Ibraawe 7 - ጌሻ ማፃፋ

ካህንያ ማልከፃደቃ

¹ ማልከፃደቀይ፥ ሳሌማ ካዎይ፥ ኡባፈ ቦላ ፆሳ ካህነ። ሄ ማልከፃደቅ አብራሃመይ ካዎታ ኦል ፆንድ ስምሽን እያራ ጋሄትድ እያ አንጅስ።

² አብራሃመይ ባ ድእዳባ ኡባፈ እያዉ አስራታ ከስድ እሚስ። ማልከፃደቃ ሱንይ ኮይሮ “ፅሎተ ካዋ”፥ ናምአን፥ “ሳሌማ ካዎ” ብርሸይካ “ሳሮተ ካዋ” ጉሱ።

³ ማልከፃደቃስ አይያ ዎይኮ አዉ ዎይኮ ኮቻ ፓይዶይ ባዋ። እያ የለተስ ዶመ ዎይኮ እያ ደኡዋስ ዉርሰ ባዋ፥ ሽን ፆሳ ናአ ዳንድ መርናዉ ካህነ ግድስ።

⁴ ማልከፃደቅ አይ መላ ግቴኮ በእተ። ኑ አዋታ ማይዛይ፥ አብራሃመይ፥ ባ ደእዳባፐ እያዉ አስራታ እሚስ።

⁵ ካህነ ግድያ ሌወ ኮቻይ እስራኤለ አሳፐ፥ ሄስካ አብራሃመ ኮቸ ግድዳ ባንታ እሻታፐ አስራታ ኤካና መላ ህገይ ኪቴስ።

⁶ ማልከፃደቅ ሌወ ኮቸ ግዶና እፅኮካ አብራሃመፐ አስራታ ኤክስ፤ ኡፋይሳ ቃል ደእያ አብራሃመ አንጅስ።

⁷ ጉይ ግታን አንጀተይስ ፓላንና።

⁸ እስ ባጋራ፥ አስራታ ኤከይሳት ሀይቅያ አሳታ፥ ሽን ሀራ ባጋራ አስራታ ኤከይስ ደኦን ደኤስ ያግድ ኦደትዳይሳ።

⁹ ህዛ፥ አስራታ ኤክያ ሌወይ፥ አብራሃመ ባጋራ አስራታ እሚስ ጋናዉ ዳንዳኤቴስ።

¹⁰ አይስ ጊኮ፥ ማልከፃደቅ አብራሃመራ ጋሄትያ ዎደ ሌወይ የለትቦናባ ግድኮካ፥ ባ ማይዛ አብራሃመ ጉልባታን ደኤስ።

¹¹ እስራኤለ አሳስ ህገይ ሌወ ካህነተ ባጋራ እመትስ። ሀ ሌወ ካህነተይ ፖሎ ግድዳባ ግድያኮ አሮናይሳ መላ ግዶናሽን፥ ማልከፃደቃ መላ ሀራ ካህነ ሹማናዉ አይስ ኮሽዴ?

¹² ህዛ፥ ካህነት ላመትያ ዎደ ህገይካ ቃስ ላመታናዉ በሴስ።

¹³ ሀ ኑ እያባ ኦድያ ኡራይ ሀራ ኮቸ፤ እያ ሼሻፐ ኦንካ ያርሾ በሳን ካህነተን ኦቤና።

¹⁴ ኑ ጎዳይ ይሁዳ ሼሻፐ ይዳይስ ኤረትዳይሳ። ግዶሽን፥ ሙሰይ ካህነተባ ኦድሸ ይሁዳ ኮቻባ አይባካ ኦድቤና።

¹⁵ ማልከፃደቃ መላ ሀራ ካህነይ ይዳባ ግድያኮ ሀ ኑ ኦድያባይ አድ ቆንጫና።

¹⁶ እ ካህነ ግድዳይ ዮና ደኦ ዎልቃናፐ አትሽን፥ እያ ማይዛ ህገንነ ዎጋን ግደና።

¹⁷ ጌሻ ማፃፋይ፥ “ማልከፃደቃ ካህነተ መላ፥ ኔኒ መርናዉ ካህነ” ያግድ ማርካቴስ።

¹⁸ ኮይሮ ህገይ ዳቡራንቾነ ማዶናባ ግድያ ግሾ ሻረትስ።

¹⁹ ሙሰ ህገይ አይብንካ ፖሎ ኦናዉ ዳንዳእቤና። ሽን ኑኒ እያ ባጋራ ፆሳኮ ሺቅያ ኡባፈ አያ ኡፋይሳ ቃላይ ኑስ እመትስ።

²⁰ ክርስቶስ ካህነ ግድያ ዎደ ፆሳይ ጫቅስ፥ ሽን ሀራት ካህነ ግድዳ ዎደ ሄሳ መላ ጫቆይ ባዋ።

²¹ ሽን የሱሲ ጫቆን ካህነ ግድስ። ፆሳይ ያግድ ጫቅስ፤ “ጎዳይ ጫቅስ፤ እ ባ ቆፋ ላመና፤ ‘ኔኒ መርና ካህነ’ ” ያግስ።

²² ሀ ጫቁዋ ጋሶን የሱሲ ኑስ ኡባፈ አያ ቃላ ጫቁዋስ ዋሰ ግድስ።

²³ ካህነተን ኦና መላ ሀይቆይ ኤንታ ድግዳ ግሾ ኮይሮ ካህነታ ታይቦይ ዳሮ።

²⁴ ሽን የሱሲ መርናዉ ደእያ ግሾ እያ ካህነተ ሀሪ ላተና።

²⁵ ሄሳ ግሾ፥ እ ኡባ ዎደ ኤንታ ግሾ ጋናታናዉ መርናዉ ደእያ ግሾ ፆሳኮ እያ ባጋራ የይሳታ ፖሎ አሻናዉ ዳንዳኤስ።

²⁶ ህዛ፥ ኑስ ኮሽያባ እምያ፥ ጌሻይ፥ ቦረይነ ቱን ባይናይስ፥ ናጋራንቾታፐ ሻከትዳይስነ ሳሉዋፐ አድ ቅዳ ካህነ ሀላቃይ ኑስ ኮሼስ።

²⁷ እ ሀንኮ ካህነ ሀላቃታ መላ ኮይሮ ባ ናጋራ ግሾ፥ ካልድ አሳ ናጋራ ግሾ ጋላስ ጋላስ ያርሾ ያርሻናዉ ኮሸና። እ ባና ያርሽዳ ዎደ ዛረና ኦገን እስ ቶሆ ባና ያርሽስ።

²⁸ ሙሰ ህገይ ዳቡራንቾ አሳ ካህነ ሀላቃ ኦድ ሹሜስ። ሽን ህግያፈ ጉየ ይዳ ጫቆ ቃላይ መርናዉ ፖሎ ግድዳ ፆሳ ናኣ ሹምስ።