Ibraawe 1 - ጌሻ ማፃፋ

ናአይ ኪታንቾታፐ ቦላ

¹ ካሰ ፆሳይ፥ ኑ አዋታስ ናበታ ባጋራ ዱማ ዱማ ኦገን ዳሮ ዎደ ኦድስ።

² ሽን ሀ ዉርሰ ዎድያን ኡባ እያ ላትስዳ ቃስ አላመ እያ ባጋራ መዳ ባ ናኣ ባጋራ ኑስ ኦድስ።

³ ናአይ ፆሳ ቦንቹዋ ጶለነ ኩመ ፆሳ ፆሳተ ኤክድ፥ ባ ዎልቃማ ቃላን ሀ አላምያ ካትስድ ኦይክስ። አሳ ኤንታ ናጋራፐ ጌሽዳፐ ጉየ ኡባፈ ቦላ ፆሳ ኡሻቻ ባጋን ሳሉዋን ኡትስ።

⁴ እያዉ እመትዳ ሱንይ ኪታንቾታ ሱንፈ ቦላ ግደይሳዳ እ ኤንታፈ ቦላ።

⁵ ህዛ፥ ፆሳይ ኪታንቾታፐ ኦደኮ፥ “ኔኒ ታ ናአ፤ ታ ሀች ነዉ አዋ ግዳስ” ግዴ? ዎይኮ ቃስ ኦደኮ፥ “ታኒ እያዉ አዋ ግዳና፤ እካ ታዉ ናአ ግዳና” ግዴ?

⁶ ቃስ ፆሳይ ባ ባይራ ናኣ ሀ አላምያ ኪትሸ፥ “ፆሳ ኪታንቾት ኡባይ እያዉ ጎይኖ” ያግስ።

⁷ ፆሳይ ኪታንቾታባ ኦድሸ፥ “ፆሳይ ባ ኪታንቾታ ጫርኮ፥ ባ አይለታ ታማ ላጮ ኦስ” ያጌስ።

⁸ ሽን ባ ናአባ ኦድሸ፥ “ፆሳዉ፥ ነ አራታይ መርናዉ ደኤስ። ነ ካዎተ ነ ፅሎተን አይሳሳ።

⁹ ኔኒ ፅሎተ ዶሳዳሳ፤ ኢታ እፃዳሳ። ፆሳይ፥ ነ ጎዳይ፥ ነና ነ ላገታፐ አድ ዶርስ፥ ኡፋይሳ ዛይተ ነና ትይስ” ያጌስ።

¹⁰ ፆሳይ ዛሪድ፥ “ጎዳዉ፥ ኮይሮ ኔኒ ሳአ መዳሳ፤ ሳሎት ነ ኩሸ ኦሶ።

¹¹ ሄሳት ኡባይ ያና፤ ሽን ኔኒ ዳና። ኤንቲ ኡባይ አፍላዳ ዉራና።

¹² ኔኒ ኤንታ ሳሌናዳ ፃፃና፤ ቃስ ኤንቲ አፍላዳ ላመታና። ሽን ኔኒ ኡባ ዎደ ነና፤ ነ ላይይካ ዉረና” ያጌስ።

¹³ ሽን ፆሳይ ኪታንቾታፐ ኦደኮ፥ “ታኒ ነ ሞርከታ ነ ቶሆይ የያሶ ኦና ጋካናዉ፥ ሀይሳን ታፐ ኡሻቻ ባጋን ኡታ” ግዴ?

¹⁴ ኪታንቾት ኡባይ አቶተ ደማናዉ ደእያ አሳታ ማዳናዉ ፆሳይ ኪትዳ አያናታ ግዶኮናዬ?