Ibraawe 3 - ጌሻ ማፃፋ

የሱሲ ሙሰፐ ቦላ

¹ ሄሳ ግሾ፥ ፆሳይ ፄግዳ ጌሻ እሻቶ፥ ኑ አማኖን ጎዳ ግድ ፄግያ ሀዋርያነ ካህነ ሀላቃ የሱሳ በእተ።

² ሙሰይ ፆሳ ኬ ኡባን አማነትዳይሳዳ የሱሲካ ባና ዶርዳ ፆሳስ አማነትዳይሳ።

³ ኬ ኬፀይስ ኬፈ አድ ቦንቸተይሳዳ የሱሲ ሙሰፐ አያ ቦንቾ ኤካናዉ በሴስ።

⁴ እስ እስ ኬ ኬፅዳ አስ ደኤስ፥ ሽን ኡባ ጊግስዳይ ፆሳ።

⁵ ሙሰይ ፆሳ ኬ ኡባን አማነትዳ አይለ ግድድ፥ ፆሳይ ስንፈ ጋናባስ ማርካ ግድስ።

⁶ ሽን ክርስቶስ ፆሳ ኬን ናአዳ አማነትዳይሳ። ኑኒ ኤካና ግድ ናግያ ኡፋይሳ ምንድ ናግኮ ፆሳ ኬ ግዶስ።

ፆሳ አሳስ ደእያ ሸምፖ

⁷ ሄሳ ግሾ፥ ጌሻ አያናይ ገይሳዳ፥ “ሀች ህንተ ፆሳይ ገይሳ ስእያ ዎደ፥

⁸ መላ ቢታን ፓጭያ ጋላስ፥ ህንተ አዋት ማካልዳይሳዳ፥ ህንተ ዎዛና ምንፍተ።

⁹ ህንተ አዋት ታና ፓጭዶሶና፤ ኦይታሙ ላይ ታ ኦሱዋ በእዶሶና።

¹⁰ ሄሳ ግሾ፥ ታ ሄ የለተ ሀንቀታዳ፥ ‘ኤንቲ ኡባ ዎደ ባንታ ዎዛናን ባሎሶና፤ ታ ኦግያ ኤርቦኮና’ ያጋስ።

¹¹ ሄሳ ግሾ፥ ታኒ ታ ሀንቁዋን ጫቃዳ፥ ‘ታ ሸምፖ በሳ ኡባካ ገሎኮና’ ያጋስ” ያጌስ።

¹² ታ እሻቶ፥ ህንተፈ ኦደንካ፥ ደኦ ፆሳፈ ህንተና ሻክያ ኢታነ አማኖና ዎዛን ዶና መላ ናገትተ።

¹³ ህንተፈ ኦናካ ናጋር ባለን፥ ባ ዎዛና ምንና መላ “ሀች” ያገትድ ፄገትሽን ጋላስ ጋላስ እሶይ እሱዋራ ዞረትተ።

¹⁴ ኑ ኮይሮ አማኑዋ ኑኒ ዉርሰ ጋካናዉ ምንድ ናግኮ፥ ክርስቶሳራ እስፈ ላታና።

¹⁵ ጌሻ ማፃፋን፥ “ሀች ፆሳይ ገይሳ ህንተ ስእያ ዎደ፥ ሄ ዎደ ኤንቲ ማካላተን ሀንዳይሳዳ፥ ህንተ ዎዛና ምንፍተ” ያግስ።

¹⁶ ፆሳይ ግያባ ስእድ ማካልዳይ ኦኔ? ሙሰይ ግብፀፈ ካለ ከስዳ ኡባ ግዶኮናዬ?

¹⁷ ፆሳይ ኦይታሙ ላይ ኦና ሀንቀትዴ? ናጋራ ኦዳይሳታነ ኤንታ አሀይ መላ ቢታን ዎ አትዳ አሳታ ግዶኮናዬ?

¹⁸ ቃስ ፆሳይ፥ “ታ ሸምፖ በሳ ገለከታ” ያግድ ጫቅዳይ፥ እያዉ ኪተቶና እፅዳ አሳፐ አትሽን፥ ኦደሴ?

¹⁹ ህዛ፥ ኤንቲ ሄ ሸምፖ በሳ ገሎና አትዳይ አማንቦና ግሾ፥ ግደይሳ ኑ በኦስ።