Hizqeela 7 - ጌሻ ማፃፋዉርሰ ጋክስ 1 ጎዳ ቃላይ ታኮ ሀይሳዳ ያግሸ ይስ። 2 “ነኖ አሳ ናአዉ፥ ኡባ ሃርያ ጎዳይ እስራኤለ ቢታኮ ሀይሳዳ ያጌስ፦ ‘ዉርሰ ማትስ፤ ኡባ ባጋራ ሀ ቢታ ቦላ ዉርሰ ይስ። 3 ሀእ፥ ዉርሰ ህንተ ቦላ ጋክስ፤ ታኒ ታ ሀንቁዋ ህንተ ቦላ የዳና። ታኒ ህንተ ኦሱዋዳ፥ ህንተ ቦላ ፕርዳና፤ ህንተ እፀትዳ ኤቃ ጎይንዳ ግሾ ህንተና ሴራና። 4 ታኒ ህንተዉ ቃትከ፤ ህንተና ማርከ። ህንተ ኢታ ኦሱዋዳ ህንተ ቦላ ፕርዳና፤ ህንተ ግዶን ደእያ እፀትዳ ኤቃ ጎይኖታ ቆንጭሳና። ታኒ ጎዳ ግደይሳ ህንተ ሄሳን ኤራና’ ” ያጌስ። 5 ኡባ ሃርያ ጎዳይ፥ “ሄኮ፥ ጋዶይ ጋክስ፤ ጋዶይ ጋዶ ቦላ ዬስ። 6 ዉርሰ ጋክስ፤ ዉርሰ ማትስ፤ እ ህንተ ቦላ ደንድስ፤ ሄኮ፥ ጋክስ። 7 ቢታ ቦላ ደኤይሳቶ፥ ህንተ ፕርዳይ ጋክስ፤ ዎደይ ማትስ፤ ጋላሳይ ማታትስ። ሄስ ዳጋማ ጋላስፐ አትሽን፥ ዙማታ ቦላ ኡፋይሳን እልልያ ጋላስ ግደና። 8 ሀእ ማታ ዎደ ታኒ ታ ሀንቁዋ ህንተ ቦላ ጉሳና፤ ታ ይሉዋ ህንተ ቦላ ዉርሳና። ታኒ ህንተ ኦሱዋ ግሾ ህንተ ቦላ ፕርዳና፤ እፀትዳ ኤቃ ጎይንዳ ግሾ ህንተና ሴራና። 9 ታ ህንተዉ ቃትከ፤ ህንተና ማርከ። ህንተ ኢታ ኦሱዋዳ ህንተ ቦላ ፕርዳና፤ ህንተ ግዶን ደእያ እፀትዳ ኤቃ ጎይኖታ ቆንጭሳና። ሄ ዎደ ህንተና ሴረይ ታና ጎዳ ግደይሳ ህንተ ኤራና። 10 “ሄኮ፥ ጋላሳይ! ሄ ጋላሳይ ጋክስ! ህንተ ዮይ ማትስ! ህንተ ኢታተይ ጋምቡፅስ፤ ህንተ ኦቶሮይ ጪይስ። 11 ጌላተ ጋሶን ኢታ ኦሶይ ዳርስ። ኤንታፈ እሶይካ አተና፤ ኤንታ ሻሉዋፐ ዎይኮ ኤንታ አሳፐ ዎይኮ ኤንታ ቦንቹዋፈ አታናባይ ባዋ። 12 ዎደይ ጋክስ፤ ጋላሳይ ማትስ፤ ታ ሀንቆይ አሳ ኡባ ቦላ ግድያ ግሾ ሻመይስ ኡፋይቶፎ፤ ባይዘይስ አዛኖፖ። 13 ናምአይ ደኦን ደእያ ዎደ ኡባን፥ ባይዝዳይስ ባ ባይዝዳባ ኤካናዉ ጉየ ስመና። እስራኤለ አሳ ኡባ ቦላ ኦደትዳ ሀ ቆንጨይ ፖለቶና አተና። ኤንታ ናጋራ ጋሶን ኤንታፈ እሶይካ ባ ሸምፑዋ አሸና። 