አይሰይሳታ 6 - ጌሻ ማፃፋ

ገድዮና

¹ እስራኤለ አሳይ ጎዳ ስንን ዛሪድ ኢታባ ኦዶሶና። ሄሳ ግሾ፥ ጎዳይ ኤንታ ምድያመ አሳስ አድ እምን ላፑን ላይ ኤንታ ሃርዶሶና።

² ምድያመ አሳይ እስራኤለ አሳ ኡንኤን፥ ኤንታፈ አታናዉ ደረ ቦላ፥ ጎንጎሎንነ ሆምኦን ባንታ ካ ቆስዶሶና።

³ እስራኤለ አሳይ ካ ዘርያ ዎደ ኡባን፥ ምድያመ አሳይ አማለቃ አሳራነ ዶሎሀ ባጋ አሳራ ይድ ኤንታ ኦሎሶና።

⁴ ኤንቲ ሄ ቢታን ዱንካንድ፥ ጋዛ ጋካናዉ፥ ቢታ ቦላ ዶልዳባ ኡባ ይሶሶና። ዶርሰ፥ መሄነ ሀረ ላግድ ኤፍያ ግሾ፥ እስራኤለ አሳስ አይባካ አሾኮና።

⁵ ባንታ መህያነ ባንታ ዱንካንያ ኤክድ፥ ቦለይ ያዳ ዳርድ ዮሶና። ኤንታነ ኤንታ ግማለታ ታይባናዉ ዳንዳኤተና፤ ኤንቲ ይሸ ቢታ ይሶሶና።

⁶ እስራኤለ አሳይ ምድያመታ ጋሶን ዳሮ መቶትዶሶና፤ ማደ ደማናዉ ጎዳኮ ዋስዶሶና።

⁷ ምድያመታ ጋሶን እስራኤለ አሳይ ጎዳኮ ዋስዳ ዎደ፥

⁸ ጎዳይ ኤንታዉ እስ ናበ ኪትን፥ ናበይ ኤንታኮ፥ “ጎዳይ እስራኤለ ፆሳይ ሀይሳዳ ያጌስ፤ ግብፀፈ፥ አይለተ ቢታፈ ታ ህንተና ከሳስ።

⁹ ታኒ ህንተና ግብፀ አሳ ኩሸፐነ ኡንኤያ አሳ ኡባ ኩሸፐ አሻስ። ህንተ ስንፈ ኡንኤያ አሳ ጎዳዳ ኤንታ ቢታ ህንተዉ እማስ።

¹⁰ ታኒ ህንተና፥ ‘ታኒ ጎዳ ህንተ ፆሳ፤ ህንተ ኤንታ ቢታ ላትዳ አሞረታ ፆሳታ ጎይኖፍተ’ ያጋስ። ሽን ህንተ ታ ቃላ ስኦና እፅደታ” ያግስ።

¹¹ ሄሳፈ ጉየ፥ ጎዳ ኪታንቾይ ኦፍራ ጌተትያ በሳን ደእያ አበዜራ አድያ እዮኣሳ ዎላ ጋርሳን ኡትስ። ሄ ዎደ እዮኣሳ ናአይ ገድዮን ምድያመ አሳፐ ቆሰተድ ዎይነ ጉምእያ በሳን ግስተ ቡኬስ።

¹² ያን ጎዳ ኪታንቾይ እያዉ ቆንጭድ፥ “ላ ነኖ፥ ምኖ ኦላንቻዉ፥ ጎዳይ ኔራ ደኤስ” ያግስ።

¹³ ገድዮን፥ “ታ ጎዳዉ፥ ጎዳይ ኑራ ደእያባ ግድኮ ሀ መቶ ኡባይ ኑና አይስ ጋክዴ? ኑ አዋት፥ ‘ጎዳይ ኑና ግብፀ ቢታፈ ከስስ’ ያግድ ኑስ ኦድዳ ማላልስያ እያ ኦሶት ኡባይ አዉን ደኢ? ሽን ሀእ ጎዳይ ኑና ኩመ አግስ፤ ምድያመ አሳስ አድ እሚስ” ያግስ።

