Ibraawe 2 - ጌሻ ማፃፋ

ግታ አንጆ

¹ ሄሳ ግሾ፥ ኑኒ ስእዳ ቱማፐ ሀራሶ ኤከቶና መላ ሄ ስእዳይሳ ምንድ ናጋናዉ በሴስ።

² ህዛ፥ ኪታንቾታ ባጋራ ኦደትዳ ቃላይ ቱማ ግድኮ፥ እያ ናቆይነ ኪተቶና እፆይ ፕርዳ ኤህያባ ግድኮ፥

³ ያትን፥ ኑኒ ሀይሳ መላ ግታ አቶተ እፃስ ጊኮ፥ ዋንድ አታኔ? ኮይሮ ጎዳይ ባ ሁጰን ሄ አቶተ ኦድስ፤ ቃስ እያፐ ስእዳይሳት ኑስ ጌሽድ ማርካትዶሶና።

⁴ ቃስ ፆሳይ ማላታታን፥ ኦራባታን፥ ዱማ ዱማ ማላታንነ ባ ሸንያዳ እምዳ ጌሻ አያና እሞታታን ማርካተ ምንስ።

የሱሲ አሰ ግድስ

⁵ ፆሳይ ሀ ኑኒ ኦድያ ስንፈ ያና አላምያ፥ ኪታንቾታስ ሃርስቤና።

⁶ ጌሻ ማፃፋይ እስ በሳን ሀይሳዳ ያጌስ፦ “ኔኒ አሳስ ቆፓናዉ አስ አይቤ? ዎይኮ ኔኒ እያ ናጋናዉ እ አይቤ?

⁷ ነ እያ ኪታንቾታፐ ጉ ዎደስ ጉዳሳ፤ እያ ሁጰን ቦንቾነ ሳባ ካላቻ ዎዳሳ።

⁸ ቃስ ኡባባ እያ ቶሁዋፐ ጋርሳን ዎዳሳ” ያጌስ። ፆሳይ ኡባባ እያዉ ሃርስያ ዎደ እያዉ ሃረትቦናባይ አይብካ ባዋ። ሽን ሀእ ኡባባይ እያዉ ሃረትሽን ኑኒ በእቦኮ።

⁹ ሽን ኑኒ ኪታንቾታፐ ጉራ ጉፅዳ የሱሳ በኦስ። ፆሳ አ ኬሀተ ጋሶን የሱሲ አሳ ኡባስ ሀይቅስ። እ ዋየ ሀይቆ ሀይቅዳ ግሾ፥ ቦንቾነ ሳባ ካላቻ እያ ሁጰን ዎስ።

¹⁰ ኡባባይ እያዉነ እያ ጋሶን መትዳ ፆሳይ፥ ዳሮ ናይታ ባራ ቦንችሳናዉ ኤንታ አቶተ ሁጵያ፥ የሱሳ ዋየን ፖሎ ኦናዉ እያዉ በሴስ።

¹¹ የሱሲነ ሄ እ ጌሽዳ አሳ ኡባይ እስ አዋ ናይታ። የሱሲ ኤንታ፥ “ታ እሻታ” ግድ ፄጋናዉ ዬላቶናይ ሄሳሳ።

¹² የሱሲ፥ “ታኒ ነ ሱን ታ እሻታስ አዋጃና፤ ደርያ ሺቁዋን ነና ጋላታና” ያጌስ።

¹³ ቃስ እ፥ “ታኒ ታ አማኑዋ እያ ቦላ ዎና” ቃስካ፥ “ፆሳይ ታዉ እምዳ ናይታራ ታ ሀይሳን ደአይስ” ያጌስ።

¹⁴ ናይት አሾይነ ሱ ደኤይሳታ ግድያ ግሾ፥ የሱሲካ ኤንታዳ አሰ ግድስ። እ ሄሳ ኦዳይ፥ ሀይቆ ቦላ ዎልቅ ደእያ ፃላህያ ባ ሀይቁዋን ይሳናሳ።

¹⁵ ቃስ ባንታ ደኦ ላይ ኡባን ሀይቆ ያሻን አይለትድ ደኤይሳታ አይለተፈ ዎዛናሳ።

¹⁶ ቱማ የሱሲ ይዳይ አብራሃመ ኮቸ ማዳናሳፈ አትሽን፥ ኪታንቾታ ማዳናሳ ግደና።

¹⁷ አሳ ናጋራይ አቶ ጌተታና መላ ፆሳ ስንን ማርያነ አማነትዳ ካህነ ሀላቃ ግድስ። ሄሳ ግሾ፥ እ ኡባባን ባ እሻታ ዳናናዉ በሴስ።

¹⁸ እ ባ ሁጰን ፓጨን ዋየትዳ ግሾ ፓጨተይሳታ ማዳናዉ ዳንዳኤስ።