Iyyu7eela 2 - ጌሻ ማፃፋ

ቦለይ ኦላንቾዳ ያና

¹ ፅዮነን ሞይዘ ፑንተ፤ ታ ጌሻ ዙማ ቦላ ዋስተ። ቢታን ደእያ አስ ኡባይ ኮኮሮ፤ ጎዳ ጋላሳይ ዬስ፤ ካረን ደኤስ።

² ሄ ጋላሳይ ማነ ጫጋና ጋላስ፤ ሻራነ ሳካና ማ ጋላስ! ዙማ ቦላ ፃልቀይ ጫረይሳዳ ዳሮነ ዎልቃማ ቦለይ ቢታ ማአና። ሄሳ መላባይ ካሰ ሀንቤና፥ ስንፈካ ሄሳ መላባይ ሀነና።

³ ኤንታፈ ስንራ ምያ ታም ቤስ፤ ኤንታፈ ጉየራ ላጮይ ፁጌስ። ኤንታ ስንይ ጋናተ መላ፤ ሽን ኤንታ ጉየይ ቦድላ ባዞ መላ፤ ኤንታፈ አይብካ ከስ ኤከና።

⁴ ኤንታ መይ ፓራ መ መላ፤ ኤንቲ ኦላ ፓራዳ አዳርሶሶና።

⁵ ፓር ጎችያ ጋረዳ ጊሮሶና፤ ደርያ ሁጰራ ጉፖሶና። ቡርያ ምያ ታማ ላጮዳ ፁጎሶና፤ ኦላ ባናዉ ከይዳ ዎልቃማ ኦላንቾ ዳኖሶና።

⁶ ኤንታ ስንን አስ ኮኮሬስ፤ ያሻን አሳ ሶምኦይ ካሬፄስ።

⁷ ኤንቲ ኦላንቾዳ ዎፆሶና፤ ቶራ አሳዳ ድርሳ ቦላራ ጉፖሶና። ኤንቲ ኡባይ ማራን ቦሶና፤ ባንታ ሳልፕያፈ ጋፃ ከዮኮና።

⁸ እሶይ እሱዋራ ሱገቶኮና፤ ኡባይ ቅንፅ ግድ ስን ቦሶና። ኤንቲ ባንታራ ኤቀተይሳታ መንድ ቦሶና፤ ኤንታ ተቅያባይ ባዋ።

⁹ ኤንቲ ካታማ ኦይኮሶና፤ ድርሳ ግምብያ ቦላራ ዎፆሶና። ኤንቲ ኬ ቦላ ከዮሶና፤ ካይሶዳ ማስኮተራ ገሎሶና።

¹⁰ ኤንታ ስንን ቢት ቃፄስ፤ ሳሎት ኮኮሮሶና። አውነ አጌን ሜስ፤ ፆልንቶት ባንታ ፖኡዋ ድጎሶና።

¹¹ ጎዳይ ባ ኦላንቾታ ስንን ጉሜስ፤ እያዉ ኪተትያ ኦላንቾት ታይቦፐ ቦላ። ጎዳ ጋላሳይ ግታነ ዳሮ ያሼስ፤ ሄ ጋላሳ ዳንዳአናይ ኦኔ?

ህንተ ዎዛና ፔተ

¹² “ሀእካ ፆማን፥ ዬሆንነ አዛኖን ህንተ ፖሎ ዎዛናፐ ታኮ ስምተ።”

¹³ ህንተ ዎዛናፐ አትሽን፥ ህንተ ማኡዋ ፔፕተ። ጎዳ፥ ህንተ ፆሳኮ፥ ስምተ፤ እ፥ ቃይነ ማሮት ኩምዳይሳ፤ እ፥ ሀንቃናዉ ኤለሶናይሳነ ሲቆይ ዳርዳይሳ፤ እ፥ ህንተና ሴራናዉ ኤለሰና።

¹⁴ ጎዳይ ህንተ ፆሳይ፥ ባ ሀንቁዋፈ ስሚድ ህንተና አንጃነኮ ኦን ኤሪ? ሄ ዎደ ጎዳስ ህንተ ፆሳስ፥ ካ ያርሾነ ኡሻ ያርሾ ያርሻና።

¹⁵ ፅዮነን ሞይዘ ፑንተ፤ ፆማ አዋጅተ፤ ጌሻ ሺቁዋ ሺቅተ!

