Ibraawe 9 - ጌሻ ማፃፋ

ሳአ ፆሳ ኬን ደእያ ጎይኖ

¹ ኮይሮ ጫቁዋስ ፆሳ ጎይንያ ዎጋይነ ሳአ ፆሳ ኬይ ደኤስ።

² ዱንካነይ ኤቅስ። እያን ፆምፐ ዎያ ኮጫይ፥ ፃርጴዛይነ ጎዳ ስንን ዎያ ኡይይ ደኤስ፤ ሄ በሳይ ጌሻ በሳ ጌተቴስ።

³ ናምአን ማጋራጁዋፈ ጉየ ባጋራ ደእያ በሳይ ኡባፈ ጌሻ በሳ ጌተቴስ።

⁴ እያ ግዶን እፃነ ጩይስያ ዎርቃ ሳፅነይነ ዎርቃን ሜሸትዳ ጫቆ ታቦተይ ደኤስ። ሄ ጫቆ ታቦትያን ማናይ ደእያ ዎርቃ ፃሮይ፥ አጭዳ አሮና ፃምአይነ ሙሰ ህገይ ፃፈትዳ ናምኡ ሎቸ ሹቻት ደኦሶና።

⁵ ሄ ታቦትያፐ ቦላ ባጋራ አቶተ ካማ ባንታ ቀፍያን ገንያ ቦንቾ ክሩበት ደኦሶና። ሽን ሀእ ሄ ኡባ ቆንጭስድ ኦዳናዉ ዳንዳኦኮ።

⁶ ሀ ኡባይ ሀይሳዳ ጊግዳፐ ጉየ፥ ካህነት ኡባ ዎደ ባንታ ኦሱዋ ኦናዉ ዱንካንያስ ኮይሮ ክፍልያ ገሎሶና።

⁷ ሽን ካህነ ሀላቃ ፃላል ዱንካንያስ ናምአን ክፍልያ ላይፈ እስ ቶሆ ገሌስ። እ ያ ገልሸ ባ ናጋራ ግሾነ አሳይ ኤሮና ኦዳ ናጋራ ግሾ ሱ ያርሾ ኤኮና ገለና።

⁸ ኮይሮ ዱንካነይ ኤቅድ ደእሽን፥ ኡባፈ ጌሻ በሳ ኤፍያ ኦገይ ቡሮ ዶየትቦናይሳ ጌሻ አያናይ ሄሳን ኤርሴስ።

⁹ ሄስ ሀ ዎድያስ ሌምሶ፤ ፆሳስ እመትያ እሞይነ ያርሾይ ጎይንያ ኡራ ካሀ ጌሻናዉ ዳንዳኦናይሳ ሀይስ በሴስ።

¹⁰ ሄሳት ሙሳባ፥ ኡሻባነ ዱማ ዱማ ሜቻ ዎጋታ ኦደይሳታ። ኤንቲ ኦራ ዎጋይ ያና ጋካናዉ ኦሰትያ ካረ ባጋ ዎጋታ።

¹¹ ሽን ክርስቶስ ሀእ ኑ ደምዳ ሎኦባታስ ካህነ ሀላቃ ግድድ ይስ። እ ገልዳ ዱንካነይ ግታነ ፖሎ ግድዳይሳ። ሄ ዱንካነይ አሳ ኩሸን ኦሰትቤና ቃስ ሀ አላምያባ ግደና።

¹² ክርስቶስ ኡባፈ ጌሻ በሳ ገልያ ዎደ ዴሻ ሱነ ማር ሱ ኤክድ ገልቤና። ሽን መርና አቶተ እማናዉ ባ ሱ ኤክድ ዛረና ኦገን እስ ቶሆ ገልስ።

¹³ ዴሻ ሱይነ ኮርማ ሱይ፥ ፁገትዳ ኡሳ ብዶይ፥ ቱንዳ አሳ ቦላ ርጨትድ ኤንታና ጌሽያባ ግድኮ፥

¹⁴ መርና ጌሻ አያና ባጋራ ቦረይ ባይና ያርሾ ኦድ፥ ፆሳስ ባና እምዳ ክርስቶሳ ሱይ፥ ደኦ ፆሳ ጎይናና መላ ሀይቆ ካለያ ኦሱዋፐ ኑ ካሀ ዋት አድ ጌሸኔ?

