታ ቦላ ካዎታናዉ ቦ?’ ያግድ ዛርስ።

¹² “ያትን፥ ምት ዎይነኮ፥ ‘ሃያ፥ ኑ ቦላ ካዎታ’ ያግዶሶና።

¹³ ሽን ዎይነይ፥ ‘ፆሳታነ አሳታ ኡፋይስያ ኡሻ እመይሳ አጋዳ ምታ ቦላ ካዎታናዉ ቦ?’ ያግድ ዛርስ።

¹⁴ “ያትን፥ ዉርሰን ምት ኡባይ ፁንዱቀኮ፥ ‘ሃያ፥ ኑ ቦላ ካዎታ’ ያግዶሶና።

¹⁵ ፁንዱቀይ፥ ‘ህንተ ቱማ ታና ህንተ ቦላ ካዎናዉ ኮይኮ፥ ሃ ይድ ታ ኩያን ሸምፕተ። ሄሳ ህንተ እፅኮ፥ ፁንዱቀ ታሽያፐ ታም ከይድ ልባኖሰ ዝጋ ሞ’ ያግስ።

¹⁶ “ህንተ አብመለከ ካዎዳይ ቱማተንነ ሱረተኔ? ገድዮን ህንተዉ ኦዳባ አኬክድ እያ ሶ አሳስ ሎኦ ኩሸ ዛርደቲ?

¹⁷ ታ አዋይ ህንተዉ ኦለትዳይሳ አኬክተ፤ ምድያመ አሳፐ ህንተና አሻና ያግድ፥ ባና ሀይቆስ አድ እሚስ።

¹⁸ ሽን ህንተ ሀች ታ አዋ ሶ አሳ ቦላ ደንድድ፥ እያ ላፑን ታሙ ናይታ እስ ሹቻ ቦላ ጎይርደታ። ገድዮና አይለፈ የለትዳ አብመለከይ ህንተዉ ዳቦ ግድዳ ግሾ ሴከማን ካዎደታ።

¹⁹ ሀእ ስሚድ ገድዮናስነ እያ ሶ አሳስ ህንተ ኦዳ ኦሶይ ቱማተንነ ሱረተን ግድኮ አብመለከራ ኡፋይትተ፤ እካ ህንተራ ኡፋይቶ።

²⁰ ሽን ሄስ ሀኖና እፅኮ አብመለከፐ ታም ከይድ ሴከማነ ቤት-ምሎ አሳ ሞ። ቃስ ሴከማ አሳፐነ ቤት-ምሎ አሳፐ ታም ከይድ አብመለከ ሞ” ያግስ።

²¹ እዮአታም ባ እሻ አብመለከስ ያይዳ ግሾ ባቃትድ ቤራ ብድ ያን ደእስ።

²² አብመለከይ እስራኤለ ቢታን ሄ ላይ ካዎትስ።

²³ ሄሳፈ ጉየ፥ ፆሳይ አብመለከ ግዶንነ ሴከማ አሳ ግዶን ኢታ አያና ኪትን ሴከማ አሳይ አብመለከ ቦላ ማካልዶሶና።

²⁴ ፆሳይ ሄሳ ኦዳይ፥ አብመለከይ ባ እሻታ ዎዳ ግሾነ ኤንታ ዎና መላ ሴከማ አሳይ እያ ምንዳ ግሾሳ።

²⁵ ሴከማ አሳይ ጉ አስ ዶርድ ደርያ ሁጵያን ኡትድ አብመለከ ቦላ ሞርከተን ደንዳና መላ ኦዶሶና። ኤንቲ ኦገራ አያ አሳ ኡባ ቦንቅዶሶና፤ አብመለከይ ሄሳ ስእስ።

²⁶ ሄ ዎደ ኤቤዳ ናአይ ጋል ባ እሻታራ ሴከማ ይን፥ ሴከማ አሳይ እያን አማነትዶሶና።

²⁷ ኡባይ ባንታ ጋደ ብድ ዎይነ ማፅዶሶና፤ ዎይንያ አግድ ግታ ግብራ ጊግስዶሶና። ባንታ ኤቃ ኬ ገልድ ያን ምሸነ ኡይሸ አብመለከ ጫይዶሶና።

