አይሰይሳታ 3 - ጌሻ ማፃፋ

¹ ካናነን ኦላ ሜዘትቦና እስራኤለ አሳ ፓጫናዉ ጎዳይ ካናነን አሽዳ አሳይ ሀይሳታ።

² እ ሄሳ ኦዳይ ሀይሳፈ ካሰ ኦላ ሜዘትቦና እስራኤለ የለተ ኦላ ሂላ ታማርሳናሳ።

³ ሄሳትካ እቻሹ ፍልስፄመ ሀላቃታ፥ ካናነታ፥ ስዶናታነ ባኣል-አርሞና ዙማፐ ዶምድ ሀማታ ጋካናዉ ልባኖሰ ዙማ ቦላ ደእያ ህወታ።

⁴ ጎዳይ ሙሰ ባጋራ ካሰ እስራኤለ ማይዛታስ እምዳ ኪታ ኤንቲ ኪተትያኮነ ኪተቶናኮ ፓጫናዉ ኤንታ ከሶና አግስ።

⁵ ያትን፥ እስራኤለ አሳይ ካናነታራ፥ ህተታራ፥ አሞረታራ፥ ፓርዘታራ፥ ህወታራነ ያቡሰታራ እስፈ ደእዶሶና።

⁶ ኤንታ ማጫ ናይታ ባንታዉ ኤክዶሶና፤ ባንታ ማጫ ናይታ ኤንታ አደ ናይታስ እምዶሶና። ያትድ ኤንታ ፆሳታ ጎይንዶሶና።

ጎቶንያላ

⁷ እስራኤለ አሳይ ጎዳ ስንን ኢታባ ኦዶሶና። ኤንቲ ጎዳ ባንታ ፆሳ ዶግድ፥ ባኣለነ አሼራ ጌተትያ ፆሳታ ጎይንዶሶና።

⁸ ሄሳ ግሾ፥ ጎዳ ሀንቆይ እስራኤለ አሳ ቦላ ኤፅስ። ጎዳይ ማሰጰፆመ ካዋ ኩሻን-ርሻታይም ኤንታ ሃራና መላ አድ እምን፥ ኤንቲ እያዉ ሆስፑን ላይ ሃረትዶሶና።

⁹ ሽን እስራኤለ አሳይ ጎዳኮ ዋስዳ ዎደ ኤንታ አሽያ፥ ካለባ ካሎ እሻ ቃናዘ ናኣ ጎቶንያላ ደንስ።

¹⁰ ጎዳ አያናይ እያ ቦላ ዎን፥ እ እስራኤለ ቦላ ፕርደይሳ ግድስ። እ ኦላስ ከይዳ ዎደ ጎዳይ ማሰጰፆመ ካዋ ኩሻን-ርሻታይማ እያዉ አድ እምን ፆንስ።

¹¹ ያትን፥ ቢታይ ኦይታሙ ላይ ዎፑ ግድ ደእስ። ሄሳፈ ጉየ፥ ቃናዘ ናአይ ጎቶንያል ሀይቅስ።

ናኦዳ

¹² እስራኤለ አሳይ ዛሪድ ጎዳ ስንን ኢታባ ኦዶሶና። ሄሳ ግሾ፥ ጎዳይ ሞአበ ካዎይ ኤግሎን እስራኤለ ቦላ ዎልቃታናዳ ኦስ።

¹³ ኤግሎን አሞነታነ አማለቃታ ሺሽድ እስራኤለ አሳ ኦል ፆንድ፥ ዛምባ ካታማ እያርኮ ኦይክስ።

¹⁴ ያትን፥ እስራኤለ አሳይ ሞአበ ካዋ ኤግሎናስ ታማነ ሆስፑን ላይ ሃረትዶሶና።

¹⁵ ሽን እስራኤለ አሳይ ጎዳኮ ዋስዳ ዎደ ኤንታ አሽያ፥ ብንያመ ኮቸ ግድዳ ጌራ ናኣ ናኦዳ፥ ሀድርሳ ኩሸን ኦይሳ ደንስ። እስራኤለ አሳይ ናኦዳ ሞአበ ካዋ ኤግሎናኮ ጊራራ ኪትስ።

