Hose 4 - ጌሻ ማፃፋ

ጎዳይ እስራኤለ ሞቴስ

¹ ሀ ቢታን ደእያ አሳ ኡባ፥ ጎዳይ ሞትያባይ ደእያ ግሾ፥ እስራኤለ አሳቶ፥ ጎዳ ቃላ ስእተ። ሄስካ፥ ቢታ ቦላ አማነተ፥ ሲቆይነ ፆሳ ኤሮይ ባዋ።

² ሀ ቢታ ቦላ ደኤይ ባደ፥ ዎርዶ፥ ሸምፖ ዎ፥ ካይሶቶነ ላይማ ፃላላ። ኤንቲ ዎጋ ኡባ መንሶና፤ ሱ ጉሶሶና።

³ ሄሳ ጋሶን ቢታ ኡባይ ዬካና፤ ቢታን ደእያ ኡባይ ዳቡራና። ሳአ ዶአት፥ ሳሎ ካፎትነ አባ ሞሎት ሀይቃና።

⁴ ህንተኖ፥ ካህነቶ፥ ታኒ ህንተና ሞትያባይ ደእያ ግሾ፥ ኦንካ ሀራ አሳራ ፓላመቶፎ፤ ዎይኮ ሀራ አስ ሞቶፖ።

⁵ ህንተ ጋላስነ ቃማ በቴታ፤ ናበትካ ህንተራ በቶሶና። ሄሳ ግሾ፥ ታኒ ህንተ አይዉ ይሳና።

⁶ ታ አሳስ ኤራተ ባይና ግሾ ይዶሶና። ህንተ ኤራተ እፅዳ ግሾ፥ ታካ ህንተ ታዉ ካህነ ግዶና መላ እፃስ። ህንተ ፆሳ ህግያ ዶግዳ ግሾ፥ ታካ ህንተ ናይታ ዶጋና።

⁷ ካህነታ ታይቦይ ዳር ዳር ብያ ዎደ ታና ጉጅ ጉጅ ናቅዶሶና፤ ታኒ ኤንታ ቦንቹዋ ቃራዳ ዬላያና።

⁸ ታ አሳ ናጋራይ ኤንታዉ ካ ግድዳ ግሾ ኤንቲ ታ አሳይ ባላባ ኦና መላ ኮዮሶና።

⁹ ካህነት ደርያፐ ዱማትቦኮና። ታኒ ኤንታ ሀኖታ ግሾ፥ ኤንታ ሴራና፤ ኤንታ ኦሱዋዳ ኤንታዉ ዛራና።

¹⁰ ኤንቲ ጎዳ አግዳ ግሾ ማና፥ ሽን ካሎኮና፤ ላይማታና፥ ሽን ናአ የሎኮና።

¹¹ ላይማተ፥ ጋምእዳ ዎይነ ኡሽነ ማልአንቶ ዎይነ ኡሽ ታ አሳ ዎዛና ይስስ።

¹² ኤንቲ ምፈ ኦሰትዳ ኤቃ ምስለ ዞረ ኦይቾሶና፤ ኤንታ ፃምአይ ኤንታ ኦይሻ ዛሬስ። ላይማተ አያናይ ኤንታ ባለስ፤ ኤንቲ ባንታ ፆሳፈ ሃክድ ላይማትዶሶና።

¹³ ደረታ ሁጰን ያርሾ ያርሾሶና፤ ሎኦ ኩያይ ደእያ ዎላ ጋርሳን፥ ፂዳ ጋርሳን እፃነ ጩይሶሶና። ሄሳ ግሾ፥ ህንተ ማጫ ናይት ላይማቶሶና፤ ህንተ ናይታ ማቸት ላሞሶና።

¹⁴ ህንተ ማጫ ናይት ላይማትያ ዎደነ ህንተ ናይታ ማቸት ላምያ ዎደ ታኒ ሴርከ። አይስ ጊኮ፥ አደት ባንታ ሁጰን ላይማተይሳታራ ላገቶሶና፤ ኤንታራ ያርሾሶና። ሄሳ ግሾ፥ አኬክ ባይና ደረይ ያና።

¹⁵ “እስራኤለ አሳቶ፥ ህንተ ላይማትኮካ፥ ይሁዳ አሳይ ህንተይሳዳ ባላ ግዶፖ። ጋልጋላ ቦፕተ፤ ቤት-አዌና (ኢታተ ኬ) ከዮፕተ፤ ‘ደኦ ፆሳይ ኤርያ መላ’ ግድ ጫቆፍተ።

¹⁶ እስራኤለ አሳይ ጌላ ኡሳዳ ጌላትስ። ያትን፥ ጎዳይ ኤንታና ዳልጋ ደንባን ዶርሳ ማራዳ ዋትድ ሄማኔ?

¹⁷ ኤፍሬም ኤቃታራ ጋሄትስ፤ ኤንታ አጋግተ።

¹⁸ ኤንቲ ዳሮ ዎይነ ኡሻ ኡይ ስሚድ፥ ላይማተ አጎኮና፤ ኤንታ ሀላቃትካ ዬላያባ ዳሮ ዶሶሶና።

¹⁹ ኤንታ ጫርኮይ ኤፋና፤ ባንታ ኤቃስ ያርሽዳ ያርሾታ ጋሶን ኤንቲ ዬላታና።”