Ibraawe 6 - ጌሻ ማፃፋ

¹ ህዛ፥ ክርስቶሳባ ታማርስያ ኮይሮ ትምርትያ አግድ ክርስቶሳን ካሃማተኮ ቦስ። ሀይቆ ኦሶፐ ስሞባነ ፆሳ አማኖባ ኮይሮ ትምርትያኮ ጉየ ስሞኮ።

² ሄሳዳካ፥ ፅንቃተታባ፥ ኩሸ ዎሶባ፥ ሀይቆፐ ደንዶባነ መርና ፕርዳባ ዛር ታማሮኮ።

³ ፆሳይ ጊኮ ኑ ሄሳ ኦና።

⁴ እስ ቶሆ ፖኦይ ፖእዳይሳታ፥ ሳሎ እሞታ ኤክዳይሳታ፥ ጌሻ አያናን ሻከትዳይሳታ፥

⁵ ሎኦ ፆሳ ቃላነ ስንፈ ያና አላምያ ዎልቃ በእዳይሳታ፥

⁶ ጉየፐ ካድዳይሳታ ናጋራፐ ናምአን ዛራናዉ ዳንዳኤተና። አይስ ጊኮ፥ ኤንቲ ባንታ ዩዋስ ፆሳ ናኣ ዛር ካቅያ መላ ማስቃልያ ቦላ እያ ካቆሶናነ አሳ ስንን ካዉሾሶና።

⁷ ኡባ ዎደ እ ቦላ ቡክያ እራ ኡያዳ፥ ጎይዳ ኡራ ማድያ ካ እምያ ቢትያ ፆሳን አንጀትዳሮ።

⁸ ሽን አጉንነ ክንቾተ ዶልያ ቢትያ አይብባካ ማዱኩ፤ እዉ ባደይ ማታትስ፤ ዉርሰን ፁገታና።

⁹ ኑ ሲቆ እሻቶ፥ ኑኒ ሀይሳዳ ኦድያባ ግድኮካ፥ ህንተና አቶተኮ ካለያ ሎኦባይ ህንተዉ ደኤይሳ ኤሮስ።

¹⁰ ፆሳይ ሱረ ፕርደይሳ። ፆሳይ፥ ህንተ ኦዳ ኦሱዋነ ካሰ ግድን ሀእካ አማነይሳታ ማድድ፥ እያዉ ደእያ ሲቁዋ በስዳይሳ ዶገና።

¹¹ ህንተ ኡባይ ኡፋይሳን ናገይሳ ደማና ጋካናዉ ሀ ምኖተ ዉርሰ ጋካናዉ በሳና መላ ኑ አሞቶስ።

¹² ህንተ አማኖንነ ዳንዳአን ናግያ ኡፋይሳ ላትያ አሳ ዳናና መላፐ አትሽን፥ አዛላ ግዳና መላ ኮዮኮ።

ፆሳ ኡፋይሳ ቃላይ ስሰና

¹³ ፆሳይ አብራሃመስ እማና ግድ ጫቅዳ ዎደ ባፐ አያ ሀር ግት ባይና ግሾ ባ ሁጰን ጫቅስ።

¹⁴ እያኮ፥ “ታኒ ነና አንጃና፤ ነ ዘረካ ዳርሳና” ያግስ።

¹⁵ አብራሃመይ ዳንዳአን ናግድ ፆሳይ እማና ግዳ ኡፋይሳ ኤክስ።

¹⁶ አስ ጫቅሸ ባፐ ግታትያ ኡራን ጫቄስ፤ ሄ ጫቆይ ጌተትዳባ ምንድ፥ ፓላማ ኡባ ተቄስ።

¹⁷ ሄሳ ግሾ፥ ፆሳይ ባ ላመቶና ቆፋ ኡፋይሳ ቃላ ላተይሳታስ ቆንጭሳናዉ ኮይዳ ግሾ ጫቆን ምንስ።

¹⁸ ፆሳይ ዎርዶተና። እያ ኡፋይሳ ቃላይነ ጫቆይ፥ ናምአይካ ላመቶኮና። ሀ ናምኡባታን ኑ ስንን ደእያ ኡፋይሳ ኦይካናዉ ዳንዳአና መላ ገሸ ደማናዉ እያኮ ባቃትዳ ኑኒ፥ ዎልቃማ ምን ደማና።

¹⁹ ሀ ኡፋይሳይ ኑ ሸምፑዋ፥ ማርካበይ ቃፆናዳ ምን ኦይክያ ብራታ መላ። ሄ ኡፋይሳይ ማጋራጁዋፈ ጉየ ባጋን ደእያ ጌሻ በሳ ገልስ።

²⁰ የሱሲ ማልከፃደቃ ሹማተዳ መርናዉ ካህነ ሀላቃ ግድድ፥ ኑ ግሾ ኑፐ ስንትድ ሄ በሳ ገልስ።