¹⁶ ናኦድ ናምኡ ባጋራ ቃራትዳ እስ ዋ ማሸ ጊግስድ ኡሻቻ ባጋን ባ ማኡዋ ጋርሳን ዳንጭስ።

¹⁷ ሄሳፈ ጉየ፥ ዳሮ ኦርደ ግድዳ ሞአበ ካዋ ኤግሎናስ ጊራ ኤፍድ እሚስ።

¹⁸ ናኦድ ጊራ ካዋስ እምዳፐ ጉየ፥ ጊራ ቶክድ ብዳ አሳ ሞይዝስ።

¹⁹ ሽን ናኦድ ጋልጋላ ማታን ደእያ ማሰትዳ ሹቻታ ማታፐ ኤግሎናኮ ጉየ ስም ብድ፥ “ካዋዉ፥ ታ ነዉ ኦድያ እስ ፁር ደኤስ” ያግስ። ካዎይ፥ “ስእ ጋ” ያግስ። እያ ናገይሳት ኡባይ ካረ ከይዶሶና።

²⁰ ሄ ዎደ ካዎይ ፖቅያ ቦላ እስ ክፍልያን ባርካ ኡትዳሽን፥ ናኦድ እያኮ ሺቅድ፥ “ፆሳይ ነዉ ኪትዳባይ ደኤስ” ያግን፥ ካዎይ ባ ኡትዳ በሳፈ ደንድ ኤቅስ።

²¹ ናኦድ ባ ሀድርሳ ኩሽያ የድድ፥ ኡሻቻ ባጋ ፄሳን ደእያ ማሻ ሾድድ፥ ካዋ ኡሉዋን ድርግም ኦስ።

²² ማሻ ቱይተይ አቶና ኡሎ ግዶ ገልድ፥ ዞኩዋራ ካን ከይስ። ሞይ ካምዳ ግሾ ናኦድ ማሻ ካዋ ኡሉዋፐ ሾድቦና።

²³ ሄሳፈ ጉየ፥ ናኦድ ካረ ከይድ፥ ክፍልያ ፐንግያ ጎርድድ እያ ቦላ ቁልፕስ።

²⁴ ናኦድ ብዳፐ ጉየ አይለት ይድ፥ ፐንገይ ጎርደትዳይሳ በእድ፥ “ካዎይ ግዶ ክፍልያን ሼሻስ ኡቶና አገና” ያግድ ቆፕዶሶና።

²⁵ ኤንቲ ሳለታና ጋካናዉ ናግዶሶና። ሽን ካዎይ ፐንግያ ዶዮና እፅን፥ ቁልፐ ኤክድ ፐንግያ ዶይድ፥ ባንታ ጎዳይ ሀይቅድ፥ ዉይገን ኩንድዳይሳ በእዶሶና።

²⁶ ኤንቲ ያን ኤቅድ ናግሽን፥ ናኦድ ከስ ኤክድ ኤቃ ሹቻታ ማታራ አድ ሳኢራ ባቃትስ።

²⁷ እ ብድ ደረይ ዳርያ ኤፍሬማ ቢታ ጋክዳ ዎደ እስራኤለ አሳይ ኦላስ ሺቃና መላ ሞይዘ ፑንን፥ አሳይ እያ ካልድ ዱገ ዎዶሶና።

²⁸ እ ኤንታኮ፥ “ታና ካልተ፤ ጎዳይ ህንተ ሞርከታ፥ ሞአበታ ህንተ ኩሸን አድ እሚስ” ያግስ። ኤንቲ እያ ካል ዎድ፥ ዮርዳኖሰ ሻፋ ፕንያ በሳ ኦይክዶሶና። ሞአበ አሳፐ እስ አስካ ያራ አና መላ ተቅዶሶና።

²⁹ ሄ ዎደ ሞአበ አሳፐ ታሙ ሙኩሉ ግድያ ዶረትዳ ምኖ ኦላንቾታ ዎዶሶና፤ እስ አስካ ከስ ኤክቤና።

³⁰ ሄ ጋላስ እስራኤለ አሳይ ሞአበ አሳ ፆንዶሶና። ቢታይ ሆስፑን ታሙ ላይ ዎፑ ግድ ደእስ።

ሳምጋራ

³¹ ናኦዳፐ ጉየ፥ አናታ ናአይ ሳምጋር ደንድድ፥ ፍልስፄመ አሳፐ ኡሱፑን ፄቱ አሳ ቦሩ ላግያ ብራታ ፃምአን ዎድ እስራኤለ አሳ አሽስ።