Isayaasa 13 - ጌሻ ማፃፋ

ፆሳይ ባብሎነ ሴራና

¹ አሞፀ ናአይ፥ እሳያስ ጎዳይ ባብሎነባ ቆንጭስን በእዳይስ ሀይሳ።

² አይኮይ ባይና ደርያ ቦላ ማላ ኤስድ፥ ህንተ ቃላ ቁ ኦድ ዋስተ፤ ኤንቲ ሀላቃታ ፐንግያራ ገላና መላ ዉትተ።

³ ታኒ ሀንቀትዳይሳታ ሴራና መላ ታ ጌሻታ ኪታስ፤ ታ ፆኖይ ኡፋይስያ ታ ዎልቃማታ ፄጋስ።

⁴ ዳሮ አሳይ ዎጫመይሳዳ ደርያ ሁጵያን ደእያ ዎጫማ ስእተ! ቃስ ካዎተት እስፈ ሺቅድ ፓላምያ ፓላማ ስእተ! ኡባፈ ዎልቃማ ጎዳይ ኦላንቾታ ኦላስ ጊግስስ።

⁵ ጎዳይነ እያ ሀንቆ ኦላ ሚሸይ ቢታ ኡባ ይሳናዉ ሃሆ ቢታፈ፥ ሳሎ ጋፃፐ ዮሶና።

⁶ ጎዳ ጋላሳይ ማትዳ ግሾ ዬክተ! ሄ ጋላሳይ ኡባፈ ዎልቃማ ፆሳ ማታፐ ይሳናዉ ያና።

⁷ ሄሳ ግሾ፥ ያሻን ኤንታ ኩሸይ ዶጫና፤ አሳ ኡባ ዎዛናይ ትልአና።

⁸ ኤንቲ ዳጋማና፤ እቀነ ኡንኤተ ኤንታ ኦይካና። የሎ ከይዳ ማጫሳዳ ኤንቲ እንፃፃና። ኤንቲ ዳጋምድ እሶይ እሱዋ ፄላና፤ ኤንታ ሶምኦይ ብዶ ግድስ።

⁹ ሄኮ ቢታ ባይሳ ከሳናዉነ እያን ደእያ ናጋራንቾታ ይሳናዉ ይሎንነ ሱልዳ ሀንቆን ጎዳ ጋላሳይ ያና።

¹⁰ ሳሎ ፆልንቶትነ ፆልንቶ ኮጨት ባንታ ፖኡዋ ድጋና፤ ዶልያ አዋይ ማና፤ አጌናይካ ባ ፖኡዋ እመና።

¹¹ ጎዳይ፥ “ታኒ ሀ ሳኣ እያ ኢታተ ግሾ፥ ኢታታካ ኤንታ ናጋራ ግሾ ሴራና። ታኒ ኦቶራንቾታ ኦቶሩዋ ሻራና፤ ኢታታ ጬቁዋ ካዉሻና።

¹² አትዳይሳት ዋላህ ባይና ዎርቃፈ አልኦ ግዳና፤ አሳ ናእ ኦፍራ ዎርቃፈ አድ ቦንቾ ግዳና።

¹³ ሄሳ ግሾ፥ ኡባፈ ዎልቃማ ጎዳ ሀንቁዋን፥ እያ ሀንቁዋ ሱላ ጋላስ፥ ታኒ ሳሎታ ኮኮርሳና፤ ሳኣካ እያ በሳፈ ቃና” ያጌስ።

¹⁴ ሻንካፈ ባቃትያ ጋራዳ ዎይኮ ሄምያ አስ ባይና ዶርሳ ዉደዳ አስ ኡባይ ባ አሳኮ ስማና፤ ኡባይ ባ ቢታ ባቃታና።

¹⁵ በንትዳ ኦንካ ጫደታና፤ ኦይከትዳ ኦንካ ማሻን ሀይቃና።

¹⁶ ኤንታ ጉ ናይት ኤንታ ስንን ቡሰታና፤ ኤንታ ኬይ ቦንቀታና፤ ኤንታ ማቸታ ሀራ አስ ኢሳና።

¹⁷ ብራ ኮዮናነ ዎርቃን ኡፋይቶና ሜዶና አሳ ታኒ ኤንታ ቦላ ደንና።

¹⁸ ኤንታ ዶንገይ ናአተታ ዎና፤ ዮጋ ናይታካ ማሮኮና፤ ኤንታ አይፈይ ናይታስ ቃተና።

¹⁹ ካዎተታስ ቦንቾ፥ ባ አሳስ አሌቆ ግድዳ ባብሎነ ቢታ፥ ጎዳይ ሶዶመዳነ ጋሞራዳ ሽር የጋና።

²⁰ ሄ ቢታን አስ ኡተና፤ ዎይኮ የለታፐ የለታ ጋካናዉ ያን አስ ዴና። አራበ አሳይ ያን ባንታ ዱንካንያ ቶሎኮና፤ ዶርሰ ሄመይሳትካ ያን ባንታ ዉድያ ሄሞኮና።

²¹ ሽን ባዞ ዶአት ያን አቃና፤ ዎርካናት ኤንታ ኬ ኩማና፤ ጉቶት ያን ዳና፤ ያንቾት ያን ኬፃና፤ ባዞ ዴሻት ያን ጉፓና።

²² ኤንታ ኬታን ጎዳረይ ዋሳና፤ ኤንታ ካዎ ጋን ዎርካናት ቦጫና። እያ ዎደይ ማትስ፤ እያ ጋላሳይካ ጋምኤና።