Izira 9 - ጌሻ ማፃፋ

በሶና ኤኮ-ገሎ ዎጋ ድጉዋ

¹ ሀ ኡባይ ሀንዳፐ ጉየ፥ ደርያ ካለይሳት ታኮ ይድ፥ ሀይሳዳ ያግዶሶና፤ “እስራኤለ አሳይ፥ ሀር አቶሽን፥ ካህነት፥ ሌወት፥ ባንታ ሄራን ደእያ፥ ካናነታ፥ ህተታ፥ ፓርዘታ፥ ያቡሰታ፥ አሞነታ፥ ሞአበታ፥ ግብፀታነ አሞረታ ቱናፐ ባንታና ሻክቦኮና።

² ባንታዉነ ባንታ ናይታስ አይሁደ ግዶና ማጫ ናይታፐ ማቾ ኤክዶሶና፤ ሄሳ ጋሶን ጌሻ ዘረ አይሁደ ግዶና አሳራ ዋላክዶሶና። ሀ ባላን ኮይሮ ግድዳይ ካለይሳታነ ሀላቃታ” ያግዶሶና።

³ ታኒ ሀ ኦዳ ስእዳ ዎደ ታ ማኡዋነ ታ ቃምስያ ዳካስ፤ ታ ሁጵያነ ታ ቡቻ ስካስ፤ ዳሮ ዳጋማዳ ኡታ አጋስ።

⁴ ድኦፐ ስምዳ አሳይ ኦዳ ናጋራ ግሾ፥ እስራኤለ ፆሳይ ኦድዳ ቃላስ ያይዳ አሳ ኡባይ ታኒ ደእያ በሳ ታኮ ሺቅዶሶና። ኦማርሳ ያርሾ ያርሽያ ዎደ ጋካናዉ ዳጋማዳ ኡትዳ በሳፈ ደንዳብከ።

⁵ ሽን ኦማርሳ ያርሾይ ሺቅያ ዎደ፥ ታ ማኦይነ ታ ቃምሰይ ዳከትድ ደእሽን፥ ታኒ አዛናዳ ኡትዳ በሳፈ ደንዳስ። ጉልባታዳ ጎዳኮ፥ ታ ፆሳኮ፥ ታ ኩሽያ ደንዳ፥ ሀይሳዳ ያጋዳ ዎሳስ።

⁶ “አቤት ታ ፆሳዉ፥ ኑ ናጋራይ ዶረትድ ኑ ሁጵያፐ አዳ ግሾነ ኑ ናቆይ ሳሎ ጋክዳ ግሾ ታኒ ታ ሶምኡዋ ኔኮ ደንናዉ ያያይስነ ዬላታይስ።

⁷ ኑኒ ኑ ማይዛታ ዎደፐ ዶምን፥ ሀች ጋካናዉ፥ ነና ዳሮ ናቅዳ። ኑ ናጋራ ጋሶን ኑኒ፥ ኑ ካዎትነ ኑ ካህነት ሀእይሳዳ አላጋ ካዎታ ኩሸን ኩንድዳ፤ ማሻስ፥ ዶኦስ፥ ቦንቄስነ ዬላስ አድ እመትዳ።

⁸ “ሽን ሀእ ጎዳይ ኑ ፆሳይ ኑፐ ጉ አስ አሻናዉነ ባ ኬን ኑስ በሰ እማናዉ ኮይድ ጉ ዎደስ ማሮተ እሚስ። ሄሳ ግሾ ፆሳይ ኑ አይፊያ ዶይስ፤ ኑ አይለተን ደእሽን ጉ ዎደስ ሸምፖ እሚስ።

⁹ ኑኒ አይለ ግድኮካ፥ ኑ ፆሳይ ኑና አይለተን አግቤና፤ ኑ ደኡዋ ኦራስ። ኑ ፆሳ ኬ ኬፃና መላ፥ ላለትዳይሳ ኦራና መላነ ይሁዳንነ የሩሳላመን ሳሮ ዳና መላ ፋርሰ ካዎታ ስንን ኑስ ቴሞ እሚስ።

¹⁰ “ሽን ኑ ፆሳዉ፥ ሀእ ያትን፥ ኑኒ ዎይጋኔ? ሄኮ ሀእካ ነ ኪታ ቶችዳ።

¹¹ ኑ ቶችዳይ ነ አይለ ግድዳ ናበታ ባጋራ ‘ህንተ ላታናዉ ገልያ ቢታይ፥ እን ደእያ አሳን ቱንዳሮ፤ ሀ ጋፃፐ ህን ጋፃ ጋካናዉ ኤንታ ኢታ ኦሱዋንነ ቱናተን ኩማሱ።

¹² ሄሳ ግሾ፥ ህንተ ምኖ ግዳና መላ፥ ሄ ቢታ አይፍያ ማና መላነ መርናዉ ህንተ ናይታስ ላትሳና መላ፥ ህንተ ማጫ ናይታ ኤንታ አደ ናይታስ እሞፍተ፤ ኤንታ ማጫ ናይታ ህንተ አደ ናይታስ ኤኮፍተ። ኤንቲ ሳሮተንነ ዱረተን ዳና መላ አሞቶፍተ’ ያጋዳሳ።

¹³ “ኑ ቦላ ጋክዳ ኢታባ ኡባይ ኑ ኢታ ኦሱዋነ ኑ ግታ ናጋራ ጋሶና። ግዶሽን፥ ኔኒ ኑ ፆሳይ ኑ ናጋራ ዳሮተ መላ ኑና ፕርዳባካ፤ ሽን ኑፐ ጉታ አሻዳሳ።

¹⁴ ኑኒ ሀይሳ መላ ቱናባ ኦያ አሳራ ኤኮንነ ገሎን ዋላከትድ፥ ዋንድ ነ ኪታ እፃስ ጋኔ? ሀ አትዳ ጉ ኮቻይ ያና ጋካናዉ ነ ሀንቆይ ኑ ቦላ ዳረነዬ?

¹⁵ አቤት ጎዳዉ፥ እስራኤለ ፆሳዉ፥ ኔኒ ፅሎ፤ ኑኒ ሀእ ጋካናዉ አትድ ደኦን ደኦስ። ኑ ናጋራ ጋሶን ኑፐ እሶይካ ነ ስንን ኤቃናዉ ዳንዳኤይ ባዋ፤ አትዳይሳት ሀች ሀይሳን ነ ስንን ደኦስ” ያጋስ።