¹⁵ ሄሳ ግሾ፥ ፄገትዳይሳት ፆሳይ እምዳ መርና ላታ ኤካና መላ ክርስቶስ ኦራ ጫቁዋስ ግዶ ግድድ ስገይሳ ግድስ። ሄስ ሀንዳይ አሳይ ኮይሮ ጫቁዋፐ ጋርሳን ደእያ ዎደ ኦዳ ናጋራፐ ኤንታና ዎዛናዉ እ ሀይቅዳይሳና።

¹⁶ ህዛ፥ ኬከይ ደእኮ፥ ሄ ኬክዳ ኡራ ሀይቆይ ኤረታናዉ ኮሼስ።

¹⁷ ኬክዳ ኡራይ ሀይቅኮ እያ ኬከይ ምኔስ። ኬክዳ ኡራይ ሀይቆና አትኮ እያ ኬከይ ኦና።

¹⁸ ሀር አቶሽን፥ ኮይሮ ጫቆይካ ሱ ባይና ምንቤና።

¹⁹ ሙሰይ ህገ ኪታ ኡባ አሳስ ኦድዳፐ ጉየ ማራ ሱነ ዴሻ ሱ ሃራ ዋላክድ፥ ዞኦ ዶርሳ እክሰነ ህሶጰ ውርጮ ኤክድ፥ ማፃፋ ቦላነ አሳ ቦላ ዉርፅስ።

²⁰ ሙሰይ አሳኮ፥ “ህንተ ናጋና መላ ፆሳይ ኪትዳ ሱ ጫቆይ ሀይሳ” ያግስ።

²¹ ሄሳዳካ፥ ዱንካንያ ቦላነ ኦያ ሚሸ ኡባ ቦላ ሱ ዉርፅስ።

²² ቱማካ ህገይ ገይሳዳ ጉባታፐ አትሽን፥ ኡባባይ ሱን ጌዬስ። ሱ ጉኮናሽን አቶተ ባዋ።

የሱሲ ፖሎ ያርሸትስ

²³ ሳሉዋባስ ሌምሶ ግድዳይሳት ኡባይ መሄ ያርሾን ጌያናዉ ኮሼስ። ሽን ሳሎባት ባንታ ሁጰን ሄሳፈ አያ ያርሹዋን ጌያናዉ ኮሼስ።

²⁴ ክርስቶስ ቱማ ፆሳ ኬስ ሌምሶ ግድዳ፥ አሳ ኩሸን ኦሰትዳ ኡባፈ ጌሻ በሳ ገልቤና። ሽን እ ሀእ ኑ ግሾ፥ ፆሳ ስንን በንታናዉ ሳሉዋ ገልስ።

²⁵ ካህነ ሀላቃይ ላይን ላይን ባ ሱ ግዶናይሳ ኤክድ፥ ኡባፈ ጌሻ በሳ ገሌስ። ሽን ክርስቶስ ዳሮ ቶሆ ባና ያርሻናዉ ሳሎ ገልቤና።

²⁶ ሄሳዳ ሀንዳባ ግድያኮ፥ ክርስቶስ አላመይ መቶሳፐ ዶምድ ዳሮ ቶሆ ዋየታናዉ ኮሼስ። ሽን ሀእ ዎድያ ዉርሰን ናጋራ ድጋናዉ ባና ያርሽድ ዛረና ኦገን እስ ቶሆ በንትስ።

²⁷ አስ ኡባይ እስ ቶሆ ሀይቃናዉ ሄሳፈ ጉየ ፕርደታናዉ በሴስ።

²⁸ ሄሳዳካ፥ ክርስቶስ ዳሮ አሳ ናጋራ ድጋናዉ እስ ቶሆ ያርሸትስ። ሽን እ ናጋራ ቶካናዉ ግዶናሽን፥ ባና ናገይሳታ አሻናዉ ናምአን ቆንጫና።