14 ታ ሀንቆይ አሳ ኡባ ቦላ ቆንጫናዉ ደእያ ግሾ ኤንቲ ኦላስ ሞይዘ ፑንድ ጊገቶኮና፤ ኦንካ ኦላስ ከየና። 15 “ካረን ኦል ደኤስ፤ ሶን ቦሽነ ኮሽ ደኤስ። ካታማፐ ካረን ደኤይ ኦላን ሀይቃና፤ ካታማ ግዶን ደኤይ ቦሻንነ ኮሻንነ ዉራና። 16 ከስ ኤክድ አትዳይሳት፥ ዛንጋራፐ ያሻን ደረ ቦላ ፕራድ ከይዳ ሆለዳ፥ ባንታ ናጋራ ግሾ ደረ ቦላ ዘሌላና። 17 ኩሸ ኡባይ ዶጫና፤ ኡባይ ያሻን ኮኮርድ ሼሽ የጋና። 18 ኤንቲ ካዮ ማኦ ማአና፤ ያሻን ኮኮራና። ኤንታ ኡባ ሶምኦይ ዬላ ማአና፤ ኤንታ ኡባ ሁጰይ ሜደታና። 19 ኤንቲ ባንታ ብራ ኦገን ሆላና፤ ኤንታ ዎርቃይ ቱናባ ግዳና። ጎዳ ዎልቃማ ሀንቆ ጋላስ ኤንታ ብራይነ ኤንታ ዎርቃይ ኤንታ አሻናዉ ዳንዳኤና። ኤንታዉ በ ግድድ፥ ናጋራን ገልስዳ፥ ብራይነ ዎርቃይ ኡሎ ኩምድ፥ ኤንታ ኮሻፐ አሸና። 20 “ኤንቲ ባንታ አልኦ አሌቆታ ኦቶርትድ፥ እፀትዳ ኤቃነ ዬላይያ ምስለ መናዉ ጎኤትዶሶና። ሄሳ ግሾ፥ ታኒ ሄ አልኦ አሌቆታ ኤንታዉ ቱናባ ከሳስ። 21 ታኒ ኤንታ አሌቁዋ አላጋ ቢታ አሳስ ድኦ፥ ቢታን ደእያ ኢታ አሳስ ቦንቀ አዳ እማና፤ ኤንቲ እያ ቱንሳና። 22 ሄ ዎደ ታኒ ታ ሶምኡዋ ሀራ ሶ ዛራና፤ ታ ቦንቾ ኬ ፓንጋት ገልድ ቱንሳና። 23 “ሱረ ፕርዳ ዮን ቢታይ ሱን ኩምዳ ግሾነ ካታማይ ጌላ ኦሶን ኩምዳ ግሾ ሳንላታ ጊግሳ። 24 ታኒ ኢታ ካዎተታ ኤሀዳ ኤንታ ኬታ ቦንቃና መላ ኦና። ዎልቃማታ ኦቶሩዋ ይሳና፤ ኤንታ ጌሻ ጎይኖ በሳት ቱናና። 25 ኤንቲ ዳጋምያ ዎደ ሳሮ ኮያና፤ ሽን ደሞኮና። 26 እስ ጋዶይ ሀራ ጋዶ ካለና፤ እስ ዎረይ ሀራ ዎረ ካልድ ያና። ኤንቲ ናበታፐ ቆንጨ ኮያና፤ ካህነታስ ታማርስያባይ ያና፤ ጭማታስ ዞርያባይ ያና። 27 ካዎይ ዬካና፤ ሀላቃይ ኡፋይስ ቃንፃና፤ አሳይ ያሻን ኮኮራና። ታኒ ኤንታዉ ኤንታ ኦሱዋዳ ኦና፤ ኤንቲ ሀራታ ቦላ ፕርድዳይሳዳ ታ ኤንታ ቦላ ፕርዳና። ታኒ ጎዳ ግደይሳ ኤንቲ ሄሳን ኤራና” ያጌስ። |
The Word for the World International and The Word for the World Ethiopia