Iyyasu 23 - ጌሻ ማፃፋ

እያሱ ዉርሰ ቃላ

¹ ዳሮ ዎደ ጋካናዉ ጎዳይ እስራኤለ አሳ ኤንታ ዩሹዋን ደእያ ሞርከታፐ ሸምፕስስ። ሄ ዎደ እያሱይ ጭምን፥ ላይ ሱገትስ።

² እያሱይ፥ እስራኤለ አሳ ኡባ፥ ጭማታ፥ ሀላቃታ፥ ዳይናታነ ቶራ ሞጮናታ እስፈ ፄግድ፥ “ታኒ ሀእ ዳሮ ጭማስ።

³ ጎዳይ፥ ህንተ ፆሳይ ሀ ቢታን ደእያ ካዎተታ ኦል ፆናና መላ ዋትድ ህንተና ማድዳኮ በእደታ።

⁴ ዶሎሀን ዮርዳኖሰ ሻፋ፥ ዉሎሀን መደትራነ አባ ጋካናዉ ደእያ ኦይከትዳ ቢታነ ኦይከቶና ቢታ ኡባ ህንተ ኮቻስ ሻካ እማስ።

⁵ ጎዳይ፥ ህንተ ፆሳይ ኤንታ ህንተ ስንፈ ጎድድ ከሳና። ጎዳይ፥ ህንተ ፆሳይ ህንተዉ ጫቅዳይሳዳ ህንተ ኤንታ ቢታ ላታና።

⁶ “ሙሰ ህገ ማፃፋን ፃፈትዳ ኡባ ምንድ ናግተነ ፖልተ፤ እያፐ ኡሻች ዎይኮ ሀድርስ ጎፕተ።

⁷ ህንተ ግዶን አትዳ ደርያራ ዋላከቶፍተ። ኤንታ ፆሳታ ሱን ፄጎፕተ ዎይኮ ኤንታ ሱንን ጫቆፍተ። ኤንታዉ ኦፍተ ዎይኮ ኤንታዉ ጎይኖፍተ።

⁸ ሽን ሀች ጋካናዉ ህንተ ኦዳይሳዳ ጎዳ ህንተ ፆሳስ አማነትተ።

⁹ “ጎዳይ፥ ግታነ ምኖ ካዎተታ ህንተ ስንፈ ጎድድ ከስስ። ህንተራ ሀች ጋካናዉ ኦንካ ኤቀታናዉ ዳንዳእቤና።

¹⁰ ጎዳይ፥ ህንተ ፆሳይ ህንተዉ ጫቅዳይሳዳ፥ እ ህንተዉ ኦለትያ ግሾ፥ ህንተፈ እስ አስ ሙኩሉ አሳ የደና።

¹¹ ጎዳ፥ ህንተ ፆሳ ኡባ ዎደ ሲቅተ።

¹² ሽን ህንተ ጉየ ስሚድ፥ ህንተ ግዶን አትዳ ደርያራ ዋላከትኮ፥ ህንተ ኤንታ ማጫሳ፥ ቃስ ኤንቲ ህንተ ማጫሳ ኤክድ ኤንታራ ቃሸትኮ፥

¹³ ጎዳይ፥ ህንተ ፆሳይ ሄ ደርያ ህንተ ስንፈ ጎድድ ከሶናይሳ ኤርተ። ጎዳይ፥ ህንተ ፆሳይ ህንተዉ እምዳ ሀ ሎኦ ቢታፈ ህንተ ያና ጋካናዉ፥ ኤንቲ ህንተዉ ፅሄነ ግተ ግዳና። ኤንቲ ህንተ ዞኩዋስ ልሶ፥ ህንተ አይፍያስ አጉን ግዳና።

¹⁴ “ሀእ ታ ሀይቃናዉ ማታስ። ጎዳይ፥ ህንተ ፆሳይ ህንተዉ እማና ግድ ጫቅዳ ሎኦባ ኡባፈ እሶይካ አትቦናይሳ ህንተ ኡባይ፥ ህንተ ዎዛናንነ ሸምፑዋን ኤሬታ። እ ህንተዉ እማና ግድ ጫቅዳባፐ እሶይካ አቶና ኡባይ ፖለትስ።

¹⁵ ጎዳይ፥ ህንተ ፆሳይ ህንተራ ጫቅዳ ጫቁዋ ህንተ መንድ፥ ሀራ ፆሳታስ ኦኮነ ጎይንኮ፥ ጎዳ ሀንቆይ ህንተ ቦላ ኤፃና።

¹⁶ ጎዳይ፥ ህንተ ፆሳይ ህንተዉ እማና ግድ ጫቅዳ ሎኦባ ኡባ አሾና ፖልዳይሳዳ፥ እ ህንተዉ እምዳ ሀ ሎኦ ቢታፈ ህንተና ይሳና ጋካናዉ ኢታ ኡባ ህንተ ቦላ ኤሀና። እ ህንተዉ እምዳ ሎኦ ቢታፈ ኤለስድ ህንተ ያና።”