Iyyasu 21 - ጌሻ ማፃፋ

ሌወታ ካታማታ

^1-2 ሄሳፈ ጉየ፥ እስራኤለ አሳይ ካናነ ቢታን፥ ሴሎን ዱንካንድ ደእሽን፥ ሌወ ሶ አሳ ሀላቃት ካህንያ አላዛራኮ፥ ናወ ናኣ እያሱኮነ እስራኤለ ሀላቃታኮ ይድ፥ “ኑኒ ዳና ካታማታነ መሄ ሄምያ ቢታ ኑስ እማና መላ፥ ጎዳይ ሙሰ ባጋራ ኪትስ” ያግዶሶና።

³ ሄሳ ግሾ፥ ጎዳይ ኪትዳይሳዳ፥ እስራኤለ አሳይ ሌወታስ ካታማታነ መሄ ሄምያ ቢታ ባንታ ቢታፈ ሻክድ፥ እምዶሶና።

⁴ ኮይሮ ሳማይ ቃሃታ ኮቻስ ከይስ። ካህንያ አሮና ኮቻይ፥ ይሁዳ፥ ስሞናነ ብንያመ ኮቻፈ ታማነ ሄ ካታማታ ሳማን ኤክዶሶና።

⁵ አትዳ ቃሃታ ኮቻይ፥ ኤፍሬማ፥ ዳነነ ዉሎሀ ባጋን ደእያ ምናሰ ኮቻፈ ታሙ ካታማታ ሳማን ኤክዶሶና።

⁶ ገድሶና ኮቻይ፥ ይሳኮራ፥ አሴራ ንፍታለመነ ዶሎሀ ባጋን ደእያ ምናሰ ኮቻፈ ታማነ ሄ ካታማታ ሳማን ኤክዶሶና።

⁷ መራራ ኮቻይ፥ ሮቤላ፥ ጋደነ ዛብሎና ኮቻፈ ታማነ ናምኡ ካታማታ ኤክዶሶና።

⁸ ጎዳይ ሙሰ ባጋራ ኪትዳይሳዳ፥ እስራኤለ አሳይ ሀ ካታማታነ መሄ ሄምያ ቢታ ሌወታስ ሳማን ሻክድ እምዶሶና።

⁹ እስራኤለ አሳይ ይሁዳነ ስሞና ኮቻፈ ካልድ ሱንን ፄገትዳ ካታማታ እምዶሶና።

¹⁰ ኮይሮ ሳማይ ሌወ ኮቻፈ የለትዳ፥ ቃሃታ ኮቸ ግድዳ አሮና ያራስ ከይን፥ ኤንታዉ እመትዳ ካታማት ሀይሳታ፤

¹¹ ደረይ ዳርያ ይሁዳን ደእያ ቅርያት-አርባ ዎይኮ ከብሮነነ እያ ዩሹዋን ደእያ ሄን ቢታታ ኤንታዉ እምዶሶና። (አርብ አናቀ አዋ።)

