Hose 6 - ጌሻ ማፃፋ

እስራኤለይ ስምቤና

¹ እስራኤለ አሳይ፥ “ሃይተ! አነ ጎዳኮ ስሞስ። እ ኑና መንረስ፥ ሽን እ ኑና ኮላና፤ እ ኑና ማዱንፅስስ፥ ሽን እ ኑ ማዱን ቃቻና።

² ናምኡ ጋላሳፐ ጉየ እ ኑና ፓና፤ ሄን ጋላሳን ኑ እያ ስንን ዳና መላ ኑና ደንና።

³ አነ ጎዳ ኤሮስ፤ እያ ኤራናዉ ምንድ ካሎስ። ፃልቀይ ዶለይሳዳ እ ቆንጫና፤ ቶርቸ እር የይሳዳ እ ኑኮ ያና” ያግዶሶና።

⁴ ጎዳይ፥ “ታ ህንተና ኤፍሬማ አሳ ዋቶ? ታ ህንተና ይሁዳ አሳ ዋቶ? ህንተ ሲቆይ ዎንታ ፃሳ መላ፤ ኤለስድ ይያ አካ መላ።

⁵ ሄሳ ግሾ፥ ታኒ ናበታ ባጋራ ህንተና ቃንፀረስ፤ ታ ዶናፐ ከይዳ ቃላን ህንተና ዎስ። ታ ፕርዳይ ህንተ ቦላ ፖኦዳ ዋጋግ ጋና።

⁶ ታ ያርሾ ግዶናሽን ማሮታ ኮያይስ፤ ፁሳ ያርሾ ግዶናሽን ፆሳ ኤሮ ኮያይስ።

⁷ “ሽን ኤንቲ አዳመዳ፥ ጫቆ መንዶሶና፤ ያን ታዉ አማነቶና እፅዶሶና።

⁸ ጋላዳ ካታማይ ሱ ጉክያ ኢታ ኦሶ ኦያ አሳይ ኩምዳ ካታማ።

⁹ ፓንጋት አሰ ዎናዉ ቆሰትድ ናገይሳዳ ካህነታ ጩጋይ ሄሳዳ ናጎሶና። ሴከማ ካታማ ኤፍያ ኦግያን ናግድ አሰ ዎኦሶና፤ ኤንቲ ዬላያ ዎራን ኦሶ ኦሶና።

¹⁰ ታኒ እስራኤለ አሳ ግዶን ዳጋንያባ በአስ። ኤፍሬማ ግዶን ላይማተ ደኤስ፤ እስራኤለይ ቱንስ።

¹¹ “ይሁዳ፥ ታኒ ታ አሳ ድኡዋ ዛርያ ዎደ ነዉ ቃስ ጫካ ዎደ ጊግሳስ።