²⁸ ኤቤዳ ናአይ ጋል፥ “ኑኒ ሴከማ አሳይ እያዉ ሃረታናዉ አብመለከይ ኦኔ? እ የሩባኣላ ናኣ ግደኔ? ዛቡል ሀ ካታማ ሃራና መላ አብመለከይ ሹምዳይሳ ግደኔ? ሄሳፈ ሴከማ ሼሽ ግድዳ ሀሞረ አሳስ ሃረታና።

²⁹ ሀ አሳ ካለይ ታና ግድያኮ አብመለከ ድጋናሽን። አብመለከ ፄጋዳ፥ ‘ነ ኦላንቾታ ዳርሳ ኤካዳ ኦለታናዉ ሃያ’ ያጋናሽን” ያግስ።

³⁰ ኤቤዳ ናአይ ጋል ግዳይሳ ካታማ ሃርያ ዛቡል ስእዳ ዎደ ዳሮ ይሎትስ።

³¹ ቆሳን አብመለከኮ አሰ ኪትድ፥ “ኤቤዳ ናአይ ጋልነ እያ እሻት ሴከማ ይድ ያን ደእያ አሳ ነ ቦላ ደንሶና።

³² ሄሳ ግሾ፥ ኔንነ ኔራ ደእያ አሳይ ቃማ ደንድድ እስ በሳን ዙግድ ናግተ።

³³ ዎንተ ጋላስ አው ዶልያ ዎደ ኤንቲ ቆፖና ካታማ ኦልተ። ጋልነ እያራ ደእያ አሳይ ህንተና ኦላናዉ ከይያ ዎደ ህንተ ኮይዳ መላ ኤንታ ቦላ ኦተ” ያግስ።

³⁴ አብመለከይነ እያራ ደእያ አሳ ኡባይ ቃማ ደንድድ ሴከማፐ ካረራ ኦይዱ ጩጋን ሻከትድ ዙግዶሶና።

³⁵ አብመለከይነ እያራ ደእያ አሳይ ኤቤዳ ናአይ ጋል ከይድ ካታማ ፐንግያን ኤቅዳይሳ በእድ ቆሰትዳ በሳፈ ከይዶሶና።

³⁶ ጋል አሳ በእዳ ዎደ ዛቡላኮ፥ “ሄኮ፥ አሳይ ደርያ ሁጵያፐ ዎስ” ያግስ። ዛቡል፥ “ሀይስ ደርያ ኤሾፐ አትሽን፥ አሰ ግደና” ያግድ ዛርስ።

³⁷ ጋል ዛሪድ፥ “ሄኮ፥ አሳይ ደርያስ ግዱዋ ኦይክድ ዎስ፤ ሀራ ጩግ ቃስ ማሮታ ዎላይ ደእያ ኦግያራ ዬስ” ያግስ።

³⁸ ዛቡል ጋላኮ፥ “ ‘ኑኒ እያዉ ሃረታናዉ አብመለከይ ኦኔ?’ ያግዳ ነ ዶናይ ሀእ አዉ ብዴ? ሀይሳቲ ኔኒ ካዳ አሳ ግዶኮናዬ? ሀእ ከያዳ ኤንታራ ኦለታ” ያግስ።

³⁹ ጋል ሴከማ አሳ ካለ ከይድ አብመለከራ ኦለትስ።

⁴⁰ አብመለከይ የደን ጋል ባቃትስ፤ ካታማ ፐንግያ ጋካናዉ ዳሮት ደሸትድ ኩንድዶሶና።

⁴¹ አብመለከይ አሩማን ደእን፥ ዛቡል ጋላነ እያ እሻታ ሴከማፐ የደድ ከስስ።

⁴² ዎንተ ጋላስ ሴከማ አሳይ ጎሻስ ብዳይሳ አብመለከይ ስእስ።

⁴³ እ ባ አሳ ኤክድ ሄ ጩጋን ሻክድ፥ እስ በሳን ዙግድ ናጋናዳ ኦስ። አሳይ ካታማፐ ከየይሳ በእዳ ዎደ ኤንታ ዎናዉ ቆሰትዳ በሳፈ ከይስ።

