Ibraawe 5 - ጌሻ ማፃፋ

¹ እስ እስ ካህነ ሀላቅ አሳ ግዶፈ ዶረትድ፥ ፆሳራ ጋያባን አሳ ግሾ እሞታነ ናጋራ ያርሾ ያርሻናዉ ሹመቴስ።

² እ ባ ሁጰን ዳቡራንቾ ግድያ ግሾ፥ ኤሮናይሳታስነ ባለይሳታስ ቃታናዉ ዳንዳኤስ።

³ እ ባ ናጋራ ግሾነ አሳ ኡባ ናጋራ ግሾ ያርሾ ያርሻናዉ በሰይ ሄሳሳ።

⁴ ኦንካ ሀ ቦንቹዋ ባዉ ኤካናዉ ዳንዳኤና፥ ሽን አሮን ካህነ ሀላቃ ግዳናዉ ፄግዳይሳዳ ፆሳን ፄገታናዉ በሴስ።

⁵ ሄሳዳካ፥ ክርስቶስ ካህነ ሀላቃ ግድያ ቦንቹዋ ባዉ ኤክቤና። ሽን ፆሳይ እያ፥ “ኔኒ ታ ናአ፤ ሀች ታ ነዉ አዋ ግዳስ” ያጌስ።

⁶ ቃስ ሀራሶን፥ “ማልከፃደቅ ካህነ ግድዳይሳዳ፥ ኔኒ መርናዉ ካህነ ግዳና” ያጌስ።

⁷ የሱሲ አሰ ግድድ ሀ አላምያን ደእያ ዎደ ባና ሀይቆፐ አሻናዉ ዳንዳእያ ፆሳ ዳሮ ዬሆንነ አፉን ዎስስ። እ፥ እያ ቦንችድ ኪተትዳ ግሾ ፆሳይ እያ ዎሳ ስእስ።

⁸ የሱሲ ፆሳ ናአ ግድኮካ ባ ዋየትዳ ዋያን ኪተተ ታማርስ።

⁹ ሄሳንካ፥ የሱሲ ባ ኦሱዋ ፖልዳፐ ጉየ ባዉ ኪተትያ ኡባይ መርና አቶተ ደማና መላ ጋሶ ግድስ።

¹⁰ ፆሳይ ማልከፃደቃ ሹምዳይሳዳ ካህነ ሀላቃ ኦድ እያ ሹምስ።

ህንተ አማኑዋን ዳቡሮፕተ

¹¹ ሀ ኑ ኦዳ ቦላ ጉጅ ኦዳናባይ ዳሮባይ ደኤስ፥ ሽን ህንተ አኬካይ ጉ ግድያ ግሾ ህንተዉ ኦድ ገልሳናዉ ዋይሴስ።

¹² ህንተ ሀኖደ አስታማረ ግዳናዉ በሴስ፥ ሽን ፆሳ ቃላ ኮይሮ ትምርትያ ህንተና ዛር ታማርስያ ሀራ አስ ኮሼስ። ህንተ ምኖ ካ ማናዉ ዳንዳኦና ግሾ ማ ኮሼስ።

¹³ ማ ፓሄትያ ኦንካ ዮጋ ናአ ግድያ ግሾ፥ ሎኦነ ኢታ ሻክ ኤረና።

¹⁴ ሽን ምኖ ካ ሎኦነ ኢታ ሻክ ኤርያ ካሃማ አሳሳ።