Ibraawe 13 - ጌሻ ማፃፋ

ዉርሰ ዞረ

¹ አማንያ አሳዳ እሶይ እሱዋራ ፖሎ ሲቀትተ።

² እማ ሞከይሳ ዶጎፕተ። እስ እስ አሳት ሄሳዳ ኦሸ ኤሮና ኪታንቾታ ሞክዶሶና።

³ ቃሾን ደኤይሳታ ህንተካ ኤንታራ እስፈ ቃሾን ደእያዳ ኦድ ኤንታና ቆፕተ። ዋየ ኤክያ አሳራ እስፈ ህንተካ ዋየ ኤክያዳ ኦድ ኤንታና ቆፕተ።

⁴ ኤኮይነ ገሎይ አሳ ኡባ ማታን ቦንቸትዳባ ግዶ። ቃስ ፆሳይ ላይማተይሳታነ ላመይሳታ ፕርዳናዉ ደእያ ግሾ አዝናይነ ማችያ እሶይ እሱዋስ አማነታናዉ በሴስ።

⁵ ሚሸ ሲቆፐ ህንተና ናግተ፤ ህንተዉ ደእያባን አልተ። ፆሳይ፥ “ታኒ ነና ኡባራካ የግከ ዎይኮ አግከ” ያግስ።

⁶ ሄሳ ግሾ፥ ኑኒ አማነትድ፥ “ጎዳይ ታና ማደይሳ፤ ታ ያይከ፤ አስ ታና አይ ኦኔ?” ያጎስ።

⁷ ፆሳ ቃላ ኮይሮ ህንተዉ ኦድዳ ህንተና ካለይሳታ ቆፕተ። ኤንቲ ዋንድ ደእዳኮ ኤንታ ዱሳ በእድ ኤንታ አማኑዋ ካልተ።

⁸ የሱስ ክርስቶሲ ዝነካ ሀችካ መርናዉካ ላመተና።

⁹ ዱማ ዱማ ኦራ ትምርተን ሀራሶ ብድ ዮፕተ፤ ቦፕተ። ኑ ዎዛናይ ፆሳ አ ኬሀተን ምናናዉ በሴስፐ አትሽን፥ ምን ጎኦና ካን ዎጋ ፖሎን ግዶፖ።

¹⁰ ሽን ዱንካንያ ግዶን ኦያ ካህነት ሄ ያርሾ ካፈ ማናዉ ኤንታዉ ማት ባይና ያርሾ በሳይ ኑስ ደኤስ።

¹¹ ካህነ ሀላቃይ ናጋራ ያርሾስ መሄ ሱ ኤክድ ያርሻናዉ ኡባፈ ጌሻ በሳ ገሌስ። ሽን ሄ መህያ አሹዋ ድርሳፈ ካረን ፁጌስ።

¹² ሄሳዳካ፥ የሱሲ ደርያ ናጋራፐ ባ ሱን ጌሻናዉ ካታማ ፐንግያፈ ካረን ዋየትስ።

¹³ ህዛ፥ ኑኒ ቦርያ ቶክድ ድርሳፈ ካረ እያኮ ከዮስ።

¹⁴ ህዛ፥ ኑስ ሀይሳን መርናዉ ደእያ ካታም ባዋ፥ ሽን ኑኒ ያና ካታማ ናጎስ።

¹⁵ ህዛ፥ የሱሳ ባጋራ ኡባ ዎደ እያ ሱንስ ማርካትያ መተርሻ ጋላታ ያርሾ ፆሳስ እሞስ።

¹⁶ ሎኦባ ኦሶነ ህንተዉ ደእያባፐ መቶትዳ አሳስ እሞ ዶጎፕተ። ህዛ፥ ሄሳ መላ ያርሾይ ፆሳ ኡፋይሴስ።

¹⁷ ህንተና ካለይሳታስ ኪተትተ፤ ኤንቲ ግያባ ኦተ። ኤንቲ ባንታ ኦያባስ ፆሳ ስንን ኦይሸታናዉ ደእያ ግሾ፥ ህንተና ሄሞሶና። ህንተ ኤንታዉ ኪተትኮ፥ ባንታ ኦሱዋ ኡፋይትድ ኦና፤ ሄስ ሀኖና እፅኮ፥ ኤንቲ አዛንሸ ኦና፤ ሄስ ህንተና አይብባካ ማደና።

¹⁸ ኑስ ፆሳ ዎስተ። ኑ ካሀይ ጌሽ፤ ኑ ኡባ ዎደ ሎኦባ ኦናዉ ኮዮስ።

¹⁹ ታኒ ህንተኮ ኤለሳዳ ያና መላ ህንተ ታዉ ምንድ ፆሳ ዎሳና መላ ታ ህንተና ሀዳራ ጋይስ።

²⁰ ሳሮተ ፆሳይ፥ ዶርሳ ሄምያ ኑ ጎዳ የሱሳ፥ ባ መርና ጫቆ ሱን ሀይቆፐ ደንዳይስ፥

²¹ እያ ሸንያ ኦና መላ ሎኦባ ኡባን እ ህንተና ዳንጭሶ። እያ ኡፋይስያባ የሱስ ክርስቶሳ ባጋራ ኑናን ፆሳይ ኦ። የሱስ ክርስቶሳ ባጋራ ፆሳስ መርናፐ መርና ጋካናዉ ቦንቾይ ግዶ። አምንእ።

²² ታ እሻቶ፥ ታ ሀ ዳብዳብያ ህንተዉ ቃንን ፃፍዳ ግሾ፥ ህንተ ታ ዞርያ ሳለቶና ኤካና መላ ታ ህንተና ዎሳይስ።

²³ ኑ እሻይ፥ ፅሞትዮስ ቃሾፐ ብለትዳይሳ ኤርተ። እ ኤለስድ ታኮ ዪኮ ታ እያራ ህንተና ባዳ በአና።

²⁴ ህንተና ካለይሳታነ አማንያ ኡባ ሳሮ ጊተ። ፃለፐ ይዳ አማንያ አሳይ ህንተና ሳሮ ያጎሶና።

²⁵ ፆሳ አ ኬሀተይ ህንተ ኡባራ ግዶ። አምንእ።