አይሰይሳታ 1 - ጌሻ ማፃፋ

አትዳ ቢታ ኦልድ ኦይከ

¹ እያሱይ ሀይቅዳፐ ጉየ እስራኤለ አሳይ፥ “ካናነ ቢታ ኦላናዉ ኑ ኮቻታፐ ኮይሮትድ ከያናይ ኦኔ?” ያግድ ጎዳ ኦይችዶሶና።

² ጎዳይ፥ “ይሁዳ ኮቻይ ኮይሮትድ ከዮ። ታኒ ቢታ እያ ኩሸን አዳ እማስ” ያግስ።

³ ይሁዳ አሳይ ባንታ እሻታ፥ ስሞና ኮቻታ፥ “ኑኒ ካናነታ ኦላና መላ ኑና ግሾን ጋክዳ ቢታ ኑራ የተ። ኑካ ህንተና ግሾን ጋክዳ ቢታ ህንተራ ባና” ያግስ። ስሞና ኮቻይ ይሁዳ ኮቻራ እስፈ ኦላናዉ ብስ።

⁴ ጎዳይ ካናነታነ ፓርዘታ ኤንታ ኩሸን አድ እምን፥ ቤዘቃ ካታማን ታሙ ሙኩሉ አሳ ዎዶሶና።

⁵ ቤዘቃ ካታማን ካዋ አዶን-ቤዘቃ ደምድ፥ እያራ ኦለትድ ካናነታነ ፓርዘታ ፆንዶሶና።

⁶ አዶን-ቤዘቅ ባቃትያ ዎደ ኤንቲ የደ ኦይክድ፥ እያ ኩሽያነ እያ ቶሁዋ ዎጋ ብራታ ቃንፅዶሶና።

⁷ አዶን-ቤዘቅ፥ “ኩሸነ ቶሆ ዎጋ ብራታ ታኒ ቃንፅዳ ላፑን ታሙ ካዎት ታ ጋይታፐ ዎዳ ቲፍያ ማፅድ ሞሶና። ታኒ ኤንታ ቦላ ኦዳይሳዳ ፆሳይ ታ ቦላ ኦስ” ያግስ። እያ የሩሳላመ ኤህን ያን ሀይቅስ።

⁸ ይሁዳ አሳይ የሩሳላመ ኦል ኦይክድ አሳ ማሻን ዎድ፥ ካታማ ታማን ፁግዶሶና።

⁹ ሄሳፈ ጉየ፥ ይሁዳ አሳይ ደረይ ዳርያ ቢታን፥ ነገባ መላ ቢታንነ ጋን ደእያ ካናነታ ኦላናዉ ብዶሶና።

¹⁰ ካሰ ቅርያት-አርባ ጌተትያ ከብሮና ካታማን ደእያ ካናነታ ኦልድ ሰሳያ፥ አክማናነ ታልማያ ጌተትያ ኮቻታ ፆንዶሶና።

¹¹ ያፐ ደንድድ ይሁዳ አሳይ ደብራ ካታማን ደእያ አሳ ኦላናዉ ብዶሶና። ደብራ ካታማይ ካሰ ቅርያት-ሰፈራ ጌተቴስ።

¹² ካለብ፥ “ቅርያት-ሰፈራ ኦልድ ኦይክያ ኡራስ ታኒ ታ ናእዉ አክሶ እማና” ያግስ።

¹³ ካለባ ካሎ እሻ ቃናዛ ናአይ ጎቶንያል ሄ ካታማ ኦልድ ኦይክን፥ ካለብ ባ ናእዉ አክሶ እያዉ እሚስ።

¹⁴ አክሳ ጎቶንያላ ገልያ ዎደ፥ እ አዋይ እዉ ጋደ እማናዳ ዎሳና መላ ጎቶንያል እዮ ዞርስ። እያ ባቁሎ ቦላፈ ዎሽን ካለብ ታ ናተ፥ “አይ ኮያይ?” ያግድ ኦይችስ።

¹⁵ እያ፥ “ታዉ ዎይቶ እማ። ኔኒ ካሰ ታዉ እምዳ ቢታይ ቃኤ ግድዳ ግሾ ሃ ፑልቶታ ታዉ እማርክ” ያጋሱ። ካለብ ቆሞ ፑልቱዋነ ጋርሳ ፑልቱዋ እዉ እሚስ።

¹⁶ ሙሰይ ቦሉዋ ቀናት ኮቻት ይሁዳ አሳራ ዛምባ ካታማ ጌተትያ እያርኮ ካታማፐ ደንድድ አራዳ ካታማፐ ዱገሀ ባጋራ፥ ነገባን ደእያ ይሁዳ መላ ቢታ ብድ ያን ደእያ አሳ ግዶን ኡትዶሶና።

