Hose 1 - ጌሻ ማፃፋ

¹ ኦዝያን፥ እዮአታም፥ አካዝነ ህዝቅያስ ካል ካል ይሁዳን ካዎትዳ ዎደ ቃስ ዮኣሳ ናአይ እዮርባም እስራኤለን ካዎትዳ ዎደ ብኤራ ናኣ ሆሰኮ ይዳ ጎዳ ቃላይ ሀይሳ።

ሆሰ ማችዉነ እያ ናይታ

² ጎዳይ ኮይሮ ሆሰ ባጋራ ኦድዳ ዎደ “ታ አሳይ ታፐ ሃክድ ኢታ ላይማተ ኦዳ ግሾ፥ ኔኒ ባዳ፥ ላይማ ማጫስ ኤካዳ ላይማ ናይታ ኢፐ የላ” ያግስ።

³ ሄሳ ግሾ፥ ሆሰይ ብድ፥ ድብላይማ ናእዉ ጎመሮ ኤክን፥ እያ ቃንታዳ አደ ናአ የላሱ።

⁴ ያትን፥ ጎዳይ ሆሰኮ ነ ናአ ሱን፥ “እዝራኤለ” (ላላና ዎይኮ ዘራና) ያጋዳ ሱን። አይስ ጊኮ፥ እዝራኤለን ጉክዳ ሱ ግሾ ታኒ እዩ ኮቻ ቃን ዎደን ፕርዳና፤ እስራኤለ ካዎተካ ይሳና።

⁵ ሄ ጋላስ ታኒ እዝራኤላ ዛንጋራን እስራኤለ ኦላንቾታ መንረና።

⁶ ጎመራ ናምአን ቃንታዳ፥ ማጫ ናአ የላሱ። ያትን፥ ጎዳይ ሆሰኮ፥ “እ ሱን ሎሩሃማ (ማሮተ ደሞናሮ) ያጋዳ ሱን። አይስ ጊኮ፥ ህዛፐ ጉየ ታኒ እስራኤለ አሳስ ቃትከ፤ ኤንታዉ አቶ ጊከ።

⁷ ሽን ታኒ ይሁዳ አሳስ ቃታና፤ ታኒ ኤንታ ዶንገን ዎይኮ ማሻን ዎይኮ ኦላን ዎይኮ ፓራታን ዎይኮ ፓራ አሳታን ግዶናሽን፥ ታኒ ጎዳይ፥ ኤንታ ፆሳይ፥ ታ ዎልቃን ኤንታ አሻና” ያግስ።

⁸ ጎመራ ሎሩሃሞ ን ዱዳፐ ጉየ ቃንታዳ ሀራ አደ ናአ የላሱ።

⁹ ያትን፥ ጎዳይ ሆሰኮ፥ “እያ ሱን ሎኣማ (ታ አሰ ግደና) ያጋዳ ሱን። አይስ ጊኮ፥ ህንተ ታ አሰ ግደከታ፤ ታካ ህንተ ፆሰ ግድከ።

¹⁰ “ግዶሽን፥ እስራኤለ አሳይ ማካናዉነ ታይባናዉ ዳንዳኤቶና አባ ሻፍያ መላ ግዳና። ኤንቲ፥ ‘ህንተ ታ አሰ ግደከታ’ ጌተትድ ፄገትዳ በሳን ህንተ ‘ደኦ ፆሳ ናይታ’ ጌተታና።

¹¹ ይሁዳ አሳይነ እስራኤለ አሳይ እስፈ ሺቅድ ባንታዉ እስ ሀላቃ ዶርድ ድኤትዳ ቢታፈ ስማናነ እንጀትድ ዳና። ሄ ጋላሳይ እዝራኤለስ ግታ ጋላስ ግዳና።