Biblia Todo Logo
Bìoball air-loidhne

- Sanasan -

Iyyasu 13 - ጌሻ ማፃፋ


ቡሮ ኦይከትቦና ቢታ

1 እያሱይ ዳሮ ጭምዳ ዎደ ጎዳይ እያኮ፥ “ኔን ጭማዳሳ፤ ነ ላይይካ ሱገትስ፥ ግዶሽን ኦይከቶና አትዳ ዳሮ ቢታት ደኦሶና።

2 ኦይከትቦና ቢታት ሀይሳታ፤ ፍልስፄመታነ ጌሹረታ ቢታ ኡባ።

3 ግብፀፈ ዶሎሀ ባጋን ደእያ ሽሆራ ሻፋፐ ብድ፥ ፑደሀ ባጋን ደእያ ኤክሮና ቢታ ጋካናዉ ደእያ ቢታ ኡባ። ሄ ቢታት ካናነ ቢታ ጌተቶሶና። ኤንትካ እቻሹ ፍልስፄመ ካዎት አይስያ ጋዛ፥ አሽዶዳ፥ አስቀሎና፥ ጋተነ ኤክሮና ጌተትያ ካታማታ። አዌታ ቢታይካ ቡሮ ኦይከትቤና።

4 ዱገሀ ባጋን ደእያ ካናነታ ቢታነ፥ ስዶናታ ቢታ ግድዳ ማራፐ ብድ አሞረታ ዛዋ አፌቃ ጋካናዉ ደእያ ቢታይ ኦይከትቤና።

5 ገባላታ ቢታይነ ባኣል-ጋደፐ ዶሎሀ ባጋን ደእያ አርሞና ዙማፐ ብድ፥ ሀማታ ፕኖ ጋካናዉ ቡሮ ኦይከትቤና።

6 ልባኖሰፐ ብድ ማሰሮና ጋካናዉ ገዘ ቢታን ደእያ ስዶናታ ኡባ ታኒ እስራኤለታ ስንፈ ጎዳ ከሳና። ታኒ ነና ኪትዳይሳዳ ሄ ቢታ እስራኤለ አሳስ ላታ ኦዳ ሻካ።

7 ኔን ሄ ቢታ ኡዱፉን ኮቻታስነ ምናሰ ኮቻፈ ባጋስ ሻካ” ያግስ።


ዮርዳኖሰፐ ዶሎሀ ባጋ ቢታ

8 ሮቤላ ኮቻይ፥ ጋዳ ኮቻይነ ምናሰ ኮቻፈ ባጋይ ጎዳ አይለይ ሙሰይ ዮርዳኖሰፐ ሄፍንን፥ ዶሎሀ ባጋን ደእያ ቢታ ካሰ ላታ ኦድ ኤንታዉ እምስ።

9 ኤንታ ቢታይ አርኖና ዛንጋራ ማታን ደእያ አሮኤራፐ ብድ፥ ሄ ዛንጋራን ደእያ ካታማፐ ብድ፥ መደባ ገዝያ ካንድ ድቦና ጋካናሳ።

10 ቃስ ሀሰቦናን ኡትድ አሞነታ ዛዋ ጋካናዉ ሃርያ አሞረታ ካዋ ስሆና ካታማታ ኡባ ጋኬስ።

11 ሄሳዳካ፥ ጋላዳታ፥ ጌሹረታነ ማእካታ ቢታ ኡባ፥ አርሞና ዙማ ኡባነ ሳላካ ጋካናዉ ደእያ ባሳነ ቢታ ኡባ ኦይኬስ።

12 አስታሮተንነ ኤድራአን ኡትድ፥ ሃርዳ ባሳነ ካዋ ኦገ ቢታ ኡባ ኦይኬስ፤ ሄ ቢታይ ካሰ ራፋይመታፐ አትዳ ቢታ። ሙሰይ ኤንታ ፆንድ ቢታፈ ጎድድ ከስስ።

