Ibraawe 10 - ጌሻ ማፃፋ

¹ ሙሰ ህገይ ያናዉ ደእያ ሎኦባታስ ኩያፐ አትሽን፥ ባ ሁጰን ዋና ግደና። ሄሳ ግሾ፥ ላይን ላይን ፓጨይ ባይና ያርሸትያ ያርሾይ ጎይናናዉ ሺቅያ አሳ ፖሎ ኦናዉ ዳንዳኤና።

² ህገይ ኤንታ ፖሎ ኦናዉ ዳንዳእዳባ ግድያኮ ኤንቲ ያርሾ ያርሸይሳ አጋናሽን። ቃስ ጎይናናዉ ሺቅያ አሳይ ባንታ ናጋራፐ ጌያና፤ ኤንታ ካሀይካ ኤንታና ባላ ግድ ሞተና።

³ ሽን ሄ ያርሾት ላይን ላይን ናጋራ ቆፍሶሶና።

⁴ አይስ ጊኮ፥ ኮርማ ሱነ ዴሻ ሱ ናጋራ ድጋናዉ ዳንዳኤና።

⁵ ሄሳ ግሾ፥ ክርስቶስ ሀ አላምያ ይዳ ዎደ ሀይሳዳ ያግስ: “ኔኒ ያርሾነ እሞ ኮያባካ፤ ሽን ታዉ አሾ ጊግሳዳሳ።

⁶ ኔኒ ፁሳ ያርሾንነ ናጋራ ያርሾን ኡፋይታባካ።

⁷ ሄ ዎደ፥ ‘ታ ግሾ ማፃፋን ፃፈትዳይሳዳ፥ ጎዳዉ፥ ታኒ ነ ሸንያ ኦናዉ ያስ’ ያጋስ” ያግስ።

⁸ ያርሾይ ያርሸታና መላ ህገይ ኪትያባ ግድኮካ፥ ክርስቶስ ኮይሮ፥ “ኔኒ ያርሾነ እሞ፥ ፁሳ ያርሾነ ናጋራ ያርሾ ኮያባካ፤ ኤንታን ኡፋይታባካ” ያግስ።