⁴⁴ አብመለከይነ እያራ ደእያ ጩጋይ ስን ዎፅ ብድ፥ ካታማ ፐንግያን ኤቅዶሶና። አትዳ ናምኡ ጩጋይ ጎሻን ደእያ አሳ ኦልድ ዎዶሶና።

⁴⁵ ጋላስ ኩመ አብመለከይ አሳራ ኦለትድ ኦይክዳፐ ጉየ ካታማን ደእያ አሳ ኡባ ዎስ፤ ካታማ ይስስ፤ ቢታ ቦላ ማፅነ ላልስ።

⁴⁶ ሴከማ አዱሳ ግምብያ ግዶን ደእያ አሳ ኡባይ ሄሳ ስእዳ ዎደ ባኣል-ባርታ ኤቃ ኬን ደእያ ጎንጎሉዋን ቆሰትዶሶና።

⁴⁷ አብመለከይ ኤንቲ ያን ሺቅዳይሳ፥

⁴⁸ ስእድ እነ እያራ ደእያ አሳ ኡባይ ሳልሞና ደርያ ከይዶሶና። አብመለከይ ካልታ ኤክድ ም ታሸ ቃንፅድ፥ ባ ሀሽያን ቶክስ። ባራ ደእያ አሳኮ፥ “ታኒ ኦሽን በእዳይሳዳ ህንተ ኤለስድ ኦተ” ያግስ።

⁴⁹ አሳ ኡባይ ም ታሸ ቃንፅ ኤክድ፥ አብመለከ ካልስ። ሄ ታሸታ ሳአ ኬ ቦላ ዶርድ አሳይ እያ ግዶን ደእሽን ታማ ኦይዶሶና። እያን ደእያ አሳ ኡባይ ሀይቅዶሶና። ሀይቅዳ አደይነ ማጫሳ ታይቦይ እስ ሙኩሉ ግዳና።

⁵⁰ አብመለከይ ተሜሳ ብድ ካታማ ተቅድ ኦይክስ።

⁵¹ ሄ ካታማ ግዶን እስ ምኖ አዱሳ ግምበይ ደኤስ። ካታማ አሳይ ማጭ፥ አደይ፥ ካለይሳትነ ሀራ አሳ ኡባይ አቶና ዎፅድ አዱሳ ግምብያ ግዶ ገልዶሶና። ፐንግያ ጎርድድ ግምብያ ሁጰ ከይዶሶና።

⁵² አብመለከይ ኦልሸ አዱሳ ግምብያ ጋክድ ታማን ፁጋናዉ ፐንግያኮ ሺቅስ።

⁵³ ሽን እስ ማጫስያ አብመለከ ሁጰን ዎፃ ማይደ ሆላዳ እያ ጉግያ ጳልቃ የጋሱ።

⁵⁴ እያ ኦላ ሚሽያ ቶክያ ናአተ ኤለስ ፄግድ፥ “አብመለከ ማጫስ ዎስ ጎናዳ ነ ማሻ ሾዳዳ ታና ዎ” ያግስ። ያግን ናአተይ ጫድን እ ሀይቅስ።

⁵⁵ እስራኤለ አሳ ኡባይ አብመለከይ ሀይቅዳይሳ በእድ ባ ሶ ሶ ብስ።

⁵⁶ አብመለከይ ላፑን ታሙ ባ እሻታ ዎድ፥ ባ አዋ ቦላ እ ኦዳ ጎምያ ፆሳይ እያ ቦላ ዛርስ።

⁵⁷ ፆሳይ ሴከማ አሳ ኢታተ ኡባ ኤንታ ቦላ ዛርስ። ሄሳዳ ሀንድ ገድዮና ናአይ እዮአታም ባድዳ ባደይ ኤንታ ጋክስ።