Izira 3 - ጌሻ ማፃፋ

ያርሾ በሳይ ዛሪድ ኬፀትስ

¹ ላፑን አጌናን እስራኤለ አሳይ ባንታ ደእያ ካታማታፐ እስ አስ ግድድ የሩሳላመ ሺቅዶሶና።

² እዮሳደቃ ናኣ እያሱነ፥ እያራ ኦያ ካህነት፥ ሳላትያላ ናኣ ዛሩባበልነ እያ ዳቦት ፆሳ አስ ግድዳ ሙሰ ህግያን ፃፈትዳይሳዳ ፁሳ ያርሾ ያርሻናዉ፥ እስራኤለ ፆሳስ ያርሾ በሲ ጊግስዶሶና።

³ ሄ ቢታን ደእያ አሳ እፁዋፐ ደንዶይሳን ያይኮካ፥ ያርሾ በሲ ካሰ በሳን ኬፅድ፥ ፁሳ ያርሾ ጎዳስ ኡባ ዎደ ዎንታነ ኦማርስ ሺሽዶሶና።

⁴ ካሰ ፃፈትዳይሳዳ ሻቃራ ባኣለ ቦንችዶሶና፤ ፁሳ ያርሾ እስ እስ ጋላስ ኮሸይሳዳ ፓጭሶና ያርሽዶሶና።

⁵ ቃስ ኡባ ዎደ ሺቅያ ፁሳ ያርሾ፥ አጌና ፄሮ ያርሾነ ጎዳ ጌሻ ባለታን ያርሽያ ያርሾ ኡባ ያርሽዶሶና። ሄሳ ቦላካ አሳይ ባ ዶሳን ጎዳስ እምዳ እሞታ ኡባ ያርሽዶሶና።

⁶ ፆሳ ኬ ባሶይ ቡሮ ዶመቶናባ ግድኮካ ላፑን አጌናን ኮይሮ ጋላስ ኤንቲ ጎዳስ ፁሳ ያርሾ ሺሾ ዶምዶሶና።

ፆሳ ኬይ ዛሪድ ኬፀትስ

⁷ ሄሳፈ ጉየ፥ ሹቹ ማሰይሳታስነ አናፀታስ ሚሸ እምድ ኦሶ ኦይክዶሶና። ፋርሰ ካዎይ ቅሮስ ኤንታዉ ኪትዳ ግሾ፥ ልባኖሳፐ ዝጋ አባ ፕንድ፥ ዮጰ ኤሀናዉ ስዶናነ ፅሮሳ አሳስ ካ፥ ኡሽነ ዛይተ እምዶሶና።

⁸ ኤንቲ የሩሳላመ ስምዳ ናምአን ላይን ናምአን አጌናን፥ ሳላትያላ ናአይ ዛሩባበል፥ እዮሳደቃ ናኣ እያሱይነ ኤንታ ዳቦት፥ ካህነት፥ ሌወትነ ድኦፐ ስምዳ አሳ ኡባይ ፆሳ ኬ ካሰ በሳን ኬፆ ዶምዶሶና። ቃስ ፆሳ ኬ ኦሱዋ አዋተን ፄላና መላ ላታሙ ላይ ግድዳይሳታነ ላታሙ ላይፈ አዳ ሌወታ ሹምዶሶና።

⁹ ሌወ ኮቸ ግድዳ እያሱ፥ እያ ናይታነ እያ ዳቦት፥ ሆዳዋ ሶ አስ ግድዳ ቃድምኤልነ እያ ናይት እስፈ ግድድ፥ ፆሳ ኦሱዋ ኦስሳና መላ አዋተ ኤክዶሶና፤ ኤንሀዳዳ ኮቸ ግድዳ ሌወት ኤንታ ማድዶሶና።

¹⁰ አናፀት ፆሳ ኬ ባሱዋ የገ ኦይክያ ዎደ፥ ካህነት ባንታ ማኦ ማእድ ሞይዘ ኦይክድ፥ አሳፋ ኮቸ ግድዳ፥ ሌወት ዳላ ኦይክድ፥ እስራኤለ ካዋ ዳዊታ ዎጋ መላ ጎዳ ጋላታናዉ ኤቅዶሶና።

¹¹ ኤንቲ ጎዳ ጋላትሸነ እሶይ እሱዋ ካል ካል ማዝሙረን ሳቢሸ፥ ሀይሳዳ ያግድ ዛማርዶሶና። “ጎዳይ ኬሀ፤ እስራኤለስ ደእያ እያ ሲቆይ መርናሳ” ያግዶሶና። ፆሳ ኬ ባሶይ የገትያ ግሾ፥ አሳ ኡባይ ባንታ ቃላ ቁ ኦድ እልልሸ ጎዳ ጋላትዶሶና።

¹² ሽን ካሰ ፆሳ ኬ በእዳ ጭማ ካህነታፐ፥ ሌወታፐነ ኮቻታ ሀላቃታፐ ዳሮት ሀእ ፆሳ ኬ ኬፃናዉ የገትዳ ባሱዋ በእዳ ዎደ ባንታ ቃላ ቁ ኦድ ዬክዶሶና፤ ሀራት ቃስ ኡፋይትሸ ቦንችዶሶና።

¹³ ኦንካ ኡፋይሳ እልልሳነ ዬሆ ዋሱዋ ሻካናዉ ዳንዳእቤና፤ አሳይ ዋስያ ዋሶይ ዎልቃማ ግድያ ግሾ ዋሶይ ሃሆን ስኤቴስ።