Iyyasu 10 - ጌሻ ማፃፋ

አው ኤቅስ

¹ እያሱይ እያርኮ ካታማ ኦል ይስድ፥ እያ ካዋ ዎዳይሳዳ፥ ጋየ ካታማ ኦል ይስድ፥ እያ ካዋ ዎዳይሳ የሩሳላመ ካዎይ አዶን-ፀደቅ ስእስ። ቃስ ጋባኦና አሳይ እስራኤለ አሳራ ሳሮ ዳናዉ ጫቀትዳይሳ ስእስ።

² ጋባኦን ሀንኮ ካዎ ካታማታዳ ግታ ካታማ፤ ሄ ካታማይ ጋየ ካታማፐ አስ፤ እያን ደእያ አደትካ ምኖ ኦላንቾ ግደይሳ ኤርያ ግሾ፥ አዶንፀደቅነ እያ አሳይ ዳሮ ያይዶሶና።

³ ሄሳ ግሾ፥ የሩሳላመ ካዎይ አዶን-ፀደቅ፥ ከብሮና ካዋ ሆሀማስ፥ ያርሙታ ካዋ ፕራማስ፥ ላክሶ ካዋ ያፍአስነ፥ ኤግሎና ካዋ ዳብራስ ሀይሳዳ ያግድ ኪትስ፤

⁴ “ጋባኦና አሳይ እያሱራነ እስራኤለ አሳራ ሳሮ ደአናዉ ጫቅዳ ግሾ፥ ኤንታ ኦላናዉ ይድ ታና ማድተ” ያግስ።

⁵ ሀ እቻሹ አሞረ ካዎት ባንታ ኦላንቾታ እስፈ ጋድ፥ ጋባኦና ኦልዶሶና።

⁶ ጋባኦና አሳይ ጋልጋላን ዱንካንዳ እያሱኮ፥ “ኑና ነ አይለታ አጎፋ፤ ኤለሳ ያዳ ኑና አሻ። ደረይ ዳርያ ቢታን ደእያ አሞረ ካዎት ኡባይ ኑና ኦላናዉ ባንታ ኦላንቾታ እስኖ ኦዳ ግሾ፥ ነ ኑና ማዳ” ያግድ ኪትዶሶና።

⁷ ሄሳ ግሾ፥ እያሱይ፥ ባራ ደእያ ኦላንቾታነ ምኖ አሳታ ኡባ፥ ጋልጋላፐ ኤክድ ብስ።

⁸ ጎዳይ እያሱኮ፥ “ኤንታዉ ባቦፋ፤ ታኒ ኤንታ ነ ኩሸን አዳ እማስ። ኤንታፈ እስ አስካ ኔራ ኤቀታናዉ ዳንዳኤና” ያግስ።

⁹ እያሱይ ጋልጋላፐ ቃማ ኩመ ሄመትሸ አቅድ፥ ጋባኦነ አሳይ ቆፖና ደእሽን ኤንታ ቦላ ኦላ ደንስ።

¹⁰ ጎዳይ እስራኤለ አሳ ስንን ኤንታዉ ዎዛና ካሀ ይስስ። እስራኤለ አሳይ ኤንታ ጋባኦናን ዎዶሶና። እስራኤለት ኤንታ ቤት-ሆሮና ኤፍያ ኦግያ ኦይድ ጎድሸ፥ አዜቃነ ማቀዳ ጋካናዉ ጎድዶሶና።

¹¹ ኤንቲ ቤት-ሆሮናፐ ዱገ አዜቃ ኤፍያ ኦግያራ እስራኤለ አሳ ስንፈ ባቃትሽን፥ ጎዳይ ግታ ሻቻ ሹቹ ሳሎፐ ኤንታ ቦላ ቡክስስ። እስራኤለ አሳይ ዎዳ አሳፐ፥ ሻቻይ ዎዳ አሳይ ዳሮ።

¹² ጎዳይ እስራኤለ አሳስ አሞረታ፥ አድ እምዳ ጋላስ፥ እስራኤለ አሳይ ስእሽን፥ እያሱይ፥ “አዋይ ጋባኦና ቦላ ዉሎና ኤቆ። አጌናይካ ኤሎና ዛንጋራ ቦላ ኤቆ” ያግድ ጎዳ ዎስስ።

¹³ እስራኤለ አሳይ ባንታ ሞርከታ ፆናና ጋካናዉ፥ አዋይ ዉሎና ኤቅስ፤ አጌናይካ ባ ደእያ በሳፈ ቃፅቤና። ሄስ ያሻራ ማፃፋን ፃፈትስ። አዋይ ሳሎስ ግዶን ቃፆና ኤቅስ፤ እስ ጋላስ ኩመ አዋይ ዉሎና ጋምእስ።

¹⁴ ጎዳይ አሳ ቃላ ስእዳ ሄ ጋላሳ መላ ጋላስ ሀይሳፈ ካሰካ ሀይሳፈ ስንንካ ዴና። ቱማካ ጎዳይ እስራኤለ አሳስ ኦለትስ።

¹⁵ ሄሳፈ ጉየ፥ እያሱይነ እያ ኦላንቾት ባንታ ዱንካንዳ ጉታ ጋልጋላ ስምዶሶና።

እቻሹ አሞረ ካዎታ ሀይቁዋ

¹⁶ ሄ እቻሹ አሞረ ካዎት ባቃትድ፥ ማቀዳ ጎንጎሉዋን ቆሰትዶሶና።

¹⁷ እቻሹ ካዎት፥ ማቀዳ ጎንጎሉዋን ቆሰትድ ደእሽን ደምዳይሳ እያሱስ ኦድዶሶና።

¹⁸ እያሱይ ዛሪድ፥ “ግታ ሹቻታ ጎንዶርስድ፥ ጎንጎሉዋ ዶና ጎርድተ፤ ኤንታ ናጋና መላ አሰ ያን ዎተ።

¹⁹ ሽን ህንተ ያን ጋምኦፍተ፤ ኤንቲ ባንታ ካታማ ገልድ አቶና መላ ህንተ ሞርከታ ጎድድ ኤንታ ዎተ። ጎዳይ ህንተ ፆሳይ ኤንታ ህንተ ኩሸን አድ እምስ” ያግስ።

²⁰ ጉ አሳት ባቃትድ ባንታ ግምበትዳ ካታማ ገልድ አትኮካ፥ እያሱይነ እስራኤለ አሳይ አሳ ኡባ ዎዶሶና።

²¹ ሄሳፈ ጉየ፥ እስራኤለ አሳ ኡባይ ሳሮን ስሚድ፥ እያሱይ ዱንካንድ ደእያ ጉታ ማቀዳ ይዶሶና። ሄ ዎደፐ ዶምድ ኦንካ እስራኤለ አሳ ቦላ እስ ቃላካ ኦደታናዉ ፃልዳ አስ ባዋ።

²² ሄሳፈ ጉየ፥ እያሱይ፥ “ጎንጎሉዋ ዶና ዶይድ፥ ሄ እቻሹ ካዎታ ከስድ፥ ታዉ ሀ ኤክድ ዪተ” ያግስ።

²³ ጎንጎሉዋ ዶና ዶይድ፥ የሩሳላመ ካዋ፥ ከብሮና ካዋ፥ ያርሙታ ካዋ፥ ላክሶ ካዋነ ኤግሎና ካዋ እያኮ ኤህዶሶና።

²⁴ ኤንቲ ሄ ካዎታ እያኮ ኤህዳ ዎደ፥ እያሱይ እስራኤለ አሳ ኡባ ባኮ ፄግድ፥ ባራ ብዳ ቶራ ሞጮናታኮ፥ “ሃ ይድ፥ ህንተ ቶሁዋ ሀ ካዎታ ቆያን ዎተ” ያግስ። ኤንቲ ይድ ኪተትዳይሳዳ ኦዶሶና።

²⁵ እያሱይ ኤንታኮ፥ “ህንተ ኦለትያ ህንተ ሞርከታ ቦላ ጎዳይ ሀይሳዳ ኦና ግሾ፥ አይኮይ ባዋ ያዮፍተ፤ ምንተ” ያግስ።

²⁶ እያሱይ ሄ እቻሹ ካዎታ ዎድ፥ እቻሹ ም ቦላ ካቅስ፤ ኤንታ አሀይ ኦማርስ ጋካናዉ ያን ፔእስ።

²⁷ አው ዉልያ ዎደ እያሱይ፥ “አሀ ዎስድ፥ ኤንቲ ካሰ ቆሰትዳ ጎንጎሉዋን ሆልተ። ያትድ፥ ሄ ጎንጎሉዋ ዶና ግታ ሹቻን ጎርድተ” ያግድ ኪትስ። ሄ ሹቻት ሀች ጋካናዉ ያን ደኦሶና።

²⁸ ሄ ጋላስ እያሱይ ማቀዳ ካታማ ኦይክስ፤ ካታማ ካዋካ ዎስ፤ ካታማን ደእያ አሳ ኡባ እስ አስካ አሾና ይስስ። እያርኮ ካታማ ካዋ ቦላ ኦዳይሳዳ፥ ማቀዳ ካታማ ካዋ ቦላ ኦስ።

ዱገሀ ካታማታ ፆነተ

²⁹ ያፐ ስሚድ፥ እያሱይነ እያ ኦላንቾት ኡባይ ማቀዳፐ ብድ ልብና ካታማ ኦልዶሶና።

³⁰ ጎዳይ ሄ ካታማነ ካታማ ካዋ ኤንታ ኩሸን አድ እምስ። እያሱይ ካታማን ደእያ አሳፐ እሱዋካ አሾና ማሻን ዎስ። እያርኮ ካታማ ካዋ ቦላ ኦዳይሳዳ ልብና ካታማ ካዋ ቦላ ኦስ።

³¹ እያሱይነ እያ ኦላንቾት ልብና ካታማፐ ላክሶ ካታማ ብድ፥ ሄ ካታማ ኦልዶሶና።

³² ጎዳይ ላክሶ ካታማ እስራኤለ አሳ ኩሸን አድ እምን፥ እያሱይ ሄ ካታማ ዩሹዋ ተቅድ ናምአን ጋላሳን ኦይክስ። ልብና ካታማን ኦዳይሳዳ ላክሶ ካታማን ደእያ አሳ ኡባ ማሻን ዎስ።

³³ ሄ ዎደ፥ ገዘራ ካዎይ ሆራም፥ ላክሶ ካዋ ማዳናዉ ይስ፥ ሽን እያሱይ እያነ እያ ኦላንቾታ ይስስ፤ ኤንታፈ እስ አስካ አትቤና።

³⁴ ሄሳፈ ስሚድ፥ እያሱይነ እያ ኦላንቾት ኡባይ ላክሶ ካታማፐ ኤግሎና ካታማ ብድ፥ ሄ ካታማ ዩሹዋ ተቅድ ኦልዶሶና።

³⁵ ሄ ጋላስ ኤግሎና ካታማ ኦይክድ፥ ላክሶ ካታማን ኦዳይሳዳ ማሻን አሰ ኡባ ዎዶሶና።

³⁶ ያት ስሚድ፥ እያሱይነ እያ ኦላንቾት ኤግሎናፐ ከብሮና ብድ፥ ከብሮና ኦልዶሶና።

³⁷ ሄ ካታማነ እያ ዩሹዋን ደእያ ጉ ካታማታ ኦይክድ እያን ደእያ አሳነ ካዋ ዎዶሶና። እያሱይ ኤግሎናን ኦዳይሳዳ ሄ ካታማ ቦላካ ኦስ።

³⁸ ሄሳፈ ጉየ፥ እያሱይነ እያራ ደእያ እስራኤለ ኦላንቾት ጉየ ስሚድ ዳብራ ካታማ ኦልዶሶና።

³⁹ ሄ ካታማነ እያ ዩሹዋን ደእያ ጉ ጉታታ ኦይክድ፥ እያን ደእያ አሳነ ካዋ ዎዶሶና። እያሱይ ከብሮናነ ልብና ካታማታ ቦላ ኦዳይሳዳ ዳብራ ቦላ ኦስ።

⁴⁰ እያሱይ ሄ ቢታን ደእያ ካታማታ ኡባ ኦይክስ። ደረይ ዳርያ ቢታን፥ ነገበ ጋን፥ ሎቡዋነ ኤንታ ካዎታ ኡባ ኦይክስ። ጎዳይ እስራኤለ ፆሳይ እያ ኪትዳይሳዳ፥ ቢታ ቦላ ደእያ አስ እሱዋካ አሾና ኡባ ዎድ ይስስ።

⁴¹ እያሱይ ቃደስ-ባርነፈ ብድ ጋዛ ጋካናዉ ቃስ ጎሸና ቢታፈ ብድ ጋባኦና ጋካናዉ ደእያ ኡባ ኦልድ ፆንስ።

⁴² ጎዳይ፥ እስራኤለ ፆሳይ፥ እስራኤለታስ ኦለትዳ ግሾ እያሱይ ሀ ካዎታነ ኤንታ ቢታ ኡባ ኦልድ ኦይክስ።

⁴³ ሄሳፈ ጉየ፥ እያሱይነ እስራኤለ ኦላንቾት ባንታ ዱንካንዳ ጉታ ጋልጋላ ስምዶሶና።