¹² ሽን ኮይሮ ሄ ካታማ ዩሹዋን ደእያ ቢታነ ጉታታ ዮፎና ናኣ ካለባስ ላታ ኦድ እምዶሶና።

¹³ ካህንያ አሮና ያራስ አሰ ዎዳ አስ ባቃትድ አትያ ከብሮነነ ሄን ቢታ፥ ልብናነ ሄን ቢታ፥

¹⁴ ያትራነ ሄን ቢታ፥ ኤሽታሞአነ ሄን ቢታ፥

¹⁵ ሆሎናነ ሄን ቢታ፥ ዳብራነ ሄን ቢታ፥

¹⁶ አይናነ ሄን ቢታ፥ ዩፃነ ሄን ቢታ፥ ቤት-ሳሜሳነ ሄን ቢታ። ሀይሳቲ ይሁዳፐነ ስሞናፐ ኤከትዳ፥ ካታማት ኩመ ኡዱፉና።

¹⁷ ብንያመ ኮቻፈ ኤከትዳ ኦይዱ ካታማት፥ ጋባኦናነ ሄን ቢታ፥ ግብአነ ሄን ቢታ፥

¹⁸ አናቶተነ ሄን ቢታ፥ አልሞናነ ሄን ቢታ።

¹⁹ አሮና ኮቸ ግድዳ ካህነታስ እመትዳ ካታማትነ ሄን ቢታት ታማነ ሄ።

²⁰ ሌወ ኮቸ ግድዳ፥ አትዳ ቃሃታ ኮቻስ፥ ኤፍሬማስ እመትዳ ቢታፈ ሻከትድ እመትስ።

²¹ ቃስ ኤንታዉ ደረይ ዳርያ ኤፍሬማን፥ አሰ ዎዳ አስ ባቃትድ አትያ ኦይዱ ካታማት ሴከማነ ሄን ቢታ፥ ገዘራነ ሄን ቢታ፥

²² ቅብፃይማነ ሄን ቢታ፥ ቤት-ሆሮናነ ሄን ቢታ እምዶሶና።

²³ ዳነ ኮቻፈ ሻከት እመትዳ ኦይዱ ካታማት፥ ኤልታቃነ ሄን ቢታ፥ ግበቶናነ ሄን ቢታ፥

²⁴ ኤሎናነ ሄን ቢታ፥ ጋት-ርሞናነ ሄን ቢታ።

²⁵ ምናሰ ኮቻ ባጋፈ ሻከት እመትዳ ናምኡ ካታማት፥ ታናካነ ሄን ቢታ፥ ጋት-ርሞናነ ሄን ቢታ።

²⁶ አትዳ ቃሃታ ኮቻት ሄን ቢታራ እስፈ ታሙ ካታማ ኤክዶሶና።

²⁷ ሀራ ሌወ ኮቸ ግድዳ ገድሶና ኮቻስ እመትዳ ቢታይ፥ ምናሰ ኮቻ ባጋፈ አሰ ዎዳ አስ ባቃትድ አትያ ናምኡ ካታማት፥ ባሳነን ደእያ ጎላናነ ሄን ቢታ፥ በኤሽትራነ ሄን ቢታ።

²⁸ ይሳኮራ ኮቻፈ እመትዳ ኦይዱ ካታማት፥ ቅሶናነ ሄን ቢታ፥ ደብራታነ ሄን ቢታ።

²⁹ ያርሙታነ ሄን ቢታ፥ ኤንጋንማነ ሄን ቢታ።

³⁰ አሴራ ኮቻፈ ሻከት እመትዳ ኦይዱ ካታማት ምሻላነ ሄን ቢታ፥ አብዶናነ ሄን ቢታ፥

³¹ ሄልቃተነ ሄን ቢታ፥ ረሆባነ ሄን ቢታ።

³² ንፍታለመ ኮቻፈ ሻከት እመትዳ ሄ ካታማት፥ አሰ ዎዳ አስ ባቃትድ አትያ፥ ጋልላን ደእያ ቃደሳነ ሄን ቢታ፥ ሀሞት-ዶራነ ሄን ቢታ፥ ቃርታናነ ሄን ቢታ።

³³ ገድሶና ኮቻት ሄን ቢታራ እስፈ ታማነ ሄ ካታማታ ኤክዶሶና።

³⁴ ሌወ ኮቸ ግድዳ አትዳ መራራ ኮቻት፥ ዛብሎና ኮቻፈ ሻከት እመትዳ ኦይዱ ካታማት፥ ዮቅናማነ ሄን ቢታ፥ ቃርታናነ ሄን ቢታ፥

³⁵ ድምናነ ሄን ቢታ፥ ናህላላነ ሄን ቢታ ኤክዶሶና።

³⁶ ሮቤላ፥ ኮቻፈ ሻከትድ እመትዳ ኦይዱ ካታማት፥ ቦሶራነ ሄን ቢታ፥ ያሃፃነ ሄን ቢታ፥

³⁷ ቅደሞታነ ሄን ቢታ፥ መፋታነ ሄን ቢታ።

³⁸ ጋዳ ኮቻፈ ሻከትድ እመትዳ ኦይዱ ካታማት፥ ጋላዳን አሰ ዎዳ አስ ባቃትድ አትያ፥ ራሞታነ ሄን ቢታ፥ ማህናይመ፥

³⁹ ሀሰቦና፥ ያእዜራ።

⁴⁰ ሌወ ኮቸ ግድዳ አትዳ መራራ ኮቻይ ኤክዳ ካታማት ታማነ ናምአ።

⁴¹ እስራኤለ አሳይ ላትዳ ቢታፈ ሌወ ኮቻስ እመትዳ ካታማት ሄን ቢታራ እስፈ ኦይታማነ ሆስፑና።

⁴² ሄ ካታማታ ኡባ ዩሹዋን ሄን ቢታት ደኦሶና።

⁴³ ጎዳይ ኤንታ አዋታስ እማና ግድ ጫቅዳ ቢታ ኡባ እስራኤለ አሳስ እምስ። ኤንቲ ሄ ቢታ ላትድ፥ ያን ደእዶሶና።

⁴⁴ ጎዳይ ኤንታ አዋታስ ጫቅዳይሳዳ፥ ኤንታ ሳሮን ዎስ። ኤንቲ ኦላስ ከይዳ ዎደ ኡባን ኤንታ ሞርከት ኤንታራ ኤቀታናዉ ዳንዳእቦኮና።

⁴⁵ ጎዳይ እስራኤለ አሳስ እማና ግድ ጫቅዳ ሎኦባ ኡባ ፖልስፐ አትሽን፥ እሶይካ አትቤና።