Iyyasu 22 - ጌሻ ማፃፋ

ዶሎሀ ባጋ ኮቻት ስምዶሶና

¹ ሄሳፈ ጉየ፥ እያሱይ ሮቤላ፥ ጋደነ ምናሰ ኮቻፈ ባጋ ፄግድ፥

² “ጎዳ አይለይ ሙሰይ ህንተና ኪትዳ ኡባ ፖልደታ፤ ቃስ ታዉ ኪተትደታ።

³ ሄ ኡባን ሀች ጋካናዉ ህንተ እሻታ የግቤከታ። ጎዳ፥ ህንተ ፆሳ ኪታ ኡባ ፖልደታ።

⁴ ጎዳይ ህንተ ፆሳይ ህንተዉ ጫቅዳ ቃላዳ፥ ህንተ እሻታ ሸምፕስስ። ሄሳ ግሾ፥ ጎዳ አይለይ ሙሰይ ህንተዉ ዮርዳኖሰ ሻፋፐ ዶሎሀ ባጋን እምዳ፥ ላታ ቢታን ደእያ ህንተ ሶ ሶ ስምተ።

⁵ ጎዳ አይለይ ሙሰይ ህንተና ኪትዳ ህግያ ምንድ ናግተ። ጎዳ ህንተ ፆሳ ሲቅተ። እያ ኦግያፐ ደሾፕተ፤ እያ ኪታ ፖልተ። እያራ ሽጵ ግድ ደእተ፤ ህንተ ኩመ ዎዛናፐነ ኩመ ሸምፑዋፈ እያዉ ኦተ” ያግስ።

⁶ እያሱይ ኤንታ አንጅድ የድን ኤንቲ ባንታ ሶ ስምዶሶና።

⁷ እያሱይ፥ ምናሰ ኮቻ ባጋስ ባሳነን ላታ ቢታ እምስ። አትዳ ባጋ ኮቻስ ቃስ ዮርዳኖሰፐ ዉሎሀ ባጋን ላታ ቢታ እምስ። እያሱይ ኤንታ አንጅድ ሞይዝሸ፥

⁸ ህንተ፥ “ዳሮ መሄ፥ ብራ፥ ዎርቃ፥ ናሰ፥ ብራታነ ዳሮ ማኦ ኤክድ ህንተ ሶ ስማና ሀኔታ። ሄሳ ግሾ፥ ህንተ ሞርከታፐ ድእዳይሳ ህንተ እሻታራ ሻከትተ” ያግስ።

⁹ ሮቤላ፥ ጋድነ ምናሰ ኮቻ ባጋይ ባንታ ላታ ቢታ ስምዶሶና። ኤንቲ፥ ጎዳይ ሙሰ ባጋራ ኪትን ላትዳ ጋላዳ ቢታ፥ ካናነ ቢታን፥ ሴሎን ደእያ እስራኤለ አሳፐ ሻከትድ ብዶሶና።

ዶሎሀ ባጋ ያርሾ በሳ

¹⁰ ሮቤላ፥ ጋድነ ምናሰ ኮቻፈ ባጋይ ዮርዳኖሰ ማታን ካናነ ቢታን ደእያ ጋልሎታ ይድ፥ ሻፋ ማታን ማላልስያ ግታ ያርሾ በሲ ኬፅዶሶና።

¹¹ ሮቤላ፥ ጋድነ ምናሰ ኮቻፈ ባጋይ ዮርዳኖሰ ማታን፥ ጋልሎታን፥ ካናነ ቢታን ያርሾ በሲ ኬፅዳይሳ አትዳ እስራኤለ አሳይ ስእዶሶና።

¹² እስራኤለ አሳይ ሄሳ ስእድ፥ ኤንታ ኦላናዉ ሴሎን ሺቅዶሶና።

¹³ ሄሳፈ ስን እስራኤለ አሳይ፥ ካህንያ አላዛራ ናኣ ፕንሃሳ፥ ጋላዳን ደእያ ሮቤላ፥ ጋደነ ምናሰ ኮቻፈ ባጋታኮ የድዶሶና።

¹⁴ እስ እስ ኮቻይ ባ ሶ ሀላቃታፐ እስ እስ አሰ ዶርድ፥ ታሙ አስ ፕንሃሳራ የድዶሶና።

¹⁵ ኤንቲ ሮቤላ፥ ጋድነ ምናሰ ኮቻፈ ባጋይ ጋላዳ ብድ፥

¹⁶ “ጎዳ አሳይ፥ ‘እስራኤለ ፆሳ ቦላ ደእያ ህንተ አማኑዋ አይስ ፓጭሴቲ? ህንተዉ ያርሾ በሲ ኬፅድ፥ ጎዳፐ ሃክደታ። እያ ቦላ አይስ ማካልደቲ?

¹⁷ ፐኦራን ኑ ኦዳ ናጋራይ ግደኔ? ጎዳ አሳ ቦላ ቦሽ ዎስ፤ ሀች ጋካናዉ ኑኒ ሄ ናጋራፐ ጌይቦኮ።

¹⁸ ጎዳ ቦላ ሀች ህንተ ዞኮ ዛርደታ። ሀች ህንተ እያ ቦላ ዞኮ ዛርኮ ዎንቶ እ ኩመ እስራኤለ አሳ ሀንቃና።

¹⁹ ህንተ ደእያ ቢታይ ቱንዳባ ግድኮ፥ ጎዳ ዱንካነይ ደእያ ቢታ፥ ሃ ኑኮ ይድ፥ ኑ ላታ ሻከትተ። ሽን ጎዳ፥ ኑ ፆሳ ያርሾ በሳፈ ሀራ ያርሾ በሲ ኬፅድ ፆሳ ቦላ ዎይኮ ኑ ቦላ ማካሎፍተ።