¹⁶ አሳ ሺሽድ፥ ህንተ ሺቁዋ ጌሽተ፤ ጭማታ እስፈ ሺሽተ፤ ጉ ናይታነ መይሳታ አሾፍተ። መዳን ደኤይሳት ባንታ ቁሩፁዋፐ ከዮ።

¹⁷ ጎዳስ ኦያ ካህነት ፆሳ ኬ ባራንዳፈነ ያርሾ በሳፈ ግዶን ኤቅድ ዬኮ። ኤንቲ ሀይሳዳ ያግድ ዎሶ፤ “አቤት ጎዳዉ፥ ነ አሳስ ቃታ፤ ካዎተት፥ ‘ኤንታ ፆሳይ አዉኔ? ያጋና መላ ኦዳ፥ ነ አሳ ቦረስነ ሚቻስ የጎፋ’ ” ያጎ።

ጎዳ ቃያ

¹⁸ ጎዳይ ባ ቢታስ ደእያ ምሻን ባ አሳስ ቃትስ።

¹⁹ ጎዳይ ዛሪድ ባ አሳ ሀይሳዳ ያጋና፤ “ሄኮ፥ ታኒ ህንተዉ ካ፥ ዎይንያነ ዛይትያ፥ ካልሳና ጋካናዉ የዳና፤ ህዛፐ ጉየ ካዎተታ ግዶን ህንተና ቦረስ አግከ።”

²⁰ “ፑደሀ ባጋራ ይዳ ቦልያ፥ ታኒ የደዳ ህንተፈ ሃሳና። ባይሳነ መላ ቢታ ኤንታ ጎዳና፤ ስን ባጋራ ደኤይሳታ ማፅነ አባ፥ ጉየ ባጋራ ደኤይሳታ መደትራነ አባ፥ የደና፤ ያን ኤንቲ ሀይቅድ ፅንቃና። ቱማ ጎዳይ ዎልቃማባ ህንተዉ ኦስ” ያጋና።

²¹ ቢታዉ፥ ህዛ ያዮፋ፤ ጎዳይ ግታባ ኦዳ ግሾ፥ ኡፋይታነ ሀሹ ጋ!

²² ህንተኖ ሳኣ መሄቶ፥ ያዮፍተ፤ ባዞን ደእያ ማታይ አጭስ። ምይ አይፍስ፤ ባላሰይነ ዎይነ አይፈይ ቡርኩክስ።

²³ ህንተኖ ፅዮነ አሳቶ፥ ኡፋይትተ፤ ጎዳን ህንተ ፆሳን፥ ሀሹ ጊተ! እ፥ ባልጎ እራ ህንተዉ ዳርስድ እሚስ፤ ካሰይሳዳ ስላነ ቶርቸ እራ ግድስድ እሚስ።

²⁴ ካ ቡክያ ዉዱማን ካ ኩማና፤ ዎይንያነ ዛይትያ ጉምእያ ኦላይ ኩምድ ፓላሀና።

²⁵ ካሰ ታኒ ህንተ ግዶ የድዳ፥ ዎልቃማ ጎንዶይ፥ ቦለይ፥ ጉዶትነ ፃቆት ምዳይሳ፥ ታ ህንተዉ ዛራና።

²⁶ ህንተ ምን ካልስድ ፓላህያ ካ ዳና፤ ማላልስያባ ህንተዉ ኦዳ ጎዳ። ህንተ ፆሳ ሱን ጋላታና፤ ታ አሳይ ዛሪድ ዬላተና።

²⁷ ሄ ዎደ ታኒ እስራኤለ ግዶን ደኤይሳ፥ ታኒ ጎዳይ ህንተ ፆሳ ግደይሳነ ታፐ ሀራ ፆሲ ባይናይሳ ህንተ ኤራና። ታ አሳይ ዛሪድ ዬላተና።

ጎዳ ጋላሳ

²⁸ ህዛፐ ጉየ ሀይሳዳ ሀናና፤ ታኒ አሳ ኡባ ቦላ ታ አያና ጉሳና። ህንተ አደ ናይትነ ማጫ ናይት ትንብተ ኦዳና፤ ህንተ ጭማት አሙሆ አሙሀና፤ ህንተ ናአተት ቆንጨ በአና።

²⁹ ሄ ጋላሳታን ታ አደ አይለልታ ቦላነ ታ ማጫ አይለታ ቦላ ታ አያና ጉሳና።

³⁰ ታኒ ሳሎንነ ሳአን ማላልስያባ ኦና፥ ታማነ ሳሎ ደንድያ ጩያ በሳና።

³¹ ግታነ ያሽያ ጎዳ ጋላሳይ ያናፐ ካሰ፥ አው ማና፤ አጌን ሱ ዳናና።

³² ሄ ዎደ ሀይሳዳ ሀናና፤ ጎዳ ሱን ፄግያ ኡባይ አታና። ጎዳይ ግዳይሳዳ ፅዮነ ዙማንነ የሩሳላመን አትዳይሳት ዳና።