⁹ ካልድካ እ፥ “ጎዳዉ፥ ሄኮ ታኒ ነ ሸንያ ኦናዉ ያስ” ያግስ። ሄሳ ግሾ፥ ክርስቶስ ናምአንዋ ኤሳናዉ ኮይሮይሳ ሻርስ።

¹⁰ የሱስ ክርስቶሲ ፆሳ ሸንያ ኦድ፥ ዛረና ኦገን እስ ቶሆ ባ አሹዋ ያርሽዳ ግሾ ኑኒ ጌይዳ።

¹¹ ካህነ ኡባይ፥ ናጋራ ድጋናዉ ዳንዳኦና ሄ ያርሾታ ጋላስ ጋላስ ያርሽሸ ኤቅድ ባ ኦሱዋ ኦስ።

¹² ሽን ክርስቶስ ኡባ ዎደስ ግድያ እስ ናጋራ ያርሹዋ ያርሽድ፥ ፆሳፈ ኡሻቻ ባጋን ኡትስ።

¹³ ሄ ዎድያፐ ዶምድ እያ ሞርከት እያ ቶሆይ የያባ ኦና ጋካናዉ ናጌስ።

¹⁴ እ ዛረና ኦገን እስ ቶሆ ባና ያርሽዳ ያርሹዋን ጌሻታ መርናዉ ፖሎ ኦስ።

¹⁵ ቃስ ጌሻ አያናይ ኑስ ሀይሳ ማርካቴስ። ኮይሮ ሀይሳዳ ያግስ፦

¹⁶ “ሄ ጋላሳታፐ ጉየ፥ ታኒ ኤንታራ ጫቅያ ጫቆይ ሀይሳ፦ ታኒ ታ ህግያ ኤንታ ቆፋን ዎና፤ ኤንታ ዎዛናን ፃፋና” ያጌስ።

¹⁷ ካልድካ፥ “ታኒ ኤንታ ናጋራነ ኤንታ ኢታ ኦሱዋ ዛራ ቆፕከ” ያጌስ።

¹⁸ ህዛ፥ ናጋር አቶ ጌተትዳፐ ጉየ ናጋራስ ያርሸትያ ያርሾ ኮሸና።

አነ ፆሳኮ ሺቆስ

¹⁹ ህዛ፥ ታ እሻቶ፥ ኑኒ የሱሳ ሱ ባጋራ ኡባፈ ጌሻ በሳ ገላናዉ ኑስ ምኖተ ደኤስ።

²⁰ ኑ ገላናይ ክርስቶስ ባ ማጋራጁዋ፥ ሄስካ ባ አሹዋ ባጋራ ኑስ ዶይዳ ኦራነ ደኦ ግድዳ ኦግያና።

²¹ ኑስ ፆሳ ኬ ቦላ ሹመትዳ ግታ ካህነ ሀላቃይ ደኤስ።

²² ኑኒ ኢታ ካሀፐ ጌያናዉ ኑ ዎዛና ዉርፀትድ፥ ኑ አሳተ ፅሎ ሃን ሜጨትድ፥ ሱረ ዎዛናንነ ፖሎ አማኖን ፆሳኮ ሺቆስ።

²³ ኑስ ኡፋይሳ ቃላ እምዳ ፆሳይ አማነትዳይሳ ግድያ ግሾ ኑ ማርካትያ ኡፋይሳ ኡሻች ሀድርስ ጎና ምንድ ኦይኮስ።

²⁴ እሶይ እሱዋ ሲቆስነ ሎኦ ኦሶስ ዋት ደንነኮ አነ ቆፖስ።

²⁵ እሶት እሶት ሜዘ ኦድ ሺቀይሳ አግዳይሳዳ ኑኒ እስፈ ሺቀይሳ አጎኮ። ሽን ጎዳ ጋላሳይ ማታትዳይሳ ህንተ በእያ ግሾ ሄሳ ካሰይሳፈ አድ ኦተ።

²⁶ ኑኒ ቱማ ኤራተ ኤክዳፐ ጉየ ኤርሸ ናጋራ ኦኮ፥ ህዛፐ ኑ ናጋራ ግሾ ያርሸታና ያርሾይ ባዋ።

²⁷ ሽን ህዛ አትዳይ ያሽያ ፕርዳነ ፆሳ ሞርከታ ፁጋናዉ ጊግዳ ዎልቃማ ታማ።

²⁸ ሙሰ ህግያ ኪተቶና እፅዳ ኦንካ ናምኡ ዎይኮ ሄ አስ እያ ቦላ ማርካትኮ ቃይ ባይናሽን ሀይቄስ።

²⁹ ያትን፥ ፆሳ ናኣ ካዳ ኡራይ፥ ባና ጌሽዳ ፆሳ ጫቆ ሱ ቱናባዳ ቆፕዳ ኡራይ፥ ቃስ አ ኬሀተ አያና ጫይዳ ኡራይ፥ አይ መላ ኢታ ፕርዳ ኤካናዉ በሲያኮ አነ ቆፕተ።

³⁰ ህዛ፥ “ሀሎ ከሶይ ታባ፥ ታ ኩሸ ዛራና” ግዳይሳ ኑ ኤሮስ። ቃስካ፥ “ጎዳይ ባ አሳ ፕርዳና” ያግስ።

³¹ ደኦ ፆሳ ኩሸን ኩንደ ዳሮ ያሼስ።

³² ህንተዉ ፆሳ ፖኦይ ፖእዳፐ ጉየ ህንተ ዳሮ ዋየን፥ ግታ ባፀን ገንጭዳ በን ዎድያ ቆፕተ።

³³ እስ እስ ቶሆ ህንተ አሳ ስንን ጫየትደታ፤ ጎደትደታ፤ እስ እስ ቶሆ ሄሳ መላ ዋየይ ጋክዳ አሳራ እስፈ ዋይደታ።

³⁴ ቃሾን ደእያ አሳስካ ቃትደታ። ህንተዉ ሎኦነ ዮና ሻሎይ ሳሎን ደኤይሳ ህንተ ኤርዳ ግሾ ህንተ ሻሎይ ቦንቀትያ ዎደ ኡፋይሳን ዳንዳእደታ።

³⁵ ሄሳ ግሾ፥ ግታ ዎይቶይ ደእያ ህንተ ምኖተ የጎፍተ።

³⁶ ፆሳ ሸንያ ፖልድ፥ እ ህንተዉ እማና ግዳ ኡፋይሳ ኤካና ጋካናዉ ገንጫናዉ ኮሼስ።

³⁷ ህዛ፥ ጌሻ ማፃፋን፥ “እ፥ ያና ግዳይስ ያና፤ ጋምኤና።

³⁸ ሽን ታ ፅሎይ፥ ታናን አማነትድ ዳና፤ ኦንካ ጉየ ስምኮ ታና ኡፋይሰና” ያጌስ።

³⁹ ኑኒ አማንድ አትያ አሳ ባጋፈ አትሽን፥ ጉየ ስሚድ ይያ አሳ ባጋ ግዶኮ።