Iyyu7eela 3 - ጌሻ ማፃፋ

ሀራ ካዎተት ፕርደታና

¹ “ሄ ጋላሳንነ ሄ ዎድያን ታኒ ይሁዳነ የሩሳላመ አሳ ድኤተፈ ዛራዳ አንጃና።

² ታኒ ካዎተታን ደእያ አሳ ሺሻዳ፥ ዮሳፈፃ ዛንጋራ ዎሳና። ታ አሳ እስራኤለ ቦላ ኤንቲ ኦዳ ኢታ ኦሱዋ ግሾ፥ ታኒ ኤንታ ያን ፕርዳና። ኤንቲ ካዎተታ ግዶን ታ አሳ ላልዶሶና፤ ታ ቢታ ባንታዉ ሻክ ኤክዶሶና።

³ ታ አሳ ቦላ ሳማ የግዶሶና፤ ላይማትያ ማጫስ ደማናዉ፥ አደ ናይታ እምዶሶና፤ ዎይነ ኡሻስ ማጫ ናይታ ባይዝዶሶና።

⁴ “ህንተኖ፥ ፅሮሳ፥ ስዶናነ ፍልስፄመ ቢታ አሳቶ፥ ህንተ ታ ቦላ አይ ኦናዉ ቆፕደቲ? ታ ቦላ ሀሎ ከያናዉ ኮዬቲ? ህንተ ሄሳ ኮይኮ፥ ታኒ ኤለሳዳ ህንተ ኦሱዋ ህንተ ቦላ ዛራና።

⁵ ታ ብራ፥ ታ ዎርቃነ ታ አልኦ ሚሽያ ኡባ ኤክድ ህንተ ኤቃ ኬ ገልስደታ።

⁶ ይሁዳነ የሩሳላመ አሳ ኤንታ ቢታፈ ሃስ ኤፍድ፥ ግርከ አሳስ ባይዝደታ።

⁷ ሄኮ፥ ህንተ ባይዝዳ በሳፈ ታኒ ሀእ ኤንታ ከሳዳ ህንተ ኦዳባ ኡባ ህንተ ሁጰን ዛራና።

⁸ ታኒ ህንተ አደ ናይታነ ህንተ ማጫ ናይታ ይሁዳ አሳስ አ እማና። ኤንቲ ሃሆ ቢታን ደእያ ሳባ አሳስ ኤንታ ባይዛና። ታኒ ጎዳይ ሀይሳ ኦዳስ።

⁹ “ሀይሳዳ ያግድ ካዎተታ ግዶን አዋጅተ፤ ኦላስ ጊግተ፤ ምኖ አሳታ ደንተ፥ ኦላንቾት ሺቅድ ኦላስ ከዮ።

¹⁰ ህንተ ማራሻ ማሸ፥ ህንተ ባጫ ቶራ ኦድ ቆፅተ! ዳቡራንቾይ፥ ‘ታኒ ምኖ!’ ያጎ።

¹¹ ህንተኖ፥ ዩሹዋን ደእያ ካዎተቶ፥ ኤለ ከይተ፤ ሃ ሺቅተ” ያግተ። አቤት ጎዳዉ፥ ነ ኦላንቾታ ዱገ የዳ!

¹² “ካዎተት ደንድድ፥ ዮሳፈፃ ዛንጋራ ዮ፤ እስራኤለ ዩሹዋን ደእያ ካዎተታ፥ ኡባ ቦላ ፕርዳናዉ ታኒ ያን ኡታና።

¹³ ኤንታ ኢታተይ ዳሮ፤ ጫካ ዎደይ ጋክዳ ካዳ ኤንታ ጫክተ። ዎይነ አይፈይ ኦላን ኩምን የይሳዳ፥ ኤንታ የተ።

¹⁴ ፕርዳ ዛንጋራን ጎዳይ ፕርድያ ጋላሳይ ጋክስ፤ ሄሳ ግሾ፥ ታይቦን ዳሮ አሳይ ሄ ዛንጋራን ሺቅስ።

¹⁵ ሄ ጋላስ አውነ አጌን ማና፤ ፆልንቶት ባንታ ፖኡዋ ድጋና።

¹⁶ ጎዳይ ፅዮነን ግድድ ደቻና፤ የሩሳላመን ባ ቃላ ስሳና፤ ሳሎይነ ሳእ ኮኮራና። ሽን ጎዳይ ባ አሳስ፥ እስራኤለስ ባቃትድ አትያ በሲ ግዳና።”

ፆሳ ደረይ አንጀታና

¹⁷ “ሄ ዎደ ህንተ፥ ታኒ ታ ጌሻ ዙማ ቦላ፥ ፅዮነን ደእያ ጎዳ ህንተ ፆሳ ግደይሳ ኤራና። የሩሳላመ ካታማይ ጌሽ ግዳና፤ አላጋት ዛሪድ የሩሳላመ ኦሎኮና።

¹⁸ ሄ ጋላስ ደረት ማልአንቶ ዎይነ ኡሻን ፆካና፤ ዙማት ማ ጎጋና። ይሁዳ ቢታን ደእያ ሻፋ ኡባን ሃ ፑልታና። ጎዳ ኬን ፑልቶይ ቃና፤ ሴፅማ ዛንጋራ ኡሻና።

¹⁹ “ግብፀይ ባይሳ ግዳና፤ ኤዶመይ ቦድላ ባዞ ግዳና። ኤንቲ ይሁዳ አሳ ቦላ ኢታባ ኦዶሶና፤ ፅሎ አሳ ሱ ጉስዶሶና።

²⁰ ሽን ይሁድነ የሩሳላመይ መርናዉ፥ የለታ ኡባስ ደእያ በሲ ግዳና።

²¹ ታኒ ሀሎ ከዮና አግዳ ኤንታ ሱ ሃሉዋ ቡሮ ከያና” ያጌስ ጎዳይ።