¹⁷ ይሁዳ አሳይ ስሞና አሳራ እስፈ ብድ፥ ፃፋታ ካታማን ደእያ ካናነታ ፆንድ ካታማ ኩመ ይስድ፥ ሄ ካታማ ሆርማ ግድ ሱንዶሶና።

¹⁸ ይሁዳ አሳይ ጉጅድ ጋዛ፥ አስቃሎና፥ ኤቅሮናነ ኤንታ ዩሹዋን ደእያ ጉታታ ኦይክዶሶና።

¹⁹ ጎዳይ ይሁዳ አሳራ ደእያ ግሾ፥ ደረይ ዳርያ ቢታ ላትዶሶና። ሽን ደምባ ቢታን ደእያ አሳታስ ብራታፐ ኦሰትዳ ኦላ ፓራ ጋረት ደእያ ግሾ፥ ይሁዳ አሳይ ኤንታ ጎድድ ከሳናዉ ዳንዳእቦኮና።

²⁰ ሙሰይ ኪትዳይሳዳ፥ ከብሮና ካታማ ካለባስ እምን ካለብ አናቀ ኮቸ ግድዳ ሄ ኮቻታ ጎድድ ከስስ።

²¹ ሽን ብንያመ ኮቻት የሩሳላመን ደእያ ያቡሰታ ጎድድ ከስቦኮና። ሄ ዎደፐ ዶምን ያቡሰት ብንያመ ኮቻታራ እስፈ የሩሳላመን ደእዶሶና።

²² ቃስ ዮሰፋ ኮቻት ቤተለ ካታማ ኦልዶሶና፤ ፆሳይ ኤንታራ ደኤስ።

²³ ዮሰፋ ኮቻት ካሰ ሎዛ ጌተትያ ቤተለ ካታማ ዎችያ አሳታ ኪትዶሶና።

²⁴ ኤንቲ ካታማፐ ከይያ እስ አድያ ደምድ፥ “ካታማ ግዶ ዋንድ ገላናዉ ዳንዳኤትያኮ ኑና በሳ፤ ኑኒ ነዉ ኬሀና” ያግዶሶና።

²⁵ እ ኤንታ በስን ካታማን ደእያ አሳ ማሻን ቡዶሶና፤ ሽን ሄ አድያነ እያ ሶ አሳ ኡባ አሽዶሶና።

²⁶ ጉይፐ ሄ አደይ ህተታ ቢታ ብድ፥ ያን ካታማ ኬፅድ ሎዛ ግድ ሱንስ። ሀች ጋካናዉ ሄ ካታማይ ሄ ሱንን ፄገቴስ።

²⁷ ምናሰ ኮቻት ቤት-ሳና፥ ታናካ፥ ዶራ፥ ይብላማ ማግዶነ ኤንታ ዩሹዋን ደእያ ጉታታን ደእያ አሳታ ጎድድ ከስቦኮና። ያትን፥ ካናነት ያን ዱሱ ኦይክዶሶና።

²⁸ እስራኤለ አሳይ ምንዳ ዎደ ካናነታ ባንታዉ ዎልቃን ኦስስዶሶና፤ ሽን ኤንታ ኩመ ቢታፈ ከስድ ጎድቦኮና።

²⁹ ኤፍሬማ ኮቻትካ ገዘራ ካታማን ደእያ ካናነታ ጎድድ ከስቦኮና፤ ያትን፥ ካናነት ያን ኤንታራ ደእዶሶና።

³⁰ ዛብሎና ኮቻት ቅትሮናንነ ናህላላን ደእያ አሳታ ጎድድ ከስቦኮና፤ ያትን፥ ካናነት ያን ኤንታራ እስፈ ደእዶሶና። ሽን ዛብሎና ኮቻት ኤንታ ባንታዉ ዎልቃን ኦስስዳሶና።

³¹ አሴራ ኮቻት አኮን፥ ስዶናን፥ አህላባን፥ አክዚባን፥ ሄልባን፥ አፌቃንነ ረሆባን ደእያ አሳታ ጎድ ከስቦኮና።

³² ካናነት ከዮና አትዳ ግሾ አሴራ ኮቻት ኤንታራ ያን እስፈ ደእዶሶና።

³³ ንፍታለመ ኮቻት ቤት-ሳሜሳንነ ቤት-አናታን ደእያ አሳታ ጎድ ከስቦኮና፤ ሽን ካናነታራ ያን እስፈ ደእዶሶና። ቤት-ሳሜሳነ ቤት-አናታ አሳታ ባንታዉ ዎልቃን ኦስስዶሶና።

³⁴ አሞረት ዳነ ኮቻታ ደረይ ዳርያ ቢታ የደዶሶና፤ ኤንቲ ደምባ ቢታ ዎና መላ ተቅዶሶና።

³⁵ አሞረት ሄሬሳ ደርያን፥ ኤሎናንነ ሻአልብማን ዱሱ ኦይክዶሶና፤ ሽን ዮሰፋ ኮቻት ምን ምን ብድ ባንታዉ ዎልቃን ኦስስዶሶና።

³⁶ አሞረታ ቢታ ዛዋይ ሰላአ ማታን ደእያ አክራብማ ፑደ ከዬስ።