Hose 13 - ጌሻ ማፃፋ

ፆሳ ሀንቆይ እስራኤለ ቦላ

¹ ኤፍሬም ኦደትዳ ዎደ ስእዳ ኡባይ ያሻን ኮኮርስ፤ እስራኤለ ቢታን ኤንቲ ቦንቸትዳ አስ። ሽን ባኣለ ኤቃ ጎይንዶሶና፤ ሄ ናጋራ ጋሶን ሀይቅዶሶና።

² ሀእካ ናጋራ ቦላ ናጋራ ኦሶና፤ ባንታ ብራ ሼሽድ ባንታዉ ኤቃ መዶሶና፤ ሂላን ኦሰትዳ ምስለታ ጊግስዶሶና፤ ኡባይካ ኩሸ ሂላን መትዶሶና። አሳይ ኤንታባ ኦድሸ፥ “ያርሽያ አሳይ ማራ ኤቃ ምስለታ ዬርተ” ያጎሶና።

³ ሄሳ ግሾ፥ ኤንቲ ዎንታ ሻራ መላ ዎይኮ ዎንታ ፃሳ መላ ዎይኮ ጫርኮይ ዉዱማፈ ደንድ ኤፍያ ፑኖ መላ ዎይኮ ማስኮተራ ከያ ጩያ መላ ግዳና።

⁴ ጎዳይ “ታኒ ህንተና ግብፀ ቢታፈ ከሳዳ ኤህዳ ጎዳ፥ ህንተ ፆሳ። ህንተ ታፐ አትሽን፥ ሀራ ፆሲ ኤረከታ፤ አሸይ ታፐ ሀር ባዋ።

⁵ ባዞን፥ መላ ቢታን ታኒ ህንተና ናጋስ።

⁶ ታኒ ህንተና ሙዝን፥ ምድ ካልድ ኦቶርትደታ፤ ሄሳፈ ጉየ ታና ዶግደታ።

⁷ ሄሳ ግሾ፥ ታኒ ህንተ ቦላ ጋሞ ግዳና፤ ማሄ መላ ኦገ ዶናን ዙጋና።

⁸ ማር ኤከትዳ ማሄ መላ ታኒ ህንተራ ጋሄታዳ ታ ህንተና ፑዛና። ታኒ ህንተና ጋሞዳ መንረና፤ ባዞ ዶአዳ ህንተና ፖሻና።

⁹ “እስራኤለ አሳቶ፥ ህንተ ታ ቦላ፥ ህንተና ማደይሳ ቦላ ደንድዳ ግሾ ታ ህንተና ይሳና።

¹⁰ ህንተ ታና፥ ‘ኑስ ካዎነ ሀላቃ እማ’ ያግድ ኦይችደታ። ህንተና አሽያ ህንተ ካዎይ አኔ? ካታማታን ደእያ ህንተ ሀላቃት አዉን ደኦና?

¹¹ ታኒ ታ ሀንቁዋን ህንተዉ ካዎ እማስ፤ ታ ይሉዋን እያ ደንስ።

¹² ኤፍሬማ ባላይነ ናጋራይ ፃፈትድ ኡትስ።

¹³ እቀ ኦይክዳ ማጫስ ኡንኤተይሳ መላ ኡንእ እያ ቦላ ያና። ሽን እ ኤር ባይና ናአ፤ የለትያ ዎደይ ጋክን፥ ባ አየ ኡሎፐ ዎና እፅያ ናአ መላ።

¹⁴ ታኒ ኤንታ ዱፎፐ አሻና፤ ሀይቆ ዎልቃፈ ዎዛና። ሀይቆ፥ ነ ጋዶይ አዉኔ? ስኦለ፥ ነ ይሶይ አዉኔ? ታኒ ታ አሳስ ቃትከ።

¹⁵ ኤፍሬም ባ እሻታ ግዶን ምንኮካ፥ ጎዳይ የድዳ ዶሎሀ ባጋ ጫርኮይ ባዞፈ ጫርክሸ ያና፤ እያ ፑልቶይ ኤቃና፤ እያ ሃይ መላና። እ ምንጅዳ አልኦ ሚሸ ኡባይ ቦንቀታና።

¹⁶ ሳማረ አሳይ ባንታ ፆሳ ቦላ ጌላትዳ ግሾ፥ ሴራ ኤካናዉ በሴስ። ኤንቲ ማሻን ቡሰታና፤ ኤንታ ናይት ትንቸታና፤ ኤንታ ቃንትዳ ማጫሳታ ኡሎይ ዳከታና” ያጌስ።