¹⁴ ሄሳፈ ጉየ ጎዳይ እያኮ ስሚድ፥ “ነዉ ደእያ ሀ ዎልቃን ባዳ እስራኤለ አሳ ምድያመ ኩሸፐ አሻ። ነና ኪተይ ታና” ያግስ።

¹⁵ ገድዮን ዛሪድ፥ “አቤት ጎዳዉ፥ ታኒ እስራኤለ አሳ ዋታዳ አሾ? ታ ያራይ ምናሰ ኮቻ ኡባፈ አዳ ላፋ፤ ታኒ ታ አዋ ሶ አሳ ኡባፈ ጉ” ያግስ።

¹⁶ ጎዳይ፥ “ታኒ ኔራ ግዳና፤ እስ አስ ሾጭያ መላ ኔኒ ምድያመ አሳ ሾጫዳ ፆናና” ያግስ።

¹⁷ ገድዮን፥ “ኔኒ ታናን ኡፋይትያባ ግድኮ፥ ቱማ ታራ ኦደተይ ኔኒ ጎዳ ግድኮ፥ ነና ኤርስያ ማላ ታና በሳ።

¹⁸ ታኒ ጉየ ስማ ባዳ ታ ያርሹዋ ኤሀና ጋካናዉ ሀያና ሀይሳፈ ቦፓ” ያግስ። ጎዳይ፥ “ኔኒ ስማና ጋካናዉ ታኒ ሀይሳን ናጋና” ያግስ።

¹⁹ ገድዮን ሶ ገልድ፥ ኡርገ ዴሽ ሹክድ ካስ፤ ታሙ ክሎ ግራመ ግድያ ለ ኤክድ ኡይ ኡክስ። አሹዋ ጋይታን ዎድ፥ ጫምባ ሻተን ትግድ፥ ዎላ ጋርሳን ኡትዳ ጎዳ ኪታንቹዋስ ሺሽስ።

²⁰ ፆሳ ኪታንቾይ፥ “አሹዋነ ኡይ ሀ ሹቻ ቦላ ዎ፤ ጫምባ እያ ቦላ ትጋ” ያግስ። ገድዮን ኪተትዳይሳዳ ኦስ።

²¹ ጎዳ ኪታንቾይ ባ ኩሸን ኦይክዳ ፃምኣ ፄራን አሹዋነ ኡይ ቦችን ታም ሹቻ ግዶፈ ከይድ፥ አሹዋነ ኡይ ምስ። ሄሳፈ ጉየ፥ ጎዳ ኪታንቾይ እያ ስንፈ ጌምስ።

²² ገድዮን በእዳይ ጎዳ ኪታንቹዋ ግደይሳ አኬክዳ ዎደ፥ “ጎዳ ፆሳዉ ታና አየ! ታኒ ጎዳ ኪታንቹዋ ታ አይፈን በአስ” ያግስ።

²³ ሽን ጎዳይ፥ “ሳሮይ ነዉ ግዶ፤ ያዮፋ! ነ ሀይቃካ” ያግስ።

²⁴ ገድዮን ጎዳስ ያርሾ በሲ ያን ጊግስድ፥ “ጎዳይ ሳሮ ፆሲ” ያግድ ፄግስ። ሄ ያርሾ በሳይ አብኤዜራ ኮቻባ ግድዳ ኦፍራን ሀች ጋካናዉ ኤቅድ ደኤስ።

²⁵ ሄ ቃማ ጎዳይ ገድዮናኮ፥ “ነ አዋ ኮርማታፐ ላፑን ላይ ግድዳ ሎኦ ኮርማ ኤካ። ነ አዋይ ባኣለ ኤቃስ ያርሽያ በሳ ላላ፤ እያ ማታን ደእያ አሼራ ኤቃ ምስልያ መንረ የጋ።

²⁶ ሀ ዙማ ሁጰን ጎዳስ ነ ፆሳስ፥ ሹቻን ያርሾ በሲ ሎይዳ ጊግሳ። ሄሳፈ ጉየ፥ ኔኒ መንረዳ አሼራ ኤቃ ምስልያ ቀረ ኤዳ፥ ሄ ኮርማ ፁሳ ያርሾ ኦዳ ያርሻ” ያግስ።

²⁷ ገድዮን ባ ኦሳንቾታፐ ታማታ ኤክድ፥ ጎዳይ እያዉ ኦድዳይሳዳ ኦስ። ሽን እ ባ አዋ ሶ አሳስነ ካታማን ደእያ አሳስ ያይዳ ግሾ ጋላስ ኦናይሳ አግድ ቃማ ኦስ።