13 ሽን እስራኤለ አሳይ ጌሹረታነ ማእካታ ጎድድ ከስቦኮና። ኤንቲ ሀች ጋካናዉ እስራኤለ አሳ ግዶን ደኦሶና።

14 ሙሰይ ሌወ ኮቻስ ላታ ቢታ እምቤና። ጎዳይ፥ እስራኤለ ፆሳይ፥ ኤንታዉ ኪትዳይሳዳ ታማን ፁሳ ያርሾ ኤንታዉ ላታ ኦድ እምስ።

15 ሙሰይ ሮቤላ ኮቻስ ኤንታ ኮቻን ኮቻን ላታ እምስ።

16 ኤንታ ቢታይ አርኖና ዛንጋራ ማታን ደእያ አሮኤራፐ ብድ፥ ሄ ዛንጋራን ደእያ ካታማ ካንድ ገዘ መደባ ጋኬስ።

17 ሀሰቦና፥ ገዘ ካታማታ፥ ድቦና፥ ባሞት-ባኣላ፥ ቤት-ባል-መኦና፥

18 ያሃፃ፥ ቀደሞታ፥ መፋታ፥

19 ቅራታይማ፥ ሰባማ፥ ደረይ ዳርያ ዛንጋራን ደእያ ፀረት-ሻሃረ፥

20 ቤት-ፓኦራ፥ ፕስጋ ዙማፐ ጋርሳን ደእያ ቢታነ ቤት-ያሽሞታ ጌተትያ ቢታታ ኡባ ጋኬስ።

21 ቃስ ገዘን ደእያ ካታማታነ ሀሰቦናን ኡትድ ሃርዳ አሞረታ ካዋ ስሆና ቢታ ኡባ ጋኬስ። ሙሰይ ካዋ ስሆናነ ምድያመታ ሀላቃታ ኤዋ፥ ረቄማ፥ ፁራ፥ ሁራነ ሬባ ኦልድ ፆንስ። ሀይሳቲ ካዋ ስሆናፐ ጋርሳን ሄ ቢታ ሃረይሳታ።

22 እስራኤለ አሳይ ማሩዋ፥ ብኦራ ናኣ፥ ባላማ ዎዶሶና።

23 ሮቤላ ኮቻስ ዉሎሀ ባጋ ዛዋይ ዮርዳኖሰ ሻፋ። ሮቤላ ኮቻስ ኮቻን ኮቻን ላታ ግድድ እመትዳ ካታማትነ ጉታት ሀይሳታ።

24 ሙሰይ ጋዳ ኮቻስ ኤንታ ኮቻን ኮቻን ላታ ቢታ ሻክድ እምስ።

25 ኤንታ ቢታይ ያእዜራ፥ ጋላዳን ደእያ ካታማታ ኡባነ አሞነታ ቢታፈ ባጋ ኤክድ፥ ራባ ዶሎሀ ባጋን ደእያ አሮኤራ ጋኬስ።

26 ሄሳዳካ፥ ሀሰቦናፐ ደንድድ፥ ራሞት-ምፅጳነ በፆንማ ጋኬስ። ቃስ ማህናይማፐ ብድ ዳቤራ ዛዋ ጋኬስ።

27 ቃስ ዮርዳኖሰ ዛንጋራን፥ ሀሰቦና ካዋ ስሆና ካዎተፈ አትዳ፥ ቤት-ሀራመ፥ ቤት-ንምራ፥ ሱኮታነ ፃፎና ጌተትያ ካታማታ ኤኬስ። ኤንታ ዛዋይ ዉሎሀ ባጋን ዮርዳኖሰ ሻፋ፥ ቃስ ፑደሀ ባጋን ከነሬታ አባ ጋኬስ።

28 ጋዳ ኮቻስ ኮቻን ኮቻን ላታ ቢታ ግድድ እመትዳ ካታማትነ ጉታት ሀይሳታ።

29 ሙሰይ ምናሰ ኮቻፈ ባጋስ ኤንታ ኮቻን ኮቻን ላታ ቢታ እምስ።

30 ኤንታ ቢታይ ማህናይማነ ባሳነ ቢታ ኡባ ጋክ ኦይኬስ። ባሳነ ካዋ ኦገ ካዎተ ኡባነ ባሳነን ደእያ ኡሱፑን ታሙ ያእራ ካታማታ ኦይኬስ።

31 ቃስ ጋላዳፐ ባጋነ ባሳነን ኦገ ካዎተስ ዋና ካታማ ግድዳ አስታሮተነ ኤድራአ ጌተትያ ካታማታ ጋኬስ። ሄ ኡባይ ምናሰ ናአ ማክራ ኮቻስ ኤንታ ኮቻን ኮቻን ጋክዳይሳ።

32 ሙሰይ ዮርዳኖሰፐ ሄፍንን፥ እያርኮፈ ዶሎሀ ባጋን ደእያ ሞአበ ደንባን ደእሸ ሻክድ እምዳ ቢታይ ሀይሳ።

33 ሽን ሙሰይ ሌወ ኮቻስ ላታ ቢታ እምቤና። ጎዳይ፥ እስራኤለ ፆሳይ ኤንታ ላታ።

The Word for the World International and The Word for the World Ethiopia

Lean sinn:



Sanasan