²⁰ ዛራ ናአይ አካን ድገትዳባ ኤክድ፥ ናጋራ ኦዳ ግሾ፥ ኩመ እስራኤለ አሳ ቦላ ጎዳ ሀንቆይ ዎቤነዬ? እያ ናጋራ ጋሶን ሀይቅዳይ እያ ፃላላ ግደና’ ” ያግዶሶና።

²¹ ያትን ሮቤላ፥ ጋደነ ምናሰ ኮቻፈ ባጋይ ሀይሳዳ ያግድ ዛርዶሶና።

²² “ጎዳ ፃላል ፆሰ! ጎዳ ፃላል ፆሰ! ኑኒ ሀይሳ አይስ ኦዳኮ እ ኤሬስ፤ ህንተካ ኤራና መላ ኑ ኮዮስ። ኑኒ ጎዳ ቦላ ማካልዳባነ ኪተቶና እፅዳባ ግድኮ፥ ሀች ኑና ፓፃ ዎፍተ።

²³ ኑ ጎዳስ ኪተቶና እፅድ፥ ፁሳ ያርሹዋ፥ ካ ያርሹዋነ እስፈተ ያርሹዋ ያርሻናዉ ያርሾ በሲ ኬፅዳባ ግድኮ፥ ጎዳይ ኑና ሀንቆ።

²⁴ ኑ ሄሳ ቆፕድ ኬፅቦኮ። ኑኒ ያርሾ በሲ ኬፅዳይ፥ ዎንቶ ህንተ ናይት፥ ኑ ናይታኮ፥ ‘ህንተዉ ጎዳ፥ እስራኤለ ፆሳራ አይ ጋሄተ ደኢ?

²⁵ ጎዳይ ኑ ግዶንነ ሮቤላነ ጋዳ ኮቻ ግዶን ዮርዳኖሰ ሻፋ ዛዋ ዎስ። ሄሳ ግሾ፥ ጎዳራ ህንተዉ ጋሄተ ባዋ’ ጋንደሻ ግድ ያይዳ ግሾሳ። ቃስ ህንተ ኮቻይ ኑ ኮቻ ጎዳ ጎይኖ ድጎና አጎኮና” ያግድ ቆፕዳ።

²⁶ “ኑ ያርሾ በሲ ኬፅዳይ ሄሳሳ። ፁሳ ዎይኮ ሀራ ያርሾ ያርሻናሳ ግደና።

²⁷ ኑኒ ያርሾ በሲ ኬፅዳይ፥ ፁሳ፥ እስፈተነ ሀራ ያርሹዋ ያርሽሸ ደእዳይሳስነ ጎዳ ዱንካንያ ስንን ጎይንሸ ደእዳይሳስ፥ ኑ ግዶንነ ህንተ ግዶን ቃስ ካልያ የለታ ግዶን ሄስ ማርካ ግዳና መላሳ። ሄስ ህንተ ናይት ኑ ናይታኮ፥ ‘ህንተዉ ጎዳራ አይ ጋሄተካ ባዋ’ ያጎና መላ ማዳና።

²⁸ ኤንቲ ዎደፐ ኑኮ ዎይኮ ኑ ኮቻኮ ሄሳዳ ጊኮ፥ ኑ ናይት ዛሪድ፥ ‘ኑ አዋት ጎዳስ ኬፅዳ ያርሾ በሳ ሌምሱዋ ሀይሳ በእተ። ሄስ ህንተ ግዶንነ ኑ ግዶን ማርካ ግዳና መላሳፈ አትሽን፥ ፁሳ ዎይኮ ሀራ ያርሾ ያርሻናሳ ግደና’ ጋናዉ ዳንዳአና መላሳ።

²⁹ ኑ ጎዳ ቦላ ማካላናይስ ኑፐ ሃኮ። ጎዳ ኑ ፆሳ ዱንካንያ ስንን ደእያ ያርሾ በሳፈ ሀራ ፁሳ፥ ካነ ሀራ ያርሾ በሲ ኬፅድ ፆሳ ጎይኖ አጎኮ” ያግድ ዛርዶሶና።

³⁰ ካህነይ ፕንሃስነ እያራ ደእያ እስራኤለ ሀላቃት፥ ሮቤላ፥ ጋደነ ምናሰ ኮቻፈ ባጋይ ኦድዳይሳ ስእድ፥ ኡፋይትዶሶና።

³¹ ካህንያ አላዛራ ናአይ ፕንሃስ፥ ሮቤላ፥ ጋደነ ምናሰ ኮቻታኮ፥ “ጎዳይ ኑራ ደኤይሳ ኑ ሀች ኤርዳ። ህንተ ጎዳ ቦላ ማካልቤከታ። ህንተ እስራኤለ አሳ ጎዳ ፕርዳፈ አሽደታ” ያግስ።

³² ካህንያ አላዛራ ናአይ ፕንሃስነ እያራ ደእያ ሀላቃት ጋላዳን ደእያ ሮቤላነ ጋዳ ኮቻ ማታፐ ካናነን ደእያ እስራኤለ አሳኮ ስሚድ፥ ሀንዳባ ኤንታዉ ኦድዶሶና።

³³ እስራኤለ አሳይ ኡፋይትድ፥ ፆሳ ጋላትዶሶና። ሄሳፈ ጉየ፥ ሮቤላነ ጋዳ አሳት ደእያ ቢታ ኦልድ ይሳናዉ ኦደትቦኮና።

³⁴ ሮቤላነ ጋዳ ኮቻይ፥ “ሀ ያርሾ በሳይ ጎዳ ፃላል ፆሳ ግደይሳስ ኑስ ማርካ” ያግድ፥ ሄ ያርሾ በሳ “ማርካ” ግድ ሱንዶሶና።