²⁸ ዎንታ ጉራ ካታማ አሳይ ደንድያ ዎደ ባኣለ ኤቃ ያርሾ በሳይ ላለትን፥ እያ ማታን ደእያ አሼራ ምስለይ መቅድ ዎዳይሳ በእዶሶና። ቃስ ሄ በሳን ያርሾ በሲ ጊግዳይሳነ እያ ቦላ ኮርማ ያርሽዳይሳ በእዶሶና።

²⁹ ኤንቲ እሶይ እሱዋ፥ “ላ ሀይሳ ኦዳይ ኦኔ?” ያግድ ኦይችዶሶና። ኤንቲ ሄሳ ፕልግድ በእዳ ዎደ ሄሳ ኦዳይ እዮኣሳ ናኣ ገድዮና ግደይሳ ኤርዶሶና።

³⁰ ሄሳፈ ጉየ፥ ካታማ አሳይ እዮኣሳኮ፥ “ባኣለ ያርሾ በሳ ላልዳ ግሾነ እያ ማታን ደእያ አሼራ ምስልያ መንረድ የግዳ ግሾ ነ ናኣ ሃ ከሳ፤ ኑ እያ ዎና” ያግዶሶና።

³¹ ሽን እዮኣስ ባ ቦላ ደንድዳ አሳኮ፥ “ህንተ ባኣለስ ሞተተቲ? ዎይኮ ህንተ እያ አሻናዉ ኮዬቲ? ህንተ ግዶፈ እያዉ ሞተትያ አስ ደእኮ፥ ሳእ ዎንታናዉ እ ሀይቆ። ባኣለይ ፆሰ ግድኮ ባ ያርሾ በሳ ላልዳይሳራ እ ባዉ ሞተቶ” ያግስ።

³² ሄ ጋላስ እዮኣስ፥ “ላለትዳይ እያ ያርሾ በሳ ግድያ ግሾ እያራ ባኣለይ ሞተቶ” ያግድ ገድዮና የሩባኣላ ግድ ሱንስ።

³³ ሄሳፈ ጉየ፥ ምድያመ፥ አማለቃነ ዶሎሀ ባጋ ቢታ አሳይ እስፈ ሺቅድ፥ ዮርዳኖሰ ሻፋ ፕንድ እዝራኤላ ዛንጋራን ዱንካንዶሶና።

³⁴ ጎዳ አያናይ ገድዮና ቦላ ዎን አብኤዘራ ኮች ግድዳ አሳ ኡባይ ባና ካላና መላ ኤንታ ፄጋናዉ ሞይዘ ፑንስ።

³⁵ ምናሰ ኮቻ ኡባስ ኪታ የድድ፥ ባና ካላና መላ ኤንታ ፄግስስ። ቃስ አሴራ፥ ዛብሎናነ ንፍታለመ ኮቻታስ ኪታ የድን፥ ኤንቲ እያራ ኦላስ ባናዉ ከይዶሶና።

³⁶ ገድዮን ፆሳኮ፥ “ነ ታዉ ቃላ ገልዳይሳዳ እስራኤለ አሳ አሻናዉ ታና ዶርዳባ ግድኮ፥

³⁷ ሄኮ፥ ታኒ ግስተ ቡክያ ዉዱማን ፓደትዳ ዶርሰ እክሰ ዎና። ሀራ ቢታ ኡባይ መላ ግድድ ሄ እክስያ ቦላ ፃላላ አክ ዎኮ ነ ኦድዳይሳዳ እስራኤለ አሳ ታ ኩሸን አሻናይሳ ታ ኤራና” ያግስ።

³⁸ እ ግዳይሳዳ ሀንስ። ዎንተ ጋላስ ዎንታ ጉራ ደንድድ፥ ዶርሳ እክስያ ጉምእዳ ዎደ እስ ፃሮ ግድያ ሃ እያፐ ከይስ።

³⁹ ቃስ ገድዮን፥ “ሀያና ሀንቀቶፋ፤ ታኒ ነና ጉጃዳካ ሀራ ኦይሾ ኦይቻና። ዶርሳ እክስያ ቦላ ሀራ ማላ በሳና መላ ኦይቻይስ። ሀእ ዶርሳ እክሰይ መላ ግድን ዩሹዋን ደእያ ቢታይ አካትድ ላካናዳ ኦ” ያግስ።

⁴⁰ ሄ ቃማ ፆሳይ ሄ ማላ ኦስ። ዎንተ ጋላስ ዶርሳ እክሰይ መላ ግድን ቢታ ኡባይ አካትድ ላክስ።