Hizqeela 8 - ጌሻ ማፃፋ

ፆሳ ኬን ደእያ ላይማተ

¹ ኑኒ ድኤትዳ ኡሱፑን ላይን፥ ኡሱፑን አጌናን፥ እቻሻን ጋላሳን፥ ታኒ ታ ሶን ኡትዳሽን፥ ይሁዳ ጭማትካ ታ ስንን ኡትዳሽን፥ ኡባ ሃርያ ጎዳ ዎልቃይ ታና ሃርስ።

² ሄኮ፥ ታኒ ቁ ጋዳ ፄልያ ዎደ አሰ ዳነይሳ በአስ። እያዉ ፄሰ ዳነይሳፈ ጋርሳ ባጋይ ታማ ላጮ ዳኔስ፤ ቦላ ባጋይ ጶልያ ናሰ ብራታ ዳኔስ።

³ እ ኩሸ ዳንያባ ታኮ የድድ፥ ታ ብናና ኦይክስ። አያናይ ታና ሳአፐነ ሳሎፐ ግዶ ፑደ ደንድ፥ ፆሳ ቆንጨን ታና የሩሳላመ ኤፍስ። ያን ቆሞ ባጋራ ፆሳ ኬ ግዶ ዳባባ ገልያ ፐንግያራ ገልስድ፥ ጎዳ ቃናትያ ደንያ ኤቃይ ኤቅዳ በሳ በስስ።

⁴ ሄኮ፥ ካሰ ታኒ ዛንጋራን በእዳይሳዳ፥ እስራኤለ ፆሳ ቦንቹዋ ያን በአስ።

⁵ ጎዳይ ታኮ፥ “ነኖ አሳ ናአዉ፥ ፑደሀ ባጋ ፄላ” ያግስ። ታኒ ፄልያ ዎደ ቃናተ ደንያ ኤቃይ፥ ድርሳ ፐንግያ ስንን ደእያ ያርሾ በሳ ማታን ደኤይሳ በአስ።

⁶ እ ታኮ፥ “ነኖ፥ አሳ ናአዉ፥ ኤንቲ ኦያባ በአይ? ታና ታ ጌሻ ኬፈ ሃሳናዉ፥ እስራኤለ አሳይ ኦያ እፀትዳ ኤቃ ጎይኑዋ በአይ? ሀይሳፈ አያ እፀትዳ ኤቃ ጎይኖ ኔኒ ቡሮ በአና” ያግስ።

⁷ እ ታና ፆሳ ኬ ዳባባ ፐንገ ኤህን፥ ታኒ ፄልያ ዎደ፥ ሄኮ፥ ጎዳ ቦላ ፆኤ በአስ።

⁸ እ ታኮ፥ “ነኖ፥ አሳ ናአዉ፥ ጎዳ ቦካ” ያግን፥ ታ ቦክያ ዎደ እስ ፐንገ ያን በአስ።

⁹ እ ታኮ፥ “ገላዳ ኤንቲ ያን ኦያ ኢታ ኦሱዋነ እፀትዳ ኤቃ በአ” ያግስ።

¹⁰ ታ ግዶ ገላዳ ፄልያ ዎደ፥ ሄኮ፥ ሳአራ ጎሸትያ ዱማ ዱማ መተታ ምስለይ፥ ቱና ዶአታ ምስለይነ እስራኤለ አሳ ኤቃታ ኡባ ምስለይ ጎዳ ቦላ ዩይ አድ መት ኡትዳይሳ በአስ።

¹¹ ኤንታፈ ስን ባጋራ እስራኤለ አሳፐ ላፑን ታሙ ጭማት ኤቅዶሶና፤ ሳፋና ናኣ ያእዛን ኤንታ ግዶን ኤቅስ። ኡባይ እፃነ ጩይስያባ ባንታ ኩሸን ኦይክዶሶና፤ እፃንያ ጩያይ ቱቁ ጌስ።

¹² ጎዳይ ታኮ፥ “ነኖ፥ አሳ ናአዉ፥ እስራኤለ አሳ ጭማት ኡባይ ማን ባንታ ኤቃ ምስልያ ኬን ኦያባ በአይ? ኤንቲ፥ ጎዳይ ኑና በኤና፤ ጎዳይ ሀ ቢታ አግስ” ያጎሶና።

¹³ እ ታኮ፥ “ሀይሳፈ አያ እፀትዳ ኤቃ ጎይኖ ኔኒ ቡሮ በአና” ያግስ።

¹⁴ ሄሳፈ ጉየ፥ ፑደሀ ባጋን ደእያ ፆሳ ኬ ፐንግያኮ ኤፍን፥ ሄኮ፥ ማጫሳይ ያን ኡትድ፥ ታሙዛ ጌተትያ ባንታ ፆሳስ ዬክሽን በአስ።

¹⁵ እ ታኮ፥ “ነኖ አሳ ናአዉ፥ ሀይሳ በአይ? ሀይሳፈ አያ እፀትዳ ኤቃ ጎይኖ ኔኒ ቡሮ በአና” ያግስ።

¹⁶ ሄሳፈ ጉየ፥ እ ታና ፆሳ ኬ ግዶ ዳባባ ኤፍስ፤ ያን ፆሳ ኬ ፐንግያ ማታን፥ ባራንዳፈነ ያርሾ በሳፈ ግዶን፥ ላታማነ እቻሹ ግድያ አሳታ በአስ። ኤንቲ ባንታ ዞኩዋ ፆሳ ኬኮ፥ ባንታ ሶምኡዋ ዶሎሀኮ ዛሪድ፥ ዶሎሀራ ከይያ አዋ ጎይኖሶና።

¹⁷ ጎዳይ ታኮ፥ “ነኖ አሳ ናአዉ፥ ሀይሳ በአዲ? ይሁዳ አሳይ ሀ እፀትዳ ኤቃ ጎይኖይ ሀይሳን ኦይስ ኤንታዉ ላፋባ ግድዴ? ኤንቲ ቢታ ጌላ ኦሶን ኩንድ፥ ዛሪ ዛሪድ ታና ሀንቀናዉ በሲ? ኤንቲ ባንታዉ ዳንዳኤትዳ መላ ታና ኢስድ ጫዮሶና።

¹⁸ ሄሳ ግሾ፥ ታ ኤንታራ ሀንቆን ጋሄታና፤ ታ ኤንታዉ ቃትከ፤ ኤንታፈ እሱዋካ አሽከ። ኤንቲ ባንታ ቃላ ቃ ኦድ ዋስንካ፥ ታ ኤንታ ስእከ” ያግስ።