አይሰይሳታ 4 - ጌሻ ማፃፋ

ድቦራነ ባራቃ

¹ ናኦድ ሀይቅዳፐ ጉየ እስራኤለ አሳይ ጎዳ ስንን ዛሪድ ኢታባ ኦዶሶና።

² ሄሳ ግሾ፥ ጎዳይ ሀፆራ ካታማን ደእያ ካናነ ካዋ እያብሳስ ኤንታ አድ እሚስ። እያ ቶራ ሞጮናይ ሀሮሴት ሀጎይማ ካታማን ደእያ ስሳራ።

³ እያብሳስ ኡዱፉን ፄቱ ብራታ ፓራ ጋረት ደእያ ግሾነ እ እስራኤለ አሳ ቃይ ባይና ላታሙ ላይ ኡንኤዳ ግሾ ኤንቲ ማዶ ደማናዉ ጎዳኮ ዋስዶሶና።

⁴ ሄ ዎደ ላፍዶታ ማችያ፥ ናብያ ድቦራ እስራኤለ አሳ ካለዉስ።

⁵ ድቦራ ደረይ ዳርያ ኤፍሬማ ቢታን፥ ራማፐነ ቤተለፐ ግዶን ደእያ ድቦራ ዛምባ ጋርሳን ኡታዳ ፕርዳዉሱ። እስራኤለ አሳይ ፕርዳ ደማናዉ ኢኮ ዮሶና።

⁶ እስ ጋላስ ድቦራ አብኖማ ናኣ ባራቃ ንፍታለመ ቢታን ደእያ ቃደሳፐ ፄግሳዳ፥ “ጎዳይ እስራኤለ ፆሳይ ነና ሀይሳዳ ያግድ ኪትስ፤ ‘ንፍታለመነ ዛብሎና ዛርያፐ ታሙ ሙኩሉ አሳ ኤካዳ ታቦረ ዙማ ቦላ ከያ።

⁷ ታኒ ያብና ቶራ ሞጮናታ ስሳር ፓራ ጋረታነ ኦላንቾታ ኤክድ፥ ቅሶና ሻፋን ነና ኦላናዉ ያና መላ ኦና። ያን ታኒ ነዉ እያ አዳ እማና’ ያጌስ” ያጋሱ።

⁸ ባራቅ፥ “ኔኒ ታራ ቢኮ ታኒ ባና፤ ሽን ኔኒ ታራ ቦና እፅኮ ታኒ ቢከ” ያግስ።

⁹ እያ ዛራዳ፥ “ኤሮ፥ ታኒ ኔራ ባና፤ ሽን ጎዳይ ስሳራ ማጫሳ ኩሸን አድ እማና ግሾ ታ ቡሳይ ነዉ ቦንቾ ግደና” ያጋሱ። ሄሳ ግሾ ድቦራ ደንዳዳ፥ ባራቃራ ቃደሳ ባሱ።

¹⁰ ባራቅ ንፍታለመነ ዛብሎና ኮቻታ ቃደሳ ፄግን፥ ታሙ ሙኩሉ አስ እያ ካልድ ከይስ፤ ድቦራካ እያራ ባሱ።

¹¹ ሄ ዎደ ቄና አስ ግድዳ ሄቤር፥ ሙሰ ቦሎይ፥ ሆባባ ያራይ ሀራ ቄናታፐ ሻከትድ ቃደሳ ማታን ዘናንመን ደእያ ዎላ ማታን ባ ዱንካንያ ቶክስ።

¹² አብኖማ ናአይ ባራቅ ታቦረ ዙማ ብዳይሳ ስሳር ስእዳ ዎደ፥

¹³ ኡዱፉን ፄቱ ብራታ ፓራ ጋረታነ ባራ ደእያ አሳ ኡባ ፄግስድ፥ ሀሮሴት-ሀጎይማፐ ቅሶና ሻፋ ሺሽስ።

¹⁴ ያትን ድቦር ባራቃኮ፥ “ሀች ጎዳይ ስሳራ ነ ኩሸን አድ እምያ ጋላስ ግድያ ግሾ ደንዳ። ሄኮ፥ ጎዳይ ነዉ ስን አስ” ያጋሱ። ባራቅ ታሙ ሙኩሉ ኦላንቾታ ካለድ፥ ታቦረ ዙማፐ ዎስ።

¹⁵ ጎዳይ ስሳራ፥ እያ ፓራ ጋረታነ እያ ኦላንቾታ ኡባ ባራቃ ማሻስ አድ እሚስ። ያትን፥ ስሳር ባ ፓራ ጋርያፐ ዎድ ቶሆን ባቃትስ።

¹⁶ ባራቅ ፓራ ጋረታነ ኦላንቾታ ሀሮሴት-ሀጎይማ ጋካናዉ የደስ። ስሳራ ኦላንቾት ኡባይ ማሻን ሀይቅዶሶና፤ እስ አስካ አትቤና።

¹⁷ ሄ ዎደ ሀፆራ ካዎይ ያብን ሄቤራ ኬ አሳራ ሳሮ ደኤስ። ሄሳ ግሾ፥ ስሳር ቶሆን ባቃትድ፥ ቄና አስ ግድዳ ሄቤራ ማቸ ያኤል ዱንካንያ ጋክስ።

¹⁸ ያኤላ ስሳራ ሞካናዉ ከያዳ፥ “ታ ጎዳዉ፥ ገላ፤ ሃ ገላ፤ ያዮፋ” ያጋሱ። እ ዱንካንያ ግዶ ኢኮ ገልን እያ አፍላራ ካማስ።

¹⁹ ስሳር፥ “ታና ሳሜስ፤ ሃ ታና ኡሻርክ” ያግስ። እያ ማ ኦጎሮ ዶያዳ ኡሻሱ፤ ያታዳ ዛራዳ ካማሱ።

²⁰ ሄሳፈ ጉየ፥ እ፥ “ዱንካንያ ፐንገን ኤቃ። አይ አስካ ይድ፥ ‘ሀይሳን አስ ደኢ?’ ያግድ ኦይችኮ፥ ‘ባዋ’ ያጋ” ያግስ።

²¹ ስሳር ዳሮ ዳቡርዳ ግሾ ስኮ ሀይቅ አግስ። ሄቤራ ማችያ ያኤላ ናርቃነ ዱንካነ ሸ ኤካዳ፥ ሎዳራ እያኮ ሺቃዳ ሽያ ሀይ ካረን ሻዳ፥ ሳአራ ኦይን ስሳር ሀይቅስ።

²² ባራቅ ስሳራ ኮይሸ ይን፥ ያኤላ እያ ሞካናዉ ካረ ከያዳ፥ “ሃያ፤ ነ ኮይያ አድያ ታኒ ነና በሳና” ያጋሱ። ሄሳ ግሾ፥ ኢራ ዱንካንያ ግዶ ገልድ፥ ስሳራ ሀይ ካረን ሸይ ገልን እያ አሀይ ሳአን ዝንእዳይሳ በእስ።

²³ ሄ ጋላስ ፆሳይ እስራኤለ አሳይ ካናነ ካዋ ያብና ፆናና መላ ኦስ።

²⁴ ያብና ካዋ ይሳና ጋካናዉ እስራኤለ አሳይ እያ ቦላ ምን ምን ብስ።