Ibraawe 12 - ጌሻ ማፃፋፆሳይ ኑስ አዋ 1 ህዛ፥ ሻራዳ ኑ ዩሹዋን ዳርዳ ሀይሳ መላ ማርካት ኑ ማታን ደእያ ግሾ ኑና ብያ ኡባነ ኦይክድ ሃርያ ናጋራ ድግድ፥ ኑ ስንን ደእያ ጋደ ዎ ገንጫን ዎፆስ። 2 ኑ አማኑዋስ ኦገ ዶይዳይሳነ ኑ ዉርሰ ፖሉዋኮ ኑና ጋያ የሱሳ ቦላ ኑ አይፍያ ዎስ። የሱሲ ዎደፐ ደእያ ኡፋይሳ ግሾ ማስቃልያ ዋይያ ዳንዳእድ፥ ዬላ ሀይቁዋ ካድ፥ ፆሳፈ ኡሻቻ ባጋን ኡትስ። 3 ህዛ፥ ህንተ ዶጭድ ኡፋይስ ቃንፆና መላ ናጋራንቾታ እፁዋ ዳንዳእዳ የሱሳ ቆፕተ። 4 ናጋራራ ደእያ ባፅያን ቡሮ ሱ ጉሳና ጋካናዉ ኤቀትበከታ። 5 ፆሳይ ባ ቃላን፥ ባ ናይታዳ ህንተና ዞርዳይሳ ዶግደታ። “ታ ናአዉ፥ ፆሳ ሴራ ለቆፋ፤ እ ነና ሴርያ ዎደ ኡፋይስ ቃንፆፋ። 6 ጎዳይ ባ ዶስያ ኡራ ሴሬስ፤ ቃስ ባ ናአዳ ኤክያ ኡባ ጋራፈስ” ያጌስ። 7 ፆሳይ ህንተና ባ ናይታዳ ሴርያ ዎደ ገንጭተ፤ አዋይ ሴሮና ናእ ኦኔ? 8 ፆሳይ ባ ናይታ ኡባ ሴሬስ፤ ህንተ ሴረቶና እፅኮ ቱማ እያ ናይታ ግዶናሽን ባላኮ ናይታ። 9 ቃስ ኑና የልዳ ኑ አዋት ኑና ሴሮሶና፤ ኑካ ኤንታና ቦንቾስ። ያትን፥ ኑኒ ኑ አያና አዋስ ዋንድ አድ ሃረቶኮ? 10 ህዛ፥ ኑ አዋት ባንታዉ ሎኦ ዳንዳ መላ ጉ ዎደስ ኑና ሴርዶሶና። ሽን ፆሳይ ኑ ጎአስ፥ ኑ እያ ጌሻተን ሻከታና መላ ሴሬስ። 11 ኑኒ ሴረትያ ዎደ ይሎዬስፐ አትሽን፥ ኡፋይሰና። ሽን ጉየፐ ሴረተ ሜዘትዳ አሳስ ሴራይ፥ ሳሮይ ኩምዳ ፅሎተ አይፈ አይፍሴስ። ዞረነ ናግሶ 12 ህዛ፥ ህንተ አርጋጭዳ ቀስያነ ህንተ ዳቡርዳ ጉልባታ ምንተ። 13 ዎበይ ፓፃና መላፐ አትሽን፥ አድ መቆና መላ ህንተ ቶሁዋስ ሱረ ኦገ ጊግስተ። 14 አሳ ኡባራ ሳሮ ዳናዉነ ጌሻተን ዳናዉ ምንተ፤ ጌሻተ ባይና ኦንካ ጎዳ በአናዉ ዳንዳኤና። 15 ህንተፈ ኦደስካ ፆሳ አ ኬሀተይ ፓጮናዳ፥ ቃስ ጫሞ አይፈ አይፍድ ዳሮ አሳ ቱንስያነ ይስያ ዘረዳ ግዶና መላ ናገትተ። 16 ህንተ ግዶን ላይማትያ አስ ዎይኮ እስ ቶሆ ምያ ካስ ባ ባይራተ ቶችድ ባይዝዳ ኤሳዌ መላ አስ ዶና መላ ናገትተ። 17 ጉየፐ ኤሳዌይ ሄ አንጁዋ ኤካናዉ ኮይዳ ዎደ ድገትዳይሳ ኤሬታ። እ ሄ አንጁዋ አፉን ምንድ ኮይኮካ፥ ደማናዉ ዳንዳእቤና፤ እ ናጋራፐ ስማናዉ ቃዳ ደምቤና። 18 ህንተ ኩሸን ቦሸትያ ሲና ደርያኮ፥ ኤፅያ ታማኮ፥ ማኮ፥ ጫጋናኮ፥ ጎትያኮ፥ 19 ሞይዘ ፑኑኮ ዎይኮ ቃላይ ስኤትያ በሳኮ ይቤከታ። ሄ ቃላ ስእዳ አሳይ ሀራ ጉዣ ቃላ ስኦና መላ ዎስዶሶና። 20 አይስ ጊኮ፥ “ሀር አቶሽን፥ ዶእ ሄ ዙማ ቦችኮ፥ ሹቻን ጫደትድ ሀይቆ” ያግዳ ኪታ ኤንቲ ቶካናዉ ዳንዳእቦኮና። 21 ሄ ሀንያባይ ዳሮ ዳጋንያባ ግድዳ ግሾ ሙሰይካ፥ “ታኒ ያሻን ኮኮራስ” ያግስ። 22 ሽን ህንተ ፅዮነ ዙማኮ፥ ደኦ ፆሳይ ደእያ የሩሳላመ ካታማኮ፥ እስፈ ሺቅድ ኡፋይትያ ዳሮ ሙኩሉ ኪታንቾታኮ ሳሉዋ ይደታ። 23 ኤንታ ሱንይ ሳሎን ፃፈትዳ ዎሳ ኬ ባይራ ናይታኮ፥ አሳ ኡባ ዳይና ግድዳ ፆሳኮ፥ ፖሎ ግድዳ ፅሎ አሳ አያናታኮ ይደታ። 24 ኦራ ጫቁዋስ ግዶ ግድድ ስገያ የሱሳኮ፥ አበላ ሱፈ አያባ ኦድያ ዉርፀትዳ ሱኮ ይደታ። 25 ህንተዉ ኦድያ ኡራ ቃላ እፃስ ጎና መላ ናገትተ። ካሰይሳት ሳአን ግድድ ኦድዳ ኪታ ስኦና እፅድ፥ ከስ ኤክቦናባ ግድኮ፥ ያትን፥ ሳሎን ግድድ ኦድያ ቃላ ኑኒ እፃስ ጊኮ ዋንድ ከስ ኤካኔ? 26 ሄ ዎደ እያ ቃላይ ሳአ ቃስ። ሽን ሀእ ታኒ፥ “ሳአ ፃላላ ግዶናሽን፥ እስ ቶሆ ዛራዳ ሳሉዋካ ቃና” ያግስ። 27 “እስ ቶሆ ዛራዳ” ግያ ቃላይ ቃፆናባይ ምንድ ዳናይሳ፥ ቃስ ቃፅያ መትዳባት ያናይሳ በሴስ። 28 ኑኒ ቃፃናዉ ዳንዳኦና ካዎተ ኤክያ ግሾ ፆሳ ጋላቶስ፤ ፆሳ ኡፋይስያ ኦገን ቦንቾንነ ያሻተን እያ ጎይኖስ። 29 ህዛ፥ ኑ ፆሳይ ቱማ ፁግያ ታማ። |
The Word for the World International and The Word for the World Ethiopia