Isayaasa 11 - ጌሻ ማፃፋ

እሰየፐ ከይዳ አጫ

¹ እሰየ ዱሩማይ አጫና፤ እያ ፃጱዋፐ አይፍያ ታሸይ ከያና።

² ጎዳ አያናይ እያ ቦላ ሸምፓና፤ ጭንጫተነ አኬካ አያናይ፥ ዞርያነ ዎልቃ አያናይ፥ ኤራተነ ጎዳስ ያይያ አያናይ፥ እያ ቦላ ሸምፓና።

³ ጎዳስ ያይድ ኡፋይቴስ፤ ባ አይፈይ በእዳባን ጮ ፕርደና፤ ዎይኮ ባ ሀይይ ስእዳባን ጮ ኩየና።

⁴ ሽን እ፥ ማንቆታስ ፅሎተን ፕርዳና፤ ሳአን ደእያ መቶታንቾታስ ሱረተን ኩያና። እ ባ እንፃርሳ ፃምአን ሳኣ ሾጫና፤ ባ ዶና ሸምፑዋን ኢታታ ዎና።

⁵ ፅሎተ እያ ፄሳ ዳንጮ ግዳና፤ አማነተ እያ ምያስ ሳቀ ግዳና።

⁶ ሱመይ ዶርሳ ማራራ እስፈ ዳና፤ ማሄይ ዴሻ ማራራ እስፈ ዝንአና። ማር ጋሞ ቡታለራ እስፈ ሄመታና፤ ጉ ናእ ኤንታ ሄማና።

⁷ ሚዝነ ባባን እስፈ ሄመታና፤ ኤንታ ማራት እስፈ ዝንአና፤ ጋሞይ ቦራዳ ካለ ማና።

⁸ ምያ ናእ ሾሻ ኦላን ካአና፤ ን ዱፅዳ ናእ ዎያ ሾሻ ኦላን ባ ኩሽያ የዳና።

⁹ ታ ጌሻ ዙማ ቦላ ኦንካ ቆሄተና ዎይኮ የና። አቢ ሃን ኩመይሳዳ ሳእ ጎዳ ኤሮን ኩማና።

¹⁰ ሄ ዎደ እሰየ ፃጶይ አሳስ ማላ ግዳና፤ ካዎተ ኡባይ እያ ኮያና፤ እ ደእያ በሳይ ቦንቸታና።

¹¹ ሄ ጋላስ ጎዳይ አትዳ ባ አሳ፥ አሶረፐ፥ ግብፀፈ፥ ጳትሮሳፐ፥ ቶጰፈ፥ ኤላማፐ፥ ሳናኦረፐ፥ ሀማታፐነ ዩሾይ አባን ተቀትዳ ቢታፈ ናምአን ኤሀናዉ ባ ኩሽያ ዛሪድ የዳና።

¹² እ ካዎተታስ ማላ ቁ ኦድ ደንና፤ እስራኤለፐ ላለትዳይሳታ እስፈ ጋና፤ ይሁዳፐ ሳኣ ኦይዱ ባጋን ዘረትዳይሳታ ሺሻና።

¹³ ሄሳፈ ጉየ፥ ኤፍሬማ ቃናተይ እያፐ ክቻና፤ ይሁዳ ሞርከተይ እያፐ ቃንፀታና። ኤፍሬም ይሁዳ ቃናተና፤ ይሁድ ኤፍሬማ ሞርከና።

¹⁴ ኤንቲ ዉሎሀ ባጋን ደእያ ፍልስፄመ ቢታ ቦላ ጉፕ ዎና፤ ኤንቲ ዶሎሀ ባጋን ደእያ አሳ ቦንቃና። ኤንቲ ኤዶመ ቦላነ ሞአበ ቦላ ባንታ ኩሽያ ዎና፤ አሞነት ኤንታዉ ሃረታና።

¹⁵ ጎዳይ ግብፀ ማታን ደእያ ዞኦ አባ መልሳና፤ ባ መልስያ ጫርኩዋራ ባ ኩሽያ ኤፍራፂሳ ሻፋ ቦላ ቃና። ያትድ አሳይ መላ በሳራ ፕናና መላ ላፑን ጉ ሻፋ ከስድ ሻካና።

¹⁶ እስራኤለ አሳይ ግብፀ ቢታፈ ከይያ ዎደ ኦገይ ከይዳይሳዳ፥ አትዳ እያ አሳይ፥ አሶረ ቢታፈ ስምያ ኦገይ ከያና።