Iyyasu 1 - ጌሻ ማፃፋ

ፆሳይ እያሱ ኪትስ

¹ ጎዳ አይለይ ሙሰይ ሀይቅዳፐ ጉየ፥ ጎዳይ ሙሰ ማድያ ናወ ናኣ እያሱ፥ ሀይሳዳ ያግስ፤

² “ታ አይለይ፥ ሙሰይ ሀይቅስ። ሄሳ ግሾ፥ ኔራነ ሀ አሳ ኡባይ ደንድድ፥ ታኒ እስራኤለ አሳስ እማናዉ ደእያ ቢታ ገላናዉ፥ ዮርዳኖሰ ሻፋ ፕንተ።

³ ታኒ ሙሰስ ኦድዳይሳዳ፥ ህንተ ቶሆይ የያሶ ኡባ ህንተዉ እማስ።

⁴ ህንተ ዛዋይ ዱገሀ ነገበ መላ ቢታፈ ደንድድ፥ ፑደሀን ደእያ ልባኖሰ ዙማ ጋካናሳ። ቃስ ዶሎሃ ባጋን ደእያ ኤፍራፂሳ ዎጋ ሻፋፐ ደንድድ፥ ህተታ ቢታ ኡባ ኤክድ ዉሎሀ ባጋን ደእያ መደትራነ አባ ጋካናሳ።

⁵ እያሱ፥ ነ ላይ ኡባን ኦንካ ኔራ ኤቀታናዉ ዳንዳኤና። ታኒ ሙሰራ ግድዳይሳዳ፥ ኔራካ ግዳና። ታኒ ነና የግከ፤ አግከ።

⁶ አይኮይ ባዋ ምና። ታኒ ኤንታ ማይዛታስ እማና ጋዳ ጫቅዳ ቢታ ኔን ሀ አሳ ላትሳና።

⁷ አይኮይ ባዋ ምና። ታ አይለይ ሙሰይ ነዉ እምዳ ህግያ ኡባ ምንዳ ናጋ። ኔን ብያ በሳ ኡባን ነዉ እንጀታና መላ እያፐ ኡሻች ዎይኮ ሀድርስ ጎፓ።

⁸ ሀ ህገ ማፃፋይ ነ ዶናፐ ሻከቶፎ። እያን ፃፈትዳባ ኡባ ምንዳ ናጋናዉ ጋላስነ ቃማ እያ ቆፓ። ሄሳ ነ ኦኮ፥ ነዉ ኡባባይ እንጀታናነ ፖለታና።

⁹ ነ ብያ በሳ ኡባን ታኒ ጎዳይ ነ ፆሳይ ኔራ ደእያ ግሾ፥ ባቦፋ፤ ህርጎፋ፤ ያጋዳ ነዉ ኦዳይስ” ያግስ።

¹⁰ ሄሳፈ ጉየ፥ እያሱይ ደርያ ሀላቃታ ሀይሳዳ ያግስ፤

¹¹ “አሳይ ዱንካንድ ደእያ ጉታ ብድ፥ ሄ ጋላሳ ጋርሳን፥ ‘ጎዳይ፥ ህንተ ፆሳይ፥ ህንተዉ እምያ ቢታ ላታናዉ ዮርዳኖሰ ሻፋ ፕንያ ግሾ፥ ህንተዉ ሽንቀ ጊግስተ’ ያግድ ደርያስ ኦድተ” ያግስ።

¹² እያሱይ፥ ሮቤላነ ጋዳ ኮቻታ ቃስ ምናሰ ኮቻታፐ ባጋ ሀይሳዳ ያግስ፤

¹³ “ጎዳይ፥ ህንተ ፆሳይ፥ ህንተና ሸምፕሳና፥ ሀ ቢታ ህንተዉ እማና ያግድ፥ ጎዳ አይለይ ሙሰይ ኦድዳይሳ ቆፕተ።

¹⁴ ህንተ ማቸት፥ ህንተ ናይትነ ህንተ መሄይ ዮርዳኖሰ ሻፋፐ ሀፍንን ሙሰይ ህንተዉ እምዳ ቢታን ደእሾና። ሽን ህንተ ኦላንቾት ባንታ ኦላ ሚሽያ ኦይክድ፥ ህንተ አሳፐ ስንትድ፥ ኦለታናዉ ዮርዳኖሰ ሻፋ ፕኖና።

¹⁵ ጎዳይ ህንተና ሸምፕስዳይሳዳ፥ ኤንታካ ሸምፕሳና ጋካናዉነ ጎዳይ ህንተ ፆሳይ ኤንታዉ እምያ ቢታ ኤንቲ ላታና ጋካናዉ፥ ኤንታ ማድተ፤ ኦለትተ። ያትድ፥ ስም ይድ፥ ዮርዳኖሰ ሻፋፐ ሀፍንን ዶሎሀ ባጋን፥ ጎዳ አይለይ ሙሰይ እምዳ ህንተ ቡዞ ቢታን ደእተ” ያግስ።

¹⁶ ኤንቲ ዛሪድ እያሱኮ፥ “ነ ኑና ኪትዳ ኡባ ኑኒ ኦና፤ ነ ኪትያሶ ኡባ ባና።

¹⁷ ኑኒ ሙሰስ ኡባባን ኪተትዳይሳዳ፥ ነዉካ ኪተታና። ጎዳይ፥ ነ ፆሳይ ሙሰራ ግድዳይሳዳ፥ ኔራካ ግዶ።

¹⁸ ኔራ ኤቀተይነ ነ ኪታ እፅያ ኦንካ ደእኮ፥ ሀይቆ። ግዶሽን ኔን ምና